ފޭސްބުކްގެ ޔޫޒާސްގެ އަދަދު ދެ ބިލިއަނަށް އަރާފައިވާ ކަމަށް އެ ކުންފުނީގެ ޗީފް އެކްޒެކެޓިވް މާކް ޒަކަބާގް ބުނެފި އެވެ.
މީގެ 13 އަހަރު ކުރިން ފޭސްބުކް ވުޖޫދަށް ގެނައި ޒަކަބާގް ބުނީ ފޭސްބުކް ޔޫޒާސްގެ އަދަދު ދެ ބިލިއަނަށް އެރި ނަމަވެސް އަދިވެސް ހުރިހާ އެންމެންނާ ކަނެކްޓްނުވާ ކަމަށާއި، އަމާޒަކީ ފޭސްބުކް ހުރިހާ އެންމެންނާ ގުޅާލުން ކަމަށެވެ.
ފޭސްބުކް އިން ވަނީ މިދިޔަ މަހު މޮޑަރޭޓްކުރުމަށް 3،000 އަށްވުރެ ގިނަ މީހުން އެ ކުންފުންޏަށް ވައްދާފައެވެ.
ފޭސްބުކްގެ ނައިބުރައީސާ ނައޯމީ ގްލެއިޓް ބުނީ ބިލިއަނަކަށް ވުރެ ގިނަ މީހުން ފޭސްބުކްގައި ގްރޫޕްތަކުގައި ބައިވެރިވާ ކަމަށާއި، ދުވަހެއްގެ މައްޗަށް އެވްރެޖްކޮށް 800 މިލިއަނަށްވުރެ ގިނަ މީހުން ފޭސްބުކްގެ ކޮންމެވެސް ޕޯސްޓަކަށް ލައިކްކުރާ ކަމަށެވެ.
ފޭސްބުކް ބޭނުންކުރާ ގިނަ ޔޫޒާސް މިހާރު ސްނެޕްޗެޓް ބޭނުންކުރަމުން އަންނައިރު، ފޭސްބުކް ބޭނުންނުކުރާ ގިނަ ބަޔަކު ވެސް އަންންނަނީ މިހާރު ސްނެޕްޗެޓް ބޭނުންކުރަމުންނެވެ. އެގޮތުން ފޭސްބުކްގެ އާމްދަނީ މަޑުމަޑުން އަންނަނީ ތިރިވަމުންކަމަށް ދިރާސާކުރާ ފަރާތްތަކުން ބުނެއެވެ.
ފޭސްބުކްގެ ޔޫޒާސްގެ އަދަދު އެއް ބިލިއަނަށް އެރީ މީގެ ފަސް އަހަރު ކުރިންނެވެ.
