ޗިކާގޯ ފަރ ފެސްޓިވަލަށް ގިނަ ބައެއްގެ މަޤްބޫލުކަން

ޗިކާގޯގައި ކުރިއަށްދިޔަ ފަރ ފެސްޓިވަލަށް ގިނަ ބައެއްގެ މަޤްބޫލުކަން މިވަނީ ލިބިފައެވެ.

ޗިކާގޯގެ މެދުތެރޭ ހުޅަނގުގެ ސަރަޙައްދެއްކަމަށްވާ ރޯސްމައުންޓުގައި މި ފެސްޓިވަލް ކުރިއަށް ގެންގޮސްފައިވާއިރު، އެތައް ހާސް ބަޔަކު ވަނީ ފެސްޓިވަލް ބަލާލުމަށް އެތަނަށް އެއްވެފައެވެ.

އެކި ޖަނަވާރުންނާއި އެފަދަ ކެރެކްޓަރތައް ދައްކުވައިދޭ ގޮތަށް ކުރިއަށްދާ މި ފެސްޓިވަލަކީ ދުނިޔޭގައި ބާއްވާ މިފަދަ އެންމެ ބޮޑު ފެސްޓިވަލްކަމަށް އެކަން އިންތިޒާމުކުރާ ފަރާތްތަކުން ބުނެއެވެ.

ހަތަރު ދުވަހަށް ކުރިއަށްދާ މި ޙަރަކާތް ނިންމާލާފައިވަނީ އާދިއްތަ ދުވަހުއެވެ. އެގޮތުން ޕޮކެމަން ފަދަ މަޝްހޫރު ކާޓޫން ކެރެކްޓަރތައްވެސް ވަނީ ފެސްޓިވަލްގެ ތެރެއިން ދައްކާލާފައެވެ.

 މިޑްވެސްޓް ފަރފެސްޓް 2022 ގެ އެސިސްޓެންޓް ޑިރެކްޓަރ އޮފް ޕްރޮގްރާމިންގ ސާރާ ބުނާ ގޮތުގައި، މި ފެސްޓިވަލްގައި މިއަހަރު 50ށް ވުރެ ގިނަ ޤައުމުން ވަނީ ބައިވެރިވެފައެވެ. މިއީ ޒަމާނުއްސުރެ މުހިއްމު ތާރީޚަކާއި ސަޤާފަތެއް އޭގެ ފަހަތުގައި ފޮރުވިފައިވާ ޙަރަކާތެއްކަމަށް އިންތިޒާމުކުރާ ފަރާތްތަކުން ބުނެއެވެ.

އޭގެ އިތުރުން، މި ޙަރަކާތުގައި އެކި ޤައުމުތަކުގެ މީހުން ބައިވެރިވާއިރު، މިއީ އެކުވެރިކަން އާލާކޮށް ބަދަހި ކުރުމަށްވެސް މުހިއްމު ޙަރަކާތަކަށް އޮންނަނީ ވެފައެވެ.