މާލޭގެ މަގުތަކުން ކުނި ނަގައިދިނުމަށް ކައުންސިލުން ވެމްކޯގައި އެދިއްޖެ
29 ޑިސެމްބަރު 2022 | ބުރާސްފަތި 12:38އެއްބަސްވުން ބާތިލްކުރުމާއެކު ވެމްކޯއިން ވަނީ އާންމު ތަންތަނުން ކުނި ނެގުން ހުއްޓާލާފައި
ވެމްކޯގެ މެނޭޖިންގ ޑިރެކްޓަރު ޔޫސުފް ސިރާޖު (ވ)
މާލެ ސާފުކުރުމުގެ މަސައްކަތާ މާލެ ސިޓީ ކައުންސިލުން ހަވާލުވިފަހުން، މާލޭގެ މަގުތައް ގޮނޑުވެ މަގުތަކުން ކުނި ނަގައިދިނުމަށް އެ ކައުންސިލުން ވެމްކޯގައި އެދިއްޖެއެވެ.
މާލެއާއި ވިލިމާލޭގެ މަގުތަކާއި ޕާކުތައް އަދި މައިޒާންތައް ކުނިކަހައި ސާފުކޮށް، ކުނި ނެގުމުގެ މަސައްކަތް ކުރުމަށް މާލެ ސިޓީ ކައުންސިލާއި ވެމްކޯއާ ދެމެދު ވެފައިވާ އެއްބަސްވުމުގެ މުއްދަތު މި މަހުގެ 25ށް ހަމަވުމާއެކު، ވެމްކޯއިން ވަނީ އެކުންފުނީގައި ރަޖިސްޓްރީ ނުކުރާ ގޭބީސީތަކުން ކުނި ނެގުން ހުއްޓާލާފައެވެ. މިއާއެކު މާލޭގެ މަގުތައް މައްޗަށް އެކި ފަރާތްތަކުން ކުނި ޖަމާކޮށް މަގުތައް ވަނީ އިންތިހާއަށް ގޮނޑުވެފައެވެ.
މިކަމާގުޅިގެން ވެމްކޯގެ ފަރާތުން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ވެމްކޯގެ މެނޭޖިންގ ޑިރެކްޓަރު (އެމްޑީ) ޔޫސުފް ސިރާޖު ވިދާޅުވީ، އެއްބަސްވުން އުވާލި ހިސާބުން އެކުންފުނިން ކުނި ނަގަމުންދަނީ ރަޖިސްޓްރީކޮށްފައިވާ ގޭބީސީތަކުން އެކަނި ކަމަށެވެ. އެ ގޭބީސީތަކުން ބޭރަށް ކުނި ނުނެރޭނެކަމުގެ ޔަގީންކަން ސިރާޖު ދެއްވިއެވެ.
އެހެންނަމަވެސް ރަޖިސްޓްރީ ނުކުރާ ފަރާތްތަކުން މާލޭގެ މަގުތައް މައްޗަށް ކުނި ނެރެމުންދާކަން ފާހަގަކުރައްވައި ސިރާޖު ވިދާޅުވީ، މާލޭގެ މަގުތައް ހަޑިވަމުންދާތީ ސިޓީ ކައުންސިލުން ވެމްކޯއަށް ސިޓީއެއް ފޮނުވާފައިވާކަމަށެވެ. 4 ގާނޫނަކާ ހަވާލާދީ މި ކުނިތައް ނެގުމަށް ވެމްކޯއަށް އަންގާފައިވާކަމަށާއި، އަދި ދައުވާކުރާނެކަމަށް ސިޓީ ކައުންސިލްގެ ސިޓީގައި ބަޔާންކޮށްފައިވާކަމަށް ސިރާޖު ވިދާޅުވިއެވެ.
ސިރާޖު ވިދާޅުވީ ވެމްކޯއިން މިހާތަނަށް ކުރި މަސައްކަތް ސިޓީ ކައުންސިލުން ވަރަށް ބޮޑަށް "އަންޑަރއެސްޓިމޭޓް" ކޮށްފައިވާކަމަށެވެ. މިހާތަނަށްް ވެމްކޯގެ މުވައްޒަފުން ރެއާއި ދުވާލު ކުރަމުންދިޔައީ ވަރަށް ބުރަ ބޮޑު މަސައްކަތެއްކަން މިއަދު ކައުންސިލަށް އެނގެމުންދާކަމަށާއި، އަދި ކައުންސިލަށް މިކަން ނުކުރެވޭނެކަަމަށް އަންގައިފިނަމަ ވެމްކޯއިން މި މަސައްކަތާ ހަވާލުވާން ތައްޔާރަށް ތިބި ކަމަށް ސިރާޖު ވިދާޅުވިއެވެ. ވެމްކޯގެ މުވައްޒަފުންވެސް ތިބީ މަސައްކަތް ފަށަން ތައްޔާރަށްކަމަށް ސިރާޖު ވިދާޅުވިއެވެ.
