ފީފާ ވޯލްޑް ކަޕްގެ ގަދަ 16ގައި ސައުތު ކޮރެއާ ކޮޅަށް ފުރަތަމަ ހާފުގައި ޖެހި ހަތަރު ލަނޑުން މޮޅުވެ، މުބާރާތުގެ ކުއާޓަރ ފައިނަލުގެ ޖާގަ ބްރެޒިލުން ކަށަވަރު ކޮށްފިއެވެ.
ސްޓޭޑިއަމް 974 ގައި ކުޅުނު މި މެޗު ބްރެޒިލް ކާމިޔާބުކުރީ 4-1ންނެވެ. ބްރެޒިލްގެ ހަތަރު ލަނޑުވެސް އެޓީމުން ކާމިޔާބުކުރީ ފުރަތަމަ ހާފުގައެވެ. ފުރަތަމަ ހާފުގެ ހަތްވަނަ މިނެޓުގައި ބްރެޒިލްއަށް ލީޑު ނަގައިދިނީ ވިނީޝިއަސް ޖޫނިއަރއެވެ. މިއީ ނޭމާ ދިން ޕާހެއް ވަރަށް ހަމަޖެހިލާފައި ގޯލަށް ފޮނުވާލައިގެން އޭނާ ކާމިޔާބުކުރި ލަނޑެކެވެ. އޭގެ ފަހުން ލިބުން ޕެނަލްޓީއަކުން ބްރެޒިލްއަށް ފުޅާކޮށްދިނީ ނޭމާއެވެ. މިއީ މިފަހަރުގެ މުބާރާތުގައި އޭނާ ކާމިޔާބުކުރި ފުރަތަމަ ލަނޑެވެ. ފުރަތަމަ ހާފުގެ 29 ވަނަ މިނެޓުގައި ރިޗާލިސަން ބްރެޒިލްއަށް ލީޑު ފުޅާކޮށްދިންއިރު، ވިނީޝިއަސްގެ އެހީތެރިކަމާއެކު ހަތަރު ވަނަ ލަނޑު ޖެހީ ލޫކަސް ޕަކޭޓާއެވެ.
ދެވަނަ ހާފުގައި ކޮރެއާއިން ވަނީ ކުޅުން ރަނގަޅުކޮށް ލަނޑެއް ޖެހުމަށް މަސައްކަތް ކޮށްފައެވެ. އެގޮތުން ހްވަންގ ހީ-ޗަން ފޮނުވާލި ބާރު ހަމަލާ ދިފާއުކުރީ ބްރެޒިލްގެ ކީޕަރު އެލިސަން ބެކާއެވެ. ސައުތު ކޮރެއާގެ ހަމައެކަނި ލަނޑު އެޓީމަށް ކާމިޔާބުކޮށްދިނީ ސިއުންގ ހޯ-ޕައިކްއެވެ. މިއީ އޭރިއާ ބޭރުން ޖަހާ ގޯލުގެ ތެރެއަށް ބޯޅަ ފޮނުވާލައިގެން އޭނާ ކާމިޔާބުކުރި ލަނޑެކެވެ.
މި މެޗާއެކު ބްރެޒިލް ވަނީ ޓީމުގެ ސްކޮޑުގައި ތިބި 26 ކުޅުންތެރިންނަށްވެސް މުބާރާތުގައި ކުޅުމުގެ ފުރުސަތު ދީފައެވެ. ޓީމުގެ ތިންވަނަ ކީޕަރު ވެވަޓަންއަށްވެސް މި މެޗުގައި ކުޅުމުގެ ފުރުސަތު ކޯޗު ޓީޓޭ ދިނެވެ. މި މޮޅާއެކު ބްރެޒިލް ކުއާޓަރ ފައިނަލަށް ދަތުރުކުރިއިރު، ކުއާޓާގައި އެޓީމު ބައްދަލުކުރަން ޖެހޭނީ ކްރޮއޭޝިޔާއާއެވެ.
