ޔުނައިޓެޑުގެ މުހިންމު ހަތަރު ކުޅުންތެރިޔެއްގެ އެއްބަސްވުން އައު ކުރަނީ

މެންޗެސްޓާ ޔުނައިޓެޑުގެ މުހިންމު ހަތަރު ކުޅުންތެރިއެއްގެ އެއްބަސްވުން އިތުރު އެއް އަހަރަށް އައު ކުރުމަށް ނިންމާފައިވާކަމަށް އެ ޓީމުގެ ކޯޗު އެރިކް ޓެން ހާގް ބުނެފިއެވެ.

އެއްބަސްވުން އައު ކުރުމަށް ހަމަޖެހިފައިވަނީ ފުރަތަމަ 11 އިން އާންމުކޮށް ފެންނަ ހަތަރު ކުޅުންތެރިން ކަމަށްވާ މާކަސް ރަޝްފޯޑާއި، ލޫކް ޝޯއާއި، ޑިއެގޯ ޑެލޮޓްގެ އިތުރުން ފްރެޑެވެ. މި ހަތަރު ކުޅުންތެރިންގެ އެއްބަސްވުންވެސް ހަމަވަނީ އަންނަ އަހަރުގެ ހޫނު މޫސުމަށެވެ. ހަތަރު ކުޅުންތެރިންގެ އެއްބަސްވުން އައު ކުރާ ވާހަކަ ޓެން ހާގް ބުނެފައިވަނީ ވޯލްޑް ކަޕަށްފަހު ކުޅޭ ޕްރިމިއާ ލީގުގެ ފުރަތަމަ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައެވެ.

މި ނޫސްވެރިންގެ ބައްދަލުވުމުގައި ވާހަކަދައްކަމުން ޓެން ހާގް ބުނެފައިވަނީ ޓީމު މިހާރު ދަނީ ރަނގަޅު މިސްރާބަކަށްކަމަށެވެ. އޭނާ ބުނީ ޔުނައިޓެޑު އެ މިސްރާބަށް ދިޔުމުގައި އެ ހަތަރު ކުޅުންތެރިންގެ ވެސް ހިއްސާ ބޮޑުކަމަށެވެ. އަދި ޓެން ހާގްގެ ޕްލޭންގައި އެ ހަތަރު ކުޅުންތެރިން ހިމެނޭކަމަށެވެ.

ވޯލްޑް ކަޕަށް ދިއުމުގެ ކުރިން ހަތަރު ކުޅުންތެރިންވެސް ވަނީ މެންޗެސްޓަރ ޔުނައިޓެޑުގައި މުހިންމު ދައުރެއް އަދާކޮށްފައެވެ. ވޯލްޑް ކަޕަށްފަހު މެންޗެސްޓަރ ޔުނައިޓެޑުން ޕްރިމިއާ ލީގުގައި ފުރަތަމަ ބައްދަލުކުރާނީ ނޮޓިންހަމް ފޮރެސްޓާއެވެ. މި މެޗު ކުޅޭނީ ބުދަ ދުވަހު ރާއްޖެ ގަޑިން ދަންވަރު 01:00ގަ އެވެ.

މި ސީޒަނުގެ ޕްރިމިއާ ލީގުގައި ޔުނައިޓެޑުން އަންނަނީ ފަހަކަށް އައިސް ރަނގަޅު ނަތީޖާތަކެއް ނެރެމުންނެވެ. އެގޮތުން ޔުނައިޓެޑުން ވަނީ މިހާތަނަށް ކުޅުނު 14 މެޗުން 26 ޕޮއިންޓު ހޯދާފައެވެ. އެ ޓީމުން އޮތީ ލީގު ތާވަލުގެ ފަސްވަނައިގައެވެ.