ރައްޔިތުންގެ ފަޅި ހިޔާރުކުރުމަށް މަޖިލިސް މެމްބަރުންނަށް މަހުލޫފު ގޮވާލައްވައިފި
28 ޖޫން 2017 | ބުދަ 08:53މަޙްލޫފު ވިދާޅުވެފައިވަނީ ކަޅު ހިލަ ދަޔަށް ވަޅި ވަންނަނީ ކަމަށް
ގަލޮޅު ދެކުނު ދާއިރާގެ މެމްބަރު އަޙްމަދު މަހްލޫފު
ވަގުތު ފާއިތު ނުވަނީސް ޣާފިލު ކަމުން ހޭލުމަށާއި އަދި ރައްޔިތުންގެ ފަޅި ހިޔާރު ކުރުމަށް މަޖިލިސް މެމްބަރުނަށް، ގަލޮޅު ދެކުނު ދާއިރާގެ މެމްބަރު އަޙްމަދު މަހްލޫފު ގޮވާލައްވައިފި އެވެ.
މަޙްލޫފު މިހެން ވިދާޅުވީ އޭނާ ބުދަ ދުވަހު ކުރެއްވި ޓްވީޓެއްގައެވެ.
މިޓްވީޓުގައި މަޙްލޫފު ވިދާޅުވެފައިވަނީ "ކަޅު ހިލަ ދަޔަށް ވަޅި ވަންނަނީ" ކަމަށެވެ. ނަމަވެސް މިއީ ކޮންކަމަކާ ގުޅިގެން ވިދާޅުވި އެއްޗެއް ކަމަށް ސާފުވެފައެއް ނުވެއެވެ.
މަހްލޫފު މިގޮތަށް ގޮވާލައްވާފައިވާއިރު އިދިކޮޅު ފަރާތްތަކުން ވަނީ މަޖިލީހުގެ އިތުރު މެމްބަރުންތަކެއް އެފަރާތްތަކާ ގުޅެމުން އަންނަ ކަމަށް ބުނެފައެވެ. އެ ގޮތުން ޢީދު ބަންދަށް ފަހު މަޖިލިސް ފެށޭއިރު ހެޔޮ ބަދަލުތަކެއް ފެނިގެންދާނެ ކަމަށް ބުނެފައި ވެއެވެ.
ފިޝަރީޒް މިނިސްޓަރު މުހައްމަދު ޝައިނީ މަގާމުން އިސްތިއުފާ ދެއްވުމަށް ސަރުކާރު ހިންގާ ޕީޕީއެމްގެ ޕާލަމެންޓްރީ ގުރޫޕްގެ މަހިބަދޫ ދާއިރާގެ މެމްބަރު އަހުމަދު ތޯރިގް އިއްޔެ ވަނީ ގޮވާލައްވާފައެވެ.
ތޯރިގް އޭނާގެ ފޭސްބުކް ޕޭޖުގައި ވިދާޅުވީ މަސްވެރިކަމުގެ ސިނާއަތުގައި މަސައްކަތްކުރާ ރައްޔިތުންގެ ދަތިތައް ހައްލު ނުވެގެން ދިއުމުގެ ޒިންމާ ޑރ. ޝައިނީ ނަންގަވަން ޖެހޭނެ ކަމަށެވެ.
ތޯރިގް ވިދާޅުވީ ޑރ. ޝައިނީ އިތުރަށް ފިޝަރީޒް މިނިސްޓަރުގެ މަގާމުގައި ހުންނަވައިގެން މަސްވެރިންނަށާއި މަސްވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް ދިމާވެފައިވާ ދަތިތަކަށް ހައްލެއް ލިބިދާނެ ކަމަށް ގަބޫލު ނުކުރައްވާ ކަމަށެވެ.
ސަރުކާރުގެ މެނިފެސްޓޯގައި ހިމެނޭ "ބެޔަސް ނުބެޔަސް" ސިޔާސަތު ތިން އަހަރު ވީއިރު ވެސް ކާމިޔާބް ވެފެއިނުވާއިރު މަސްވެރިން ބާނާ މަސް ގަނެވޭނެ އެންމެ ދަށް އަގެއް ކަނޑައެޅުމާ ބެހޭ ރެގިޔުލޭޓަރީ ބޮޑީ އުފެއްދުމަށް ރައްޔިތުންގެ މަޖިލީހުގެ ޕީޕީއެމް އަށް ނިސްބަތްވާ މެމްބަރުން އެދުނު އެދުން ކުރިއަށް ނުގެންދާ ކަމަށް ތޯރިގް ވިދާޅުވެފައި ވެއެވެ.
