ކާމިޔާބު ވޯލްޑް ކަޕަކަށްފަހު ފީފާގެ ރައީސް އިންފަންޓީނޯ ރާއްޖެ ވަޑައިގެންފި

ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ރައީސް ޖިއާނީ އިންފަންޓީނޯ ރާއްޖެ ވަޑައިގަންނަވައިފިއެވެ.

މައުލޫމާތު ލިބިފައިވާ ގޮތުގައި އިންފަންޓީނޯ ރާއްޖެ ވަޑައިގެންފައި ވަނީ ހޮނިހިރު ދުވަހުގެ މެންދުރު ފަހުއެވެ. އިންފަންޓީނޯ ރާއްޖެ ވަޑައިގެންނެވީ އާއިލާއާ ވެސް އެކުގައެވެ. ޗުއްޓީ ހޭދަކުރެއްވުމަށް އިންފަންޓީނޯ ރާއްޖެ ވަޑައިގެންނެވީ ޤަތަރުގައި ކުރިއަށް ދިޔަ ފީފާ ވޯލްޑް ކަޕް މުބާރާތަށް ފަހުއެވެ. މިއަހަރުގެ ވޯލްޑް ކަޕް މުބާރާތަކީ ތާރީޚުގައި ވެސް މިހާތަނަށް ބޭއްވުނު އެންމެ ފުރިހަމަ އަދި އެންމެ ކާމިޔާބު ވޯލްޑް ކަޕް މުބާރާތް ކަަމަށް އިންފަންޓީނޯ ވަނީ ވިދާޅުވެފައެވެ. އަދި ވޯލްޑް ކަޕް މުބާރާތުގެ މެޗުތައް ބައްލަވާލެއްވުމަށް ވެސް އިންފަންޓީނޯ ވަނީ ސްޓޭޑިއަމްތަކަށް ވަޑައިގެންފައެވެ.

މިއަހަރުގެ ވޯލްޑް ކަޕް މުބާރާތާ ގުޅިގެން ހުޅަނގުގެ ބައެއް ޤައުމުތަކުގެ ނުރުހުމާއި ފާޑުކިޔުން ޤަތަރަށް އަމާޒުވަމުން ދިޔަ ވަގުތެއްގައި، އިންފަންޓީނޯ ވަނީ ޤަތަރުގެ ދިފާއުގައި ނުކުންނަވާފައެވެ. އެކަމާ ގުޅިގެން އިންފަންޓީނޯ ވަނީ ދޮޅު ގަޑިއިރަކަށް ދެމިގެން ދިޔަ ނޫސްވެރިންގެ ބައްދަލުވުމުގައި ޔޫރަޕުގެ ޤައުމުތަކަށް ބަހުގެ ހަމަލާތަކެއް ވެސް ފޮނުއްވާފައެވެ. އިންފަންޓީނޯ ފާހަގަވެގެން ގޮސްފައިވަނީ ޖެހިލުން ކުޑަ ޝަޚުސިއްޔަތެއްގެ ގޮތުގައެވެ.

ޤަތަރުގައި ނިމުނު ވޯލްޑް ކަަޕަށް ފަހު އެކި ޤައުމުތަކުގެ ކުޅުންތެރިން އަންނަނީ ރާއްޖެ އަންނަމުންނެވެ. އެގޮތުން ކްރޮއޭޝިއާގެ ކެޕްޓަން ލޫކާ މޮޑްރިޗާއި، ބްރެޒިލްގެ ކެޕްޓަން ތިއާގޯ ސިލްވާގެ އިތުރުން އުރުގުއޭގެ ފޯވާޑް ލުއިސް ސުއަރޭޒް ވެސް ވަނީ ރާއްޖޭގައި ޗުއްޓީ ހޭދަކޮށްފައެވެ.

އިންފަންޓީނޯ ރާއްޖެ ވަޑައިގެންފައިވާއިރު، މިއީ އޭނާ ރާއްޖެއަށް ކުރެއްވި ފުރަތަމަ ދަތުރެވެ. މިއީ ފީފާގެ ރައީސަކު ރާއްޖެ ވަޑައިގެންނެވި ދެ ވަނަ ފަހަރެވެ. ކުރިން ފީފާގެ ރައީސްކަމުގައި ހުންނެވި ސެޓް ބްލެޓާ ވެސް ވަނީ ރާއްޖެ ވަޑައިގެންފައެވެ.