އީސީގެ ސެކިޔުރިޓީ ރޫމާއި ގުދަނެއް ފަޅާލައި، ވައްކަންކޮށްފި
އަރަބިއްޔާގެ ބައު އިމާރާތުން 11 ޔޫޕީއެސްއާއި 65 އިންޗީގެ ދެ ޓީވީއާއި 2 ސްޕީކަރު ސެޓާއި 10 މީޓަރުގެ ކަރަންޓު އެކްސްޓެންޝަން ބޯޑެއް ގެންގޮސްފައިވޭ
އިންތިޚާބާ ބެހޭ މަރުކަޒު
އިލެކްޝަންސް ކޮމިޝަން(އީސީ)ގެ ސެކިޔުރިޓީ ރޫމަށް އިމާރާތުގެ ބޭރުން ވަދެ ފަޅާލައި، އަރަބިއްޔާ ސްކޫލްގެ ބައު އިމާރާތުގައި ހުންނަ އީސީގެ ގުދަނެއް ފަޅާލުމުގެ މައްސަލަ ފުލުހުން ބަލަން ފަށައިފިއެވެ.
މިކަމާގުޅިގެން އީސީން ބުނީ، އީސީގެ ސެކިޔުރިޓީ ރޫމް ފަޅާލާފައިވަނީ ނޮވެމްބަރ 30 ވަނަ ދުވަހު ކަމަށާއި، އަރަބިއްޔާގައި ހުންނަ އީސީގެ ގުދަން ފަޅާލީ ޑިސެމްބަރ 10 ވަނަ ދުވަހުކަމަށެވެ. މިދެ މައްސަލަ ފުލުހުންނަށް ހުށަހަޅާފައިވާއިރު އެކަން ފުލުހުން އަންނަނީ ބަލަމުންކަމަށް އީސީން ބުނެއެވެ.
ސެކިޔުރިޓީ ރޫމް ފަޅާލިއިރު އެތަނުގައި އެއްވެސް އިންތިޚާބަކާ ގުޅުންހުރި ލިޔެކިޔުމެއް، އަދި އިންތިޚާބަކާއި ގުޅުންހުރި އެއްވެސް މަސައްކަތެއް ކުރިޔަށްނުދާކަމަށް އީސީން ބުނެއެވެ. ނަމަވެސް ނިމިދިޔަ ލޯކަލް ކައުންސިލް އިންތިޚާބުގައި ބޭނުންކޮށްފައިވާ 5 ނެޓްބުކް ގެއްލިފައިވުމުގެ އިތުރުން، އެތަނުގައި ހުރި އެއްވެސް އެއްޗެއް އަޅާފައިނުވާ ބައު ތިޖޫރީއަކަށް ގެއްލުންދީފައިވާކަމަށް އީސީން ބުނެއެވެ.
އަރަބިއްޔާގެ ބައު އިމާރާތުން 11 ޔޫޕީއެސްއާއި 65 އިންޗީގެ ދެ ޓީވީއާއި 2 ސްޕީކަރު ސެޓާއި 10 މީޓަރުގެ ކަރަންޓު އެކްސްޓެންޝަން ބޯޑެއް ގެންގޮސްފައިވާކަމަށް އީސީން ބުނެއެވެ. މިދެ ހާދިސާއާ ގުޅިގެން މިހާރު ބޭއްވުމަށް ހަމަޖެހިފައިވާ ބައި އިލެކްޝަންތަކަށް އެއްވެސް އަސަރެއް ނުކުރާނެކަމަށް އީސީން ބުނެއެވެ.
އީސީން ބުނީ މީގެކުރިން ހިނގާފައިވާ މިފަދަ ހާދިސާތަކާއި، އަދި މި ދެ ހާދިސާއާ ގުޅިގެން ކޮމިޝަނުން ފުލުހުންގެ ޚިދުމަތާ ބައްދަލުކޮށް ކުރިޔަށް އޮތްތަނުގައި މިފަދަ ހާދިސާއެއް ތަކުރާރުނުވާނެހެން އަޅަންޖެހޭ ފިޔަވަޅުތަކާމެދު ވަނީ މަޝްވަރާކުރެވިފައިކަމަށެވެ.
އަދި މި ހާދިސާތަކާ ގުޅިގެން ކުރިޔަށް ހުރި އިންތިޚާބުތަކުގެ ސަލާމަތާއި ރައްކާތެރިކަން ކަށަވަރުކުރުމުގެ ގޮތުން، ކޮމިޝަންގެ މަސައްކަތްތައް ހިނގާ އިމާރާތްތަކުގެ ސެކިޔުރިޓީ ކަންކަންކަމާ ގުޅުންހުރި މުއައްސަސާތަކާ ގުޅިގެން، ސެކިޔުރިޓީ ވަރުގަދަކުރުމަށް ކޮމިޝަނުން ކުރަންޖެހޭ ހުރިހާ މަސައްކަތެއް ކުރަމުންދާނެކަމަށް އީސީން ބުނެއެވެ.
