ޗެލްސީ އަތުން ނޮޓިންގހަމް ފޮރެސްޓް ޕޮއިންޓެއް ހޯދައިފި

ޗެލްސީ އަތުން ޕޮއިންޓެއް ހޯދައިގެން ނޮޓިންގހަމް ފޮރެސްޓުން މިސްރާބު ރަނގަޅުކޮށްފިއެވެ. ރެލިގޭޝަނުން ސަލާމަތްވާން މަސައްކަތްކުރަމުން އަންނަ ނޮޓިންގހަމް ފޮރެސްޓް އޮތީ 14 ޕޮއިންޓާއެކު 18 ވަނާގައެވެ.

މެޗުން ނޮޓިންގހަމް ފޮރެސްޓް ޕޮއިންޓެއް ހޯދީ 1-1 ން އެއްވަރުކޮށްގެންނެވެ. އެއީ ފުރަތަމަ ހާފުގައި ސްޓާލިންގ ޗެލްސީއަށް ލަނޑުޖަހާ ކުރި ހޯދާދީފައިވަނިކޮށް, ފަހަތުން އަރާ ދެވަނަ ހާފުގައި ނަތީޖާ ހަމަހަމަކޮށްގެންނެވެ. ނަތީޖާ ހަމަހަމަކޮށްދިނީ ކަނާތު ބެކް ސާޖް އޯރިއޭއެވެ. މިނަތީޖާއާއެކު ޗެލްސީ އޮތީ 25 ޕޮއިންޓާއެކު އަށް ވަނާގައެވެ. ގަދަ ހަތަރެއްގެ ތެރެއަށް ވަނުމަށް ޗެލްސީ އޮތީ އުނދަގޫ ހާލަތެއްގައެވެ. ގަދަ ހަތަރަކާ ދެމެދު ހަތް ޕޮއިންޓުގެ ފަރަގެއް އެބައޮތެވެ.

އަލުން ގަދަ ހަތަރެއްގެ ތެރެއަށް ވަންނަން ލިބުނު ފުރުޞަތު ޓޮޓެންހަމްއިންވެސް ވަނީ ނަގާލާފައެވެ. އެއީ އެސްޓަން ވިލާ އަތުން ބަލިވެގެންނެވެ. ޓޮޓެންހަމް އަތުން އެސްޓަން ވިލާ މޮޅުވީ 2-0 ނެވެ. ދެވަނަ ހާފުގައި އެޓީމްގެ ދެ ލަނޑު ޖަހައިދިނީ ބުއެންޑިއާއާއި, ޑަގްލަސް ލުއީޒްއެވެ. ޓޮޓެންހަމް އޮތީ 30 ޕޮއިންޓާއެކު ފަސް ވަނާގައެވެ. ހަތަރު ވަނާގައި ފަސް ޕޮއިންޓުގެ ލީޑެއް ނެގުމުގެ ފުރުޞަތު މެންޗެސްޓަރ ޔުނައިޓެޑަށް މިހާރު އެބައޮތެވެ.