ކުވައިތު ފަންޑުގެ ދަށުން އިމާރާތްކުރާ ހޮސްޕިޓަލުތަކުގެ މަސައްކަތްކުރާނެ ބަޔަކު ހޯދަން އަނެއްކާވެސް އިއުލާނުކޮށްފި
29 ޑިސެމްބަރު 2022 | ބުރާސްފަތި 02:15ބިޑު ހުޅުވުން އޮންނާނީ 19 ޖަނަވަރީ 2023 ވާ ބުރާސްފަތި ދުވަހުގެ 13:00ގައި
ކުޅުދުއްފުށި ރީޖަނަލް ހޮސްޕިޓަލް
ކުވެއިތް ފަންޑް ފޯރ އަރަބް އިކޮނޮމިކް ޑިވެލޮޕްމަންޓް (ކޭ.އެފް.އޭ.އީ.ޑީ)ގެ އެހީގެ ދަށުން އިމާރާތްކުރާ 30 އެނދުގެ 7 ހޮސްޕިޓަލު އިމާރާތްކުރާނެ ފަރާތެއް ހޯދުމަށް އަނެއްކާވެސް ފިނޭންސް މިނިސްޓްރީން އިއުލާންކޮށްފިއެވެ.
7 ހޮސްޕިޓަލް އެޅުމަށް އެންމެ ފުރަތަމަ ފިނޭންސް މިނިސްޓްރީން އިއުލާންކުރީ މިއަހަރުގެ އޭޕްރީލް މަހުއެވެ. އޭގެފަހުން އަނެއްކާވެސް 7 ހޮސްޕިޓަލް އެޅުމަށް ބޭނުންވާ ފަރާތްތަކަށް އެފުރުސަތު އަންނަ ޖެނުއަރީ މަހުގެ 17 ވަނަ ދުވަހާ ހަމައަށް ވަނީ ހުޅުވާލާފައެވެ. މި ބީލަމުގައި ބައިވެރިވުމަށް -/1500 ރުފިޔާ (ފަސް ސަތޭކަ ރުފިޔާ) ގެ ނޮން-ރިފަންޑަބަލް ރަޖިސްޓްރޭޝަން ފީއެއް ދައްކަންޖެހޭނެއެވެ. ފައިސާ ބަލައިގަންނާނީ 28 ޑިސެންބަރު 2022 އިން 17 ޖަނަވަރީ 2023 އަށް، ބަންދު ނޫން ކޮންމެ ދުވަހެއްގެ 8:00 އިން 14:00 އަށް އެ މިނިސްޓްރީގެ އޮންލައިން ޕޭމަންޓް ޕޯޓަލް - ބަނޑޭރި ޕޭ މެދުވެރިކޮށްކަމަށް ފިނޭންސް މިނިސްޓްރީން ބުނެއެވެ.
ބިޑު ހުޅުވުން އޮންނާނީ 19 ޖަނަވަރީ 2023 ވާ ބުރާސްފަތި ދުވަހުގެ 13:00ގައެވެ.
30 އެނދުގެ ހޮސްޕިޓަލް އެޅުމަށް ހަމަޖެހިފައިވާ ރަށްތަކަކީ:
- ހދ.ހަނިމާދޫ
- ށ.މިލަންދޫ
- ނ.ވެލިދޫ
- ކ.ތުލުސްދޫ
- އދ.މާމިގިލީ
- ވ.ފެލިދޫ
- ތ.ވިލުފުށީ
މިޕްރޮޖެކްޓްގެ ބިޑް ސެކިޔުރިޓީގެ ގޮތުގައި ހުށަހަޅަން ޖެހެނީ 35،000 ޔޫއެެސް ޑޮލަރު ނުވަތަ އެއާ އެއްވަރުގެ އަދަދެއްގެ ދިވެހި ރުފިޔާއެވެ.
30 އެނދުގެ 7 ހޮސްޕިޓަލް އެޅުމަށް ބަޔަކު ހޯދުމަށް އިއުލާންކޮށްފައިވާއިރު ހަތް ރަށެއްގައި ސިއްހީ މަރުކަޒު އަޅާނެ ބަޔަކު ހޯދުމަށްވެސް ވަނީ އިއުލާންކޮށްފައެވެ.
