ބުރިޖުގެ މަސައްކަތަށް ބަދަލެއް ނާދޭ، އަލިފާނުގެ ހާދިސާއާއި ގުޅިގެން ކުރާނެ އަސަރު ދަނީ ބަލަމުން - ޕްލޭނިންގ މިނިސްޓްރީ
މިހާރުވެސް އެކި މަރުހަލާތަކުގައި މަސައްކަތްތައް ކުރިއަށްދޭ
ބްރިޖް މަސައްކަތް ހިނގާގޮތް ޖޮއިންޓް ކޮމިޓީން ބަލަނީ
ބުރިޖުގެ މަސައްކަތް ކުރާ މުވައްޒަފުންގެ ގުޅީފަޅުގައި ހުންނަ އެކަމަޑޭޝަންގައި ރޯވި ނަމަވެސް، ބުރިޖުގެ މަސައްކަތަށް ބަދަލެއް ނާންނަ ކަމަށާއި، ނަމަވެސް ހާދިސައާއި ގުޅިގެން އަންނާނެ އިމްޕެކްޓް ބަލަމުން އަންނަ ކަމަށް ޕްލޭނިންގ މިނިސްޓްރީން ބުނެފިއެވެ.
ބުރިޖުގެ މަސައްކަތާއި ގުޅޭގޮތުން، ރާއްޖެ އެމްވީއަށް މައުލޫމާތު ދެއްވަމުން ޕްލޭނިންގ މިނިސްޓްރީގެ އޮފިޝަލަކު ވިދާުޅުވީ ބުރިޖުގެ މަސައްކަތް ނުހުއްޓި ކުރިއަށްދާ ކަމަށެވެ. މިހާރުވެސް އެކި މަރުހަލާތަކުގައި މަސައްކަތްތައް ކުރިއަށްދާ ކަމަށެވެ. އޮފިޝަލް ވިދާޅުވީ ގުޅިފަޅުގައި ހުންނަ އެފްކޮންސްގެ މުވައްޒަފުންގެ އެކޮމަޑޭޝަންގައި ހިނގައިދިޔަ އަލިފާނުގެ ހާދިސާއާއި ގުޅިގެން މަސައްކަތަށް އެއްވެސް ކަހަލަ އަސަރެއް ކުރާނެތޯ ބަލަމުން އަންނަ ކަމަށާއި، މި ހަފްތާ ތެރޭގައި އެކަން ދެނެގަނެވޭނެ ކަމަށެވެ.
އޭނާ ވިދާޅުވީ މުވައްޒަފުންގެ އެކަމަޑޭޝަންގައި ހިނގައިދިޔަ އަލިފާނުގެ ހާދިސާއާއި ގުޅިގެން އެ މުވައްޒަފުންނަށް ބޯހިޔާވަހިކަން ހަމަޖައްސަމުން ދާކަމަށެވެ. އެގޮތުން ހުޅުމާލެއިންނާއި، އަދި އެޗްޑީސީގެ ފަރާތުން ގުޅިފަޅުން ވެސް އެކޮމަޑޭޝަންގެ ކަންކަން ހަމަޖައްސަމުންދާ ކަމަށެވެ.
ބްރިޖުގެ ތަނބުތަކުގެ ތެރެއިން އެއްގަމުގައި ޖަހާ ފުރަތަމަ ތަނބު ވަނީ ޖަހާފައެވެ. މިތަނބު ޖެހީ މާލޭގެ އިންޑަސްޓްރިއަލް ވިލެޖު ސަރަހައްދުގައެވެ. ތިލަމާލެ ބުރިޖްގެ މަސައްކަތް އެންމެ ފުރަތަމަ ފެށީ މާލެ ކޮޅުންނެވެ. އެ މަޝްރޫއުގެ ފުރަތަމަ ފިޔަވަހީގައި ގުޅާލާނީ މާލެ އާއި ވިލިމާލެ އެވެ. އެ މަސައްކަތް އަންނަ އަހަރު ނިމޭނެ ކަމަށް ސަރުކާރުން ބުނެއެވެ. ތިލަފުއްޓާއި ގުޅިފަޅު ގުޅާލައި މުޅި ބްރިޖުގެ މަސައްކަތް އެއްކޮށް ނިންމާލެވޭނީ 2024 ގައި ކަމަށް ސަރުކާރުން ބުނެއެވެ.
މާލެއާއި، ވިލިމާލެ އަދި ގުޅީފަޅާއި ތިލަފުށި ގުޅުވާ ބުރިޖުގެ އެއްބަސްވުމުގައި ސޮއިކޮށްފައިވަނީ މިދިޔަ އަހަރުގެ އޮގަސްޓު މަހުގެ 26 ވަނަ ދުވަހުއެވެ. މިއީ 6.7 ކިލޯމީޓަރުގެ ބުރިޖެކެވެ. މި މަޝްރޫއުގެ ދަށުން ގުޅިފައިވާ 3 ބުރިޖް ހިމެނެއެވެ. އެއީ މާލެއިން ވިލިމާލެ ގުޅުވާ ބުރިޖާއި، ވިލިމާލެއިން ގުޅީފަޅަށް އަދި ގުޅީފަޅުން ތިލަފުއްޓަށް އަޅާ ބުރިޖެވެ.
3 ބްރިޖު ގުޅާލަދޭ މަގުތަކާއެކު، 6.7 ކިލޯމީޓަރަށް މި ބްރިޖު ދެމިގެންދާނެއެވެ. ހަމައެކަނި، މާލެއާއި ވިލިމާލެ ގުޅާލަދޭ ފުރަތަމަ ބްރިޖުގެ ދިގުމިން ވެސް، މިވަގުތު ފެންނާން އޮތް ބްރިޖަށްވުރެ ދިގުވާނެއެވެ. އެއީ ގާތްގަނޑަކަށް 1.3 ކިލޯމީޓަރުގެ ދިގު ބްރިޖެކެވެ. އެހެންކަމުން، ރައީސް ސާލިހުގެ ސަރުކާރުން އެ މަޝްރޫއެއްގެ މަސައްކަތް ދެ އަހަރުގެ ތެރޭގައި ނިންމަން އަމާޒު ހިފައިފައިވާ މި ބިޔަބޮޑު މަޝްރޫއު ވެގެންދާނީ، ރާއްޖޭގެ ތާރީޚުގައި ފެނިގެންދާނެ އެންމެ ބޮޑު މަޝްރޫއަށެވެ.
