މާލޭގެ މަގުތަކާއި މައިދާންތައް ފޮޅައި ސާފުކުރުމަށް ސިޓީ ކައުންސިލުން ވެމްކޯއާއެކު ވެފައިވާ އެއްބަސްވުން އުވާލީ އިދިކޮޅު ޕާޓީގެ ކުދިންކޮޅަށް ވަޒީފާ ނުދެވިގެން ކަމަށް، އެންވަޔަރަމަންޓް މިނިސްޓްރީގެ ސްޓޭޓް މިނިސްޓަރު އަލީ ސޯލިހު ވިދާޅުވެއްޖެއެވެ.

މާލެ ސިޓީގެ މަގުތައް ފޮޅައި ސާފުކުރުމަށް ސިޓީ ކައުންސިލާ ވޭސްޓް މެނޭޖްމަންޓް ކޯޕަރޭޝަން (ވެމްކޯ)އާ ދެމެދު ވެފައިވާ އެއްބަސްވުން އާނުކުރަން ނިންމިކަން ރަސްމީކޮށް އަދިވެސް ނާންގާކަމަށް ވެމްކޯއިން ވަނީ ބުނެފައެވެ. މި މަހުގެ 26ގެ ފަހުން މާލެއާއި ވިލިމާލޭގެ އާންމު ތަންތަނުން ސިޓީ ކައުންސިލުން އަމިއްލައަށް ކުނި ނަގަން ނިންމައި، ވެމްކޯއާއެކު ވެފައިވާ އެއްބަސްވުން އައުނުކުރުމަށް އެ ކައުންސިލުން ވަނީ ފާސްކޮށްފައެވެ. ސިޓީ ކައުންސިލުން މިގޮތަށް ފާސްކޮށްފައިވަނީ އެ ކައުންސިލްގެ ބައްދަލުވުމެއްގައެވެ. މިކަމާގުޅިގެން ރާއްޖެ ޓީވީގެ ފަލަސުރުޚީ ޕްރޮގްރާމުގައި އަލީ ސޯލިހު ވިދާޅުވީ، މާލޭގެ މަގުތަކާއި މައިދާންތައް ސާފުކުރުމާއި ކުނި އުކުމުގެ މަސައްކަތް ކުރިންވެސް ވެމްކޯއިން ކުރަމުން ގެންދިޔައީ މާލެ ސިޓީ ކައުންސިލާއެކު ވެފައިވާ އެއްބަސްވުމުގެ ތެރެއިން ކަމަށެވެ. ނަމަވެސް އެއްބަސްވުން އައުނުކުރާ ވާހަކަ ދައްކަނީ މީޑިއާތަކުގައިކަމަށާއި، ރަސްމީ މުއާމަލާތްތަކެއް ސިޓީ ކައުންސިލުން ނުކުރާކަމަށެވެ.

އަލީ ސޯލިހު ވިދާޅުވީ، މިއީ ސިޔާސީގޮތުން ކުރާކަމެއް ކަމަށާއި، މާލެ ސިޓީ ކައުންސިލް ހިންގަވަން ތިއްބެވި ބޭފުޅުންނަކީ ސަރުކާރު ހިންގާ ޕާޓީ ނޫން ޕާޓީއަށް ނިސްބަތްވާ މެންބަރުން ތިބި ތަނެއް ކަމުން، އެގޮތަށް ކަންކަން ކުރަމުން ގެންދާ ކަމަށެވެ. އަދި އެބޭފުޅުން ވެރިކަމުގައި ތިއްބެވިއިރު، އަދި މާލެ ސިޓީ ކައުންސިލުގައި އެމްޑީޕީގެ މެޖޯރިޓީ އޮތްއިރު މަސައްކަތެއް ކުރެވޭނެ އެއްވެސް މަގެއް އޭރުވެސް ނުދައްކާކަމަށެވެ.

އަލީ ސޯލިހު ވިދާޅުވީ މިއަދު ސަރުކާރުން ލާމަރުކަޒީގޮތުން ރާއްޖެ ހިންގަމުންދާ މިންވަރު ފެންނަމުން އެބަ ދާކަމަށާއި، ސިޓީ ކައުންސިލުން ކުރަން ބޭނުންވާ ކަންކަން ކުރުމުގައި ސަރުކާރުން ހުރަސްނާޅާކަމަށެވެ. އެހެންނަމަވެސް މިއީ ރައްޔިތުންނާ ގުޅުންހުރި ކަންކަން ކަމަށާއި، މަޝްވަރާކޮށްގެން މިކަންކަން ކުރިއަށް ގެންދަން ޖެހޭ ކަމަށެވެ.

މި މައްސަލައާ ގުޅޭގޮތުން ވެމްކޯގެ މެނޭޖިންގ ޑިރެކްޓަރު ޔޫސުފް ސިރާޖު ވިދާޅުވީ، މާލޭގެ މަގުތަކަށް އަޅާފައި ހުންނަ ކުނި ނުނަގާކަމަށް ބުނެ ސިޓީ ކައުންސިލުން އެއްބަސްވުން ބާތިލްކުރާނެކަމަށް މީގެ ކުރިން އެތައްފަހަރަކު ވިދާޅުވެފައިވާކަމަށެވެ. ނަމަވެސް މާލެ ފޮޅައި ސާފުކުރާ މީހުންނަކީ ގޭގެއިން މަގުތަކަށް ނެރޭ އަދި އުކާލާ ކުނި ނަގާ މީހުން ނޫންކަމަށާއި، ސިޓީ ކައުންސިލާއެކު ވެފައިވާ އެއްބަސްވުމުގައި އޮންނާނީ މާލޭގެ މަގުތަކާއި އާންމު ތަންތަން ފޮޅައި ސާފުކުރުން ކަމަށެވެ.

އަދި އެއްބަސްވުން ބާތިލްކުރަން ސިޓީ ކައުންސިލުން ނިންމީ ސިޔާސީ ބޭނުމަކަށް ކަމަށާއި، ސިޓީ ކައުންސިލުން މިހާތަނަށް އައިއިރުވެސް އެއްބަސްވުން އައުނުކުރާނެކަން ރަސްމީ ސިފައެއްގައި އަންގާފައި ނުވާކަމަށެވެ. އަދި އެ މައުލޫމާތު ލިބިފައިވަނީ ނޫސްތަކުން ކަމަށާއި، 200 އެތައް މުވައްޒަފުންގެ ވަޒީފާ ގެއްލިގެންދާއިރު މިއީ ސިޓީ ކައުންސިލުން ޒިންމާދާރުކަން ކުޑަގޮތަކަށް ކޮށްފައިވާ ކަމެއް ކަމަށް ސިރާޖު ވިދާޅުވިއެވެ.

ސިރާޖު ވިދާޅުވީ 200 އެއްހާ މުވައްޒަފުން ނަގައިގެން މާލެ ފޮޅާ ސާފުކުރުމުގެ މަސައްކަތް ސިޓީ ކައުންސިލުން ކުރަމުން އަންނައިރު، އެ މުވައްޒަފުން ސިޓީ ކައުންސިލުން ބޭނުންކުރާނެ ކަމެއް ނުވަތަ ނޫންކަމެއްވެސް އަންގާފައި ނުވެއެވެ. ސިޓީ ކައުންސިލުން ބުނެފައިވަނީ ފޮޅައި ސާފުކުރާނީ ކައުންސިލްގެ މުވައްޒަފުން ކަމަށެވެ. ސިޓީ ކައުންސިލުން މާލޭގެ ބައެއް އާންމު ތަންތަން ސާފުކުރަނީ ބިދޭސީން ލައްވައެވެ. ނަމަވެސް ސިޓީ ކައުންސިލާއި ވެމްކޯއާ ދެމެދުވެފައިވާ އެއްބަސްވުމުގެ ދަށުން، ވެމްކޯއިން ގެންގުޅެނީ މި މަސައްކަތް ކުރުމަށް 100 އިންސައްތަ ދިވެހިންނެވެ.

ސިރާޖު ވިދާޅުވީ މުވައްޒަފުންގެ ވަޒީފާ ގެއްލިގެންދާތީ ކަންބޮޑުވާ ކަމަށާއި، ނަމަވެސް ސިޓީ ކައުންސިލުން އެކަމުގައި ވާހަކަދައްކަން ބޭނުން ނުވާ ކަމަށެވެ. ވެމްކޯއިން އެ ހުރިހާ މުވައްޒަފުންނަށް ދާއިމީ ވަޒީފާއެއް ނުދެވޭނެކަމަށާއި، އެހެންކަމުން މި މައްސަލާގައި ސަރުކާރުގެ ޕޮލިސީ ލެވެލްގައި ގޮތެއް ނިންމަންޖެހޭނެކަމަށް ސިރާޖު ވިދާޅުވިއެވެ.