އިލެނޯއިގެ ކެމިކަލް ޕްލާންޓްގައި ބޮޑު އަލިފާނުގެ ހާދިސާއެއް

އެމެރިކާގެ އިލެނޯއި ސްޓޭޓްގެ އުތުރުގައި އޮންނަ ރޮކްޓަން އަވަށުގައި ހުންނަ ކެމިކަލް ޕްލާންޓެއްގައި ބޮޑު އަލިފާނުގެ ހާދިސާއެއް ހިނގައިފިއެވެ.

ހޯމަ ދުވަހުގެ ހެނދުނު ހިނގި މި ހާދިސާގައި ކެމިކަލް ޕްލާންޓްގައި އަލިފާން ރޯވެ އެތަނުގައި ހުރި ކެމިކަލްތައް ގޮވުމުގެ ސަބަބުން އަލިފާންގަނޑު ފެތުރި، ކަޅު ބޯ ދުން މުޅި ސަރަހައްދަށް ވަނީ ފެތުރިފައެވެ.

އަލިފާނުގެ ހާދިސާ ހިނގުމާއެކު ޝިކާގޯގެ ހުޅަނގު އުތުރުގައި އޮންނަ ރޮކްޓަން އަވަށުގެ އިމަރޖެންސީ ރެންސްޕޮންސް ޓީމުން އެތަނަށް ގޮސް މީހުން ސަލާމަތްކުރުމަށް މަސައްކަތް ފެށިއެވެ. އެގޮތުން ޕްލާންޓްގެ އެތެރެއިން 70 މީހުން ސަލާމަތް ކޮށްފައިވެއެވެެ. ޕްލާންޓާ ގާތްގަނޑަކަށް 2 މޭލު ދުރުގައި ހުރި ގެތަކާއި ވިޔަފާރިތަކުގެ މީހުން އެ ސަރަހައްދު ދޫކޮށް ދިޔުމަށް އޮފިސަރުން ވަނީ އަންގާފައެވެ.

ޕްލާންޓްގައި މައިގަނޑުގޮތެއްގައި އުފައްދަނީ ގްރީސް ކަމުން އަލިފާން އެއްކޮށް ނިއްވުމަށް ދުވަސް ނަގާނެ ކަމަށް އަލިފާން ނިއްވުމުގައި ހަރަކާތްތެރިވާ އޮފިސަރުން ބުނެއެވެ. އެއްހާހާ ގާތްކުރާ އަދަދުގެ މީހުން ރައްކާތެރި ސަރަހައްދުތަކަށް ބަދަލު ކުރަން ޖެހުނު ނަމަވެސް އެއްވެސް މީހަކަށް އަނިޔާވެގެން މިހާތަނަށް ރިޕޯޓް ކޮށްފައެއް ނުވެއެވެ.

އެސަރަހައްދުން ކުނި ނަގައި ސާފުކުރުމުގައި ސަމާލުވުމަށްވަނީ އަންގާފައެެވެ. އެގޮތުން ކުނިނެގުމުގައި ހުސް އަތުން ކުނި ނުނެގުމަށް ވަނީ އިރުޝާދު ދީފައެވެ. ކެމިކަލް ތަކެއް ގޮވައިގެން ހިނގި ހާދިސާ އެއްކަމުން އޭގެ އަސަރު ކުނީގައި ހުރުން އެކަށީގެންވާ ކަމަށް ސިއްޙީ މާހިރުންވަނީ ބުނެފައެވެ.