ފީފާ ވޯލްޑް ކަޕަށް އައީ ދުނިޔޭގެ މޮޅެތި ޓީމުތަކާ ދެކޮޅަށް ކުޅެން ކަމަށް ބެލްޖިއަމްގެ ކޯޗު ރޮބާޓޯ މާޓިނޭޒް ބުނެފިއެވެ.

މާޓިނޭޒް މިހެން ބުނީ މުބާރާތުގެ ގްރޫޕް ސްޓޭޖުގެ ފަހު މެޗުގައި އެންމެ ފަހުގެ ރަނަރަޕް ކްރޮއޭޝިއާއާ ދެކޮޅަށް ނުކުންނަ މެޗުގެ ކުރިން އޮތް ޕްރެސްގައި ވާހަކަ ދައްކަމުންނެވެ. އެ މެޗަށް ކުރިމަތިލާއިރު މުބާރާތުގައި ކުރިއަށް ދާން ބޭނުންވާނަމަ ބެލްޖިއަމަށް ޖެހޭނީ މޮޅުވާށެވެ. އެ މެޗުން މޮޅުވުން ނޫން ނަތީޖާއެއް ނުކުމެއްޖެ ނަމަ ބެލްޖިއަމަށް މުބާރާތުން ކަޓާނެއެވެ.

ޕްރެސްގައި ވާހަކަ ދައްކަމުން މާޓިނޭޒް ބުނީ މުބާރާތަށް އައުމުގެ ބޭނުމަކީ ދުނިޔޭގެ ވަރުގަދަ ޓީމުތަކާ ދެކޮޅަށް ކުޅެން ކަމަށާއި، އެކަން ކުރަން ޖެހޭނީ ޓީމެއްގެ ގޮތުގައި އެންމެން އެކުވެގެން ކަމަށެވެ. އަދި މެޗަށް ނުކުންނަން ޖެހޭނީ ކޮންމެ ކުޅުންތެރިޔަކު ވެސް ވަރަށް ބޮޑު ޒިންމާތަކެއް ކޮނޑު އަޅައިގެން ކަމަށެވެ. މާޓިނޭޒް ބުނީ، ކްރޮއޭޝިއާ މެޗުން ބަލިވެގެން ނުވާނެ ކަމަށާއި، ބަލިވުމަށް އުއްމީދު ވެސް ނުކުރާ ކަމަށެވެ. އޭނާ ބުނީ ކުޅެން ޖެހޭނީ އެންމެ ވަރުގަދަ ކުޅުން ކަމަށާއި، މޮޅުވުން ނޫން ގޮތެއް ނެތް ކަމަށެވެ. އެއްވަރުވި ނަމަވެސް މުބާރާތުން ބޭރުވާން ޖެހޭނެކަން މާޓިނޭޒް ވަނީ ފާހަގަކޮށްފައެވެ.

މި ޕްރެސްގައި ވާހަކަ ދައްކަމުން ބެލްޖިއަމްގެ މިޑްފީލްޑަރު ޓިމޯތީ ބުނީ، ކްރޮއޭޝިއާ މެޗުން މޮޅުވެގެން ދެ ވަނަ ބުރަށް ދެވޭނެ ކަމަށެވެ. އަދި ފުރަތަމަ ދެ މެޗުގެ ވެސް ނަތީޖާ ލިބުނީ އެންމެ ބޭނުންވާ ގޮތަށް ނޫން ކަމަށެވެ. އޭނާ ބުނީ ބެލްޖިއަމް ޓީމަކީ ކިހާ ފެންވަރެއްގެ ޓީމެއްކަން ދައްކާލެވިފައި ނުވާ ކަމަށެވެ. މީގެ އިތުރުން އޭނާ ބުނީ ބެލްޖިއަމް އޮތީ ނޫސްތަކުގައި ރިޕޯޓުކޮށްފައިވާ ގޯސް ހާލަތެއްގައި ނޫން ކަމަށެވެ.

އޭނާ ބުނީ ބެލްޖިއަމްގައި އުމުރުން ދުވަސްވީ ކުޅުންތެރިން ތިބުމުން މުބާރާތް ކާމިޔާބު ނުކުރެވޭނެ ކަމަށް މިޑްފީލްޑަރު ކެވިން ޑިބްރޭނާ ބުނީ ނެގެޓިވް ގޮތެއްގައި ކަމަށް ނުދެކޭ ކަމަށެވެ. އަދި އެންމެ ފަހުން ބޭއްވި ޔޫރޯ ފުޓުބޯޅަ މުބާރާތް އިޓަލީން ކާމިޔާބުކުރީ ޗިއެލިނީ އާއި ބޮނޫޗީއާއެކު ކަމަށާއި، އުމުރުން ދުވަސްވުމާ އެކަމާ ގުޅުމެއް އޮތް ކަމަށް ނުދެކޭ ކަމަށެވެ. ހަމައެއާއެކު އޭނާ ބުނީ ފުރަތަމަ ދެ މެޗުގައި ދަށް ކުޅުމެއް ފެނުނު ނަމަވެސް ދެ ކުޅުންތެރިޔަކު ނުވަތަ ތިން ކުޅުންތެރިޔަކަށް ޓޭގެޓުކޮށް ބަސް ބުނުމަކީ ރަނގަޅު ގޮތެއް ނޫން ކަމަށެވެ.

މުބާރާތުގައި އެންމެ ފަހުގެ ރަނަރަޕް ކްރޮއޭޝިއާ އަދި ބެލްޖިއަމް ކުޅޭ މެޗު ފަށާނީ ބުރާސްފަތި ދުވަހުގެ ރޭ ރާއްޖެ ގަޑިން 20:00 ގައެވެ.