ނިޝާމާގެ ހަށިގަނޑު ރާއްޖެ ގެނެސް ޖަނާޒާ ބާއްވައިފި
24 ޑިސެމްބަރު 2022 | ހޮނިހިރު 17:29ނިޝާމާގެ ހަށިގަނޑު ޕޯސްޓްމޯޓަމް ހެދުމަށް އިންޑިޔާއަށް ފޮނުވީ ޑިސެމްބަރ 21 ވަނަ ދުވަހު
ނިޝާމާ މުހައްމަދު
ހދ. ނޮޅިވަރަމުގައި މަރުވެފައި އޮއްވާ ފެނުނު ނިޝާމާ މުހައްމަދުގެ ހަށިގަނޑު ޕޯސްޓްމޯޓަމް ހެދުމަށްފަހު ރާއްޖެ ގެނެސް ޖަނާޒާ ބާއްވައިފިއެވެ.
ނިޝާމާގެ ހަށިގަނޑު ޕޯސްޓްމޯޓަމް ހެދުމަށް އިންޑިޔާއަށް ފޮނުވީ ޑިސެމްބަރ 21 ވަނަ ދުވަހުއެވެ. އެއީ އޭނާ މަރުވިތާ 10 ދުވަސްފަހުންނެވެ. ނިޝާމާ މަރުވެފައި އޮއްވާ ފެނުނީ މިމަހުގެ 10 ވަނަ ދުވަހުއެވެ. އޭނާގެ ހަށިގަނޑު އެރޭގެ ވަގުތެއްގައި ވަނީ ކުޅުދުއްފުއްޓަށް ގެންގޮސްފައެވެ. އަދި ހަށިގަނޑު މާލެ ގެނެސްފައިވަނީ މި ހިނގާ ޑިސެމްބަރު މަހުގެ 12 ވަނަ ދުވަހެވެ. ނިޝާމާގެ ހަށިގަނޑުގެ ޕޯސްޓްމޯޓަމް ހެދުމަށް ތަހުގީގު ޓީމުން ނިންމާފައިވާކަން ފުލުހުން ހާމަކުރީ އާއިލާއާއެކު ފުލުހުން ކުރި މަޝްވަރާތަކަށް ފަހުގައެވެ. އާއިލާއިން ޕޯސްޓްމޯޓަމް ހެދުމަށް ދެކޮޅުވެސް ހެދިއެވެ.
ޕޯސްޓްމޯޓަމަށް ފަހު ނިޝާމާގެ ހަށިގަނޑު މާލެ ގެނައީ ޑިސެމްބަރ 24 ވީ ހޮނިހިރު ދުވަހުއެވެ. އަދި ނިޝާމާގެ ޖަނާޒާ ވަނީ ހޮނިހިރު ދުވަހުގެ މަޣްރިބް ނަމާދަށްފަހު ބާއްވާފައެވެ.
ނިޝާމާ މަރުވެފައި އޮއްވާ ފެނުނީ އޭނާ ދިރިއުޅޭ ގޭގެ ކޮޓަރީގައެވެ. ނިޝާމާގެ މަރާގުޅިގެން އޭނާގެ ފިރިމީހާ، އދ. ފެންފުށީ ރޯޒީ ވިލާ އުމުރުން 32 އަހަރުގެ އަބޫބަކުރު ފައިސަލް، ފުލުހުންގެ ބެލުމުގެ ދަށަށް ގެންގޮސް، އޭނާ 15 ދުވަހަށް ބަންދުކޮށްފައި ވަނިކޮށް ވަނީ އަމިއްލައަށް ދަންޖެހެން މަސައްކަތް ކޮށްފައެވެ. އޭނާ މަރުވީ ހާލު ސީރިއަސްވެ، ހޮސްޕިޓަލުގައި ފަރުވާދެމުން ދަނިކޮށް ޑިސެމްބަރ 19 ވަނަ ދުވަހުއެވެ.
ނިޝާމާގެ ހަށިގަނޑުން ޒަހަމްތަކެއް ފެންނަން ހުރުމާއި އެހެން ބައެއް ސަބަބުތަކާއި ހުރެ އޭނާގެ މަރާއި ގުޅިގެން ފިރިމީހާ އަށް ވަނީ ތުހުމަތުތަކެއްކޮށްފައެވެ.
