ފީފާ ވޯލްޑް ކަޕްގެ މެޗެއް ބައްލަވާލެއްވުމަށް ވަޑައިގަތުމަށް ޤަތަރުގެ އަމީރު ޝައިޚް ތަމީމް ބިން ހައްމާދު އަލް ޘާނީގެ ދައުވަތެއް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ދެއްވައިފިއެވެ.

ރައީސް އޮފީހުން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަަކަށް ޖަވާބު ދެއްވަމުން ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ ރައީސަށް ދައުވަތު ލިބިވަޑައިގެންފައިވާއިރު ސީދާ ވަޑައިގަންނަވާނީ ކޮން މެޗެއް ބެއްލެވުމަށް ތޯ ވިދާޅުވަން ދަތި ކަމަށެވެ.

ވޯލްޑް ކަޕްގެ މެޗެއް ބައްލަވާލެއްވުމަށް ޤަތަރުގެ އަމީރު ދައުވަތު ދެއްވާފައިވާއިރު ފީފާ ވޯލްޑް ކަޕް 2022 ގެ މެޗެއް ބައްލަވާލެއްވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހަށް އުރީދޫ މޯލްޑިވްސްގެ މެނޭޖިންގ ޑިރެކްޓަރު އަދި ޗީފް އެގްޒެކެޓިވް އޮފިސަރު ޚާލިދު ޙަސަން އަލް ހަމާދީ ވެސް ވަނީ ދައުވަތު ދެއްވާފައެވެ.

ވޯލްޑް ކަޕްގައި ބޭނުންކުރުމަށް ތައްޔާރުކޮށްފައިވާ ބޯޅައެއް އެ ބައްދަލުކުރެއްވުމުގައި ރައީސުލްޖުމްހޫރިއްޔާއަށް ވެދުމަށް އަރުވާފައިވެއެވެ.

ވޯލްޑް ކަޕް ފެށިގެން ކުރިއަށްދާއިރު މުބާރާތް ކުރިއަށްދާނީ ޑިސެމްބަރު މަހުގެ 18 ވަނަ ދުވަހުގެ ނިޔަލަށެވެ.