"އަޅުގަނޑަކީ ބައިނަލްއަގުވާމީ މީހެއް، ކޮޕް27ގައި ލަންކާ ތަމްސީލްކުރީ ގާނޫނާ އެއްގޮތަށް" - ނަޝީދު
ނަޝީދު ވިދާޅުވީ ލަންކާގެ ރައީސް ރަނިލް ވިކްރަމަ ސިންހަގެ އިސްނެންގެވުމުގެ މަތިން އެ މަސައްކަތާ ގުޅޭގޮތުން ދެ ބޭފުޅުންގެ މެދުގައި މަޝްވަރާކުރެވިފައިވާ ކަމަށް
ކޮޕް27ށް ރައީސް ނަޝީދު ފުރާވަޑައިގަތުން
ކޮޕް27 ސަމިޓުގައި ސްރީލަންކާ ތަމްސީލު ކުރެއްވުމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު މިސްރަށް ވަޑައިގަތުމުން ފާޑުކިޔުން އަމާޒުވެފައި ވަނިކޮށް، އެކަން ދިފާއުކުރައްވައި ރައީސް ނަޝީދު ވާހަކަފުޅުދައްކަވައިފިއެވެ.
ބުރާސްފަތި ދުވަހު ރައީސް ނަޝީދު މިހެން ވިދާޅުވީ، މަޖިލީހުން ސިލްސިލާކޮށް ކުރިއަށްގެންދާ "އާސްކް ސްޕީކަރ" ޕްރޮގްރާމްގައި ވާހަކަފުޅުދައްކަވަމުންނެވެ. ރައީސް ނަޝީދު ވިދާޅުވީ ލަންކާގެ ރައީސް ރަނިލް ވިކްރަމަ ސިންހަގެ އިސްނެގުމުގެ މަތިން، އެ މަސައްކަތާ ގުޅޭގޮތުން ދެ ބޭފުޅުންގެ މެދުގައި މަޝްވަރާކުރެވިފައިވާ ކަމަށެވެ. އަދި "ކްލައިމެޓް ޕްރޮސްޕަރިޓީ ޕްލޭން"ގެ ނަމުގައި، މާލީ ފައިދާއާއި ތިމާވެއްޓަށް ގެއްލުން ކުޑަވާނެ ޕްލޭނެއް އެކުލަވާލާފައިވާ ކަަމަށް ރައީސް ނަޝީދު ވިދާޅުވިއެވެ. އެ ޕްލޭން ލޯންޗްކުރުމަށް ހަމަޖެހިފައި އޮތީ ކޮޕް ސަމިޓުގައި ކަމަށާއި، ލަންކާ ސަމިޓުގައި ކޮޕް ސަމިޓަށް ވަޑައިގެންނެވީ ރަނިލްގެ ދައުވަތަކަށް ކަމަށްވެސް އެމަނިކުފާނު ވިދާޅުވިއެވެ.
އަދި ރާއްޖެއިން ކޮޕް ސަމިޓުގައި އެމަނިކުފާނުގެ އެހީއަށް އެދިވަޑައިގެންފައި ނުވާކަމަށާއި، ރާއްޖޭގެ އެންވަޔަރަމެންޓް މިނިސްޓަރާއި ވުޒާރާގެ ބޭފުޅުންގެ ކިބައިގައި ރާއްޖެ ތަމްސީލްކުރުމުގެ ގާބިލްކަން ހުރިކަމަށްވެސް އެމަނިކުފާނު ވިދާޅުވިއެވެ. އަދި އެއީ ގާނޫނީ މައްސަލައެއް އޮތްކަމެއް ކަމަށް ގަބޫލުފުޅުނުކުރައްވާ ކަމަށާއި، އެކަން ކުރެއްވުމުގައި ގާނޫނު އަސާސީއާ ޚިލާފު ކަމެއް ހިނގާފައި ނުވާނެކަމަށް އެމަނިކުފާނު ވަނީ ވިދާޅުވެފައެވެ. މަޖިލީހުގައި ކައުންސިލަރ ޖެނެރަލެއް ހުންނަވާއިރު ގާނޫނާ ޚިލާފު ކަމެއް ހިނގާނަމަ އޭނާ އެކަން އެނގިވަޑައިގަންނަވާނެ ކަމަށް ރައީސް ނަޝީދު ވަނީ ވިދާޅުވެފައެވެ. މީގެ އިތުރުން އެއީ އެމަނިކުފާނުގެ ހިތުގައި ގައުމަށް އޮތް ލޯބި ކުޑަވާ ކަމެއް ނޫންކަަމަށް އެމަނިކުފާނު ވިދާޅުވިއެވެ. އަވައްޓެރި ގައުމަކުން އެދުމުން އެހީތެެރިވެދިނުމަކީ ރަނގަޅު ގޮތް ކަމަށް ގަބޫލުފުޅުކުރައްވާ ކަމަށްވެސް ރައީސް ނަޝީދު ވިދާޅުވިއެވެ.
