ނިންމުންތައް ނިންމާއިރު ގައުމުގެ މަސްލަހަތު އިސްކުރޭ: އެމްއާރްއެމް
2 ޖެނުއަރީ 2023 | ހޯމަ 02:51ރައްޔިތުންވެސް ނިންމުންތައް ނިންމާއިރު ކަންކަމާ ފުންކޮށް ވިސްނަންޖެހޭ
ކުރީގެ ރައީސް މައުމޫން އަބްދުލްގައްޔޫމް
ނިންމުންތައް ނިންމުމުގައި ގައުމުގެ މަސްލަހަތު އިސްކުރުމަށް މޯލްޑިވްސް ރިފޯމް މޫވްމެންޓް (އެމްއާރްއެމް) އިން ގޮވާލައިފިއެވެ.
އެ ޕާޓީން މިފަދައިން ބުނީ މީލާދީ އައު އަހަރުގެ ތަހުނިޔާ ފޮނުވައި ދިން މެސެޖުގައެވެ. އެމްއާރްއެމްއިން ވަނީ ދިވެހިންނަށާއި، އެކުވެރި ދައުލަތްތަކާއި، ރާއްޖޭގައި ދިރިއުޅޭ ބިދޭސީންނަށްވެސް އައު އހަަރުގެ ތަހުނިޔާ ފޮނުވާފައެވެ.
އެމްއާރުއެމްއިން ބުނީ 2023 ވަނަ އަހަރަކީ ރާއްޖޭގެ ތާރީޚުގައި މުހިންމު އަހަރަކަށް ވެގެންދާނެ އަހަރެއް ކަމަށެވެ. ރައްޔިތުންވެސް ނިންމުންތައް ނިންމާއިރު ކަންކަމާއިމެދު ފުންކޮށް ވިސްނައި، ގައުމުގެ މަސްލަހަތު އިސްކުރުމަށްފަހު ނިންމުންތައް ނިންމުމަށް ނަސޭހަތްތެރިވެފައިވެއެވެ. އަދި ޒިންމާދާރުކަމާއެކުގައި އެންމެންވެސް މަސައްކަތް ކުރުމަށް އަޒުމް ކަނޑައެޅުމަށް ވަނީ ގޮވާލާފައެވެ.
ދުއާއަކީ މި ފެށުނު އަހަރަކީ ރާއްޖެއާއި، ރާއްޖޭގެ ލޮބުވެތި ރައްޔިތުންނަށް ބާއްޖަވެރި އުފާވެރި އަހަރެއް ކަމުގައި ލައްވައި، އިސްލާމްދީނުގައި ދެމިތިބުމުގެ ހެޔޮ ތައުފީގު މިންވަރު ކުރެއްވުން ކަމަށް އެމްއާރްއެމްއިން ވަނީ ބުނެފައެވެ. އަދި އެއްބަނޑުއެއްބަފާކަމާއި އެކުވެރިކަމުގެ ގުޅުން އިތުރަށް ބަދަހިކުރެއްވުންކަމަށް އެ ޕާޓީން ބުނެފައިވެއެވެ.
