ވެނެޒުވޭލާގެ ސްޕްރީމް ކޯޓުގެ އިމާރާތަށް ހަމަލާ ދީފި

ވަގަށް ނަގާފައިވާ ފުލުހުންގެ ހެލިކޮޕްޓަރަކުން ވެނެޒުވޭލާގެ ސްޕްރީމް ކޯޓުގެ އިމާރާތަށް ހަަމަލާ ދީފިއެވެ.

އޮފިޝަލުން ބުނެފައިވަނީ ސްްޕްރީމް ކޯޓުގެ އިމާރާތަށް ހަމަލާ ދިނީ އަތު ބޮން ބޭނުންކޮށްގެން ކަމަށާއި އެގޮތުން ހަމަލާ ދިނީ ހެލިކޮޕްޓަރުން ހަތަރު ބޮން އެއްލައިގެން ކަމަށެވެ. މީގެ އިތުރުން ވެނެޒުވޭލާގެ އިންޓީރިއާ މިނިސްޓްރީގެ އިމާރާތަށް ވެސް ހެލިކޮޕްޓަރުން ބަޑި ޖަހާފައި ވެއެވެ.

ސްޕްރީމް ކޯޓަަށާއި އަދި އިންޓީރިއާ މިނިސްޓްރީއަށް ދިން ހަމަލާއާ ބެހޭ ގޮތުން ރައީސް ނިކޮލަސް މަޑޫރޯ ވިދާޅުވެފައި ވަނީ އެއީ "ޓެރަރިސްޓް" ހަމަލާއެއް ކަަމަށެވެ.

ހަމަލާއާ ބެހޭ ގޮތުން އިންފޮމޭޝަން މިނިސްޓަރު އާރނެސްޓޯ ވިލެގަސް ވިދާޅުވީ ވަގަަށް ނަގާފައިވާ ހެލިކޮޕްޓަރުން ފުރަތަމަ ހަމަލާ ދިނީ އިންޓީރިއާ މިނިސްޓްރީ އަށް ކަމަށާއި އެގޮތުން އެ މިނިސްޓްރީގައި ރަސްމިއްޔާތެއް ކުރިއަށް ދަނިކޮށް ބަޑި ޖެހީ ކަމަށެވެ. އަދި އެއަށްފަހު އެ އިމާރާތާ ގާތުގައި ހުންނަ ސްޕްރީމް ކޯޓަށް ހަަމަލާ ދިނީ ކަމަށެވެ.

އަންގާރަ ދުވަހު ވެރިރަށް ކަރަކަސްގައި މިހާދިސާ ހިނގިއިރު ރައީސް މަޑޫރޯ ގެންދެވީ ގަނޑުވަރުކޮޅުގައި ނޫސްވެރިންނާ ބައްދަލު ކުރައްވަމުންނެވެ. އަދި އެ ބައްދަލު ކުރެއްވުން ދިޔައީ ދައުލަތުގެ ޓީވީން ދުރަށްދައްކަމުންނެވެ. މަޑޫރޯ ވިދާޅުވީ ހަމަލާތަކުގައި އެއްވެސް މީހަކު ޒަޚަމްނުވާ ކަަމަށެވެ. އަދި ސްޕްރީމް ކޯޓަށް އެއްލި ބޮން ގޮވާފައި ނުވާ ކަމަށެވެ.

މަަޑޫރޯ އަށް ފާޑުކިޔަމުން އިދިކޮޅު ފަރާތްތަކުން ސޯޝަލް މީޑިއާގައި ބުނެފައި ވަނީ މަޑޫރޯ މަސައްކަތް ކުރައްވަނީ ރައްޔިތުންގެ ހިތްތަކުގައި ބިރުވެރިކަން އުފެއްދުމަށް ކަަމަށާއި އޭގެ ބޭނުމަކީ ގާނޫނު އަސާސީ އަލުން ލިޔުމާ ދެކޮޅަށް ނިކުންނަ ފަރާތްތަކަށް އަނިޔާވެރިކޮށް އަމަލު ކުރުން ކަމަށެވެ.

އޭޕީގެ ރިޕޯޓަރަކާ ހަވާލާދީ އަލްޖަޒީރާގައި ބުނެފައި ވަނީ ވެރިރަށް ކަރަކަސްގެ ޑައުންޓައުން އިން ހެލިކޮޕްޓަރުގެ އަޑު އިވުނު ކަމަށާއި އެހެންނަމަވެސް ބަޑިޖެހީ ކޮންތަނަކުން ކަން ކަށަވަރު ނުކުރެވޭ ކަަމަށެވެ.

ވެނެޒުވޭލާގެ އިދިކޮޅު ފަރާތްތަކުން މަޑޫރޯއާ ދެކޮޅަށް މުޒާހަރާ ކުރަމުންދާތާ ތިން މަސް ވެއްޖެއެވެ. އަދި ސަރުކާރުގެ ތެރެއިން ވެސް މަޑޫރޯއާ ދެކޮަޅަށް ދެކޮޅުވެރިކަން ވަނީ ފާޅުވެގެން ގޮސްފައެވެ.