ޕްރިމިއަރ ލީގުގައި އެންމެ އަވަހަށް 20 ލަނޑު ހަމަކުރި ކުޅުންތެރިއަކަށް ހާލާންޑް، ސިޓީ މޮޅު

އިނގިރޭސި ޕްރިމިއަރ ލީގުގައި އެންމެ އަވަހަށް 20 ލަނޑު ހަމަކުރި ކުޅުންތެރިއަކަށް މެންޗެސްޓަރ ސިޓީގެ ނޯވޭ ފޯވާޑް ހާލާންޑް ވެއްޖެއެވެ.

މިސީޒަންގައި ސިޓީއަށް ބަދަލުވެ ލީގުގެ ފުރަތަމަ 15 މެޗުން ހާލާންޑް ވަނީ 20 ގޯލް ހަމަކޮށްފައެވެ. 20 ގޯލް ހަމަކުރީ ވަރލްޑްކަޕަށްފަހު ސިޓީ ކުޅުނު ފުރަތަމަ މެޗުގައި ލީޑްސް ޔުނައިޓެޑް އަތުން 3-1 ން މޮޅުވި މެޗުގައެވެ. މެޗުގައި ސިޓީގެ ފަހު ދެ ލަނޑު ޖެހީ ހާލާންޑެވެ. ފުރަތަމަ ލަނޑު ފުރަތަމަ ހާފްގެ އިތުރު ވަގުތުގައި ޖެހީ ރޮޑްރީއެވެ. މެޗުގައި ހާލާންޑަށް ލަނޑު ޖަހަން ދެ ފަހަރުވެސް ފުރުޞަތު ތަނަވަސްކޮށްދިނީ އިނގިރޭސި މިޑްފީލްޑަރ ގްރީލިޝްއެވެ. ސިޓީގެ 16 ކުޅުންތެރިން ވަރލްޑްކަޕްގައި ޤައުމީ ޓީމަށް ކުޅުނުއިރު އެމުއްދަތުގައި ހާލާމްޑް ހުރީ ޗުއްޓީގައެވެ. އެއީ އޭނާގެ ގައުމު މުބާރާތަށް ކޮލިފައިނުވާތީއެވެ.

ލީޑްސް ޔުނއިޓެޑް އަތުން ހޯދި މޮޅާއެކު ސިޓީން ވަނީ އެއްވަނާގައި އޮތް އާސެނަލްއާ ދެމެދު އޮތް ފަރަގު ފަސް ޕޮއިންޓަށް ކުޑަކޮށްފައެވެ. 20 ލަނޑާއެކު ލީގުގެ ލަނޑު ލިސްޓްގެ ކުރީގައި އޮތީ ހާލާންޑެވެ. ލީޑްސް ޔުނައިޓެޑް އޮތީ ރެލިގޭޝަނަށްވުރެ ދެ ޕޮއިންޓް ދުރުގައެވެ.