ދަމާސް އިން ހުޅުމާލޭގައި ޕާކިން އަށް ހާއްސަ އިމާރާތެއް ހަދަން ނިންމައި "ވަން ޕާކް" ޕްރޮޖެކްޓް ތައާރަފުކޮށްފިއެވެ.

މި ޕްރޮޖެކްޓް ތައާރަފުކޮށްފައިވަނީ ބުދަ ދުވަހު އެކަމަށް ބޭއްވި ހާއްސަ ރަސްމިއްޔާތެއްގައެވެ. މި ޕްރޮޖެކްޓް ތައާރަފުކޮށްދެއްވީ މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ސްޓޭޓް މިނިސްޓަރު އަކްރަމް ކަމާލުއްދީނެވެ.

މި ރަސްމިއްޔާތުގައި ދަމާސް އިން ވަނީ އެ ބިލްޑިން އިމާރާތް ކުރަން ޓްރަސްޓް އިންޖިނިއަރިންނާ ހަވާލުކޮށްފަ އެވެ. އެކަމުގެ އެއްބަސްވުމުގައި ޓްރަސްޓް އިންޖިއަރިންގެ ފަރާތުން ސޮއި ކުރެއްވީ މުހައްމަދު ހާދީއެވެ. އަދި ދަމާސްގެ ފަރާތުން ސޮއިކުރެއްވީ މެނޭޖިން ޑިރެކްޓަރު އަބްދުﷲ ސޯލިހުއެވެ.

ހުޅުމާލޭގެ ސެންޓްރަލް ޕާކު ސަރަހައްދުގައި ހަދާ މި ޕާކިން އިމާރާތުގައި 500 ވެހިކަލަށް އެއްފަހަރާ ޕާކު ކުރުމުގެ ޖާގަ ހުންނާނެއެވެ. އޭގެ ތެރެއިން 227 ޖާގަ ހާއްސަކޮށްފައި ވަނީ ކާރަށެވެ. އަދި 150 ސައިކަލަށް ޕާކު ކުރެވޭނެ ޖާގަ ހުންނާނެއެވެ.

ހަތް ފްލޯއަށް ހަދާ މި އިމާރާތުގެ ގްރައުންޑާއި އެއް ވަނަ ފްލޯ ހާއްސަކޮށްފައި ވަނީ ޝޮޕިން މޯލަށެވެ. އެ ތަނުގައި ރީޓެއިލް ފިހާރަތަކާއި ސެލޫނާއި އެނޫން ވެސް ކޮމާޝަލް ބޭނުންތަކަށް ދޫކުރާނެއެވެ. އަދި ރޫފްޓޮޕް ހާއްސަ ކުރަނީ އިވެންޓްތައް ބޭއްވުމަށާއި ފުޓް ކޯޓުތަކަށް ކަމަށް ދަމާސް އިން މައުލޫމާތު ދެއެވެ. ބާކީ ހުރިހާ ފްލޯއެއްގައި ހުންނާނީ ޕާކިންއަށް ހާއްސަ ޖާގަ ކަމަށް ވެސް އެ ކުންފުނިން ވަނީ ބުނެފައެވެ.

ދަމާސްގެ މެނޭޖިންގ ޑިރެކްޓަރު އަބްދުﷲ ސޯލިހު ވިދާޅުވީ އެފަދަ ޕްރޮޖެކްޓެއް ކުރިއަށްގެންދަނީ މާލީ ގޮތުން މަންފާ ނެރެވޭގޮތްތައް ބަލައިގެން ކަމަށެވެ. އެގޮތުން، އެ އިމާރާތުގައި ޝޮޕިން މޯލެއް ހެދުމަށް ނިންމާފައިވަނީ ވެސް އެ ބޭނުމުގައި ކަމަށާް އޭނާ ވިދާޅުވިއެވެ.

މީގެ އިތުރުން އެ ބިލްޑިންއިން ޕާކިން ސްޕޭސް ނަގާ ފަރާތްތަކަށް ކާރު ރަޖިސްޓްރީ ކުރަން ބޭނުންވާ ގަރާޖު ސިޓީވެސް ލިބޭނެ ކަމަށް އަބްދުﷲ ސޯލިހު ވިދާޅުވިއެވެ.

މި ޕާކިން ބިލްޑިންގައި ފަސް ގޮތަކަށް ޕާކިން ސްޕޭސް ދޫކުރުމަށް ވަނީ ނިންމައިފައެވެ. އެއީ ގަޑިއިރަށް ޗާޖު ކުރާ ގޮތަށާއި ޕްރިމިއަމް ޕާކިން އާއި ވެލޭ ޕާކިން އާއި ލޯންގް ޓާމް ޕާކިން އާއި ހާއްސަ އެހީއަށް ބޭނުންވާ މީހުންނަށް ހާއްސަ ޕާކިންއެވެ.

މި ބިލްޑިންގެ މަސައްކަތް 18 މަސް ދުވަހުގެ ތެރޭގައި ނިންމަން ތާވަލު ކޮށްފައިވާއިރު މިތަން ހަދަން ނިންމާފައިވަނީ އެންމެ ފަހުގެ ޒަމާނީ ވަސީލަތްތައް ބޭނުންކޮށްގެންނެވެ.

މި ޕްރޮޖެކްޓާ ގުޅޭގޮތުން ޕްލޭނިންގ މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ ދަމާސްގެ މި ޕްރޮޖެކްޓުގެ ސަބަބުން މާލޭގައި ވެހިކަލްގެ ތޮއްޖެހުމަށް ވަރަށް ބޮޑު ލުޔެއް ލިބިގެންދާނެ ކަމަށެވެ. އަދި ދަމާސް އިން މީގެ ކުރިން ވެސް ވަރަށް ފުރިހަމަ ރިއަލް އެސްޓޭޓް ޕްރޮޖެކްޓްތައް ހިންގާފައިވާ ކަމަށާއި އެހެންވެ، އަލަށް ހަދާ ޕާކިން ބިލްޑިން ވެސް އެހާ ފުރިހަމަ ވާނެ ކަމަށް އުންމީދު ކުރައްވާ ކަމަށް ވިދާޅުވިއެވެ.