ފީފާ ވޯލްޑް ކަޕް ގްރޫޕް ސްޓޭޖުގެ ފަހު މެޗުގައި އޮސްޓްރޭލިޔާއާ ދެކޮޅަށް ނުކުންނައިރު އެ ޓީމަކީ ވަރަށް ރޭވުންތެރި ޓީމެއް ކަމަށް ޑެންމާކުގެ ކޯޗު ކެސްޕާ ހުލްމަޑް ބުނެފިއެވެ.

ހުލްމަޑް މިހެން ބުނީ އޮސްޓްރޭލިޔާ މެޗުގެ ކުރިން އޮތް ޕްރެސްގައި ވާހަކަ ދައްކަމުންނެވެ. މި މެޗަށް ދެ ޓީމު ކުރިމަތިލާއިރު ދެ ޓީމަށް ވެސް ދެ ވަނަ ބުރުގެ ޖާގައެއް ހޯދެން އެބަ އޮތެވެ. ނަމަވެސް އެކަން ޔަގީން ވާނީ މެޗުގެ ނަތީޖާ ނުކުންނަ ގޮތަކުންނެވެ.

ހުލްމަޑް ބުނީ، އޮސްޓްރޭލިޔާ ޓީމަކީ ކޮލެޓީ ސްކޮޑެއް އޮތް ޓީމެއް ކަމަށެވެ. އަދި އެ ޓީމުގައި ވަރަށް ވަރުގަދަ ރޫހެއް އޮންނަ މަންޒަރު ފެންނަ ކަަމަށާއި، ޓީމެއްގެ ގޮތުގައްޔާއި ވަކި ވަކި ކުޅުންތެރިންނަށް ބެލި ނަމަވެސް އެކަން ސާފުވާ ކަމަށެވެ. ހުލްމަޑް ބުނީ ޑެންމާކަކީ ވެސް ވަރުގަދަ ޓީމެއް ކަމަށާއި، އޭނާ އަށް ފެނުނު ތަނުގައި ޓީމުގެ ކުޅުންތެރިން ވަރަށް ގުޅިގެން މަސައްކަތް ކުރާ ކަމަށެވެ. ހުލްމަޑް ބުނީ އޮސްޓްރޭލިޔާ ޓީމަކީ ރޭވުންތެރި ޓީމެއް ކަމަށާއި، އެ މީހުން އެޓޭކް ކުރަނީ ވެސް އެކުގައި ކަމަށާއި، ޑިފެންސް ކުރަނީ ވެސް އެކުގައި ކަމަށެވެ. އަދި ޑެންމާކުގައި ތިބި ޒުވާން ކުޅުންތެރިންނާއި، ތަޖުރިބާ ހުރި ކުޅުންތެރިންނާއެކު އެ ކަންކަމަށް ސަމާލުވާން ޖެހޭނެ ކަމަށެވެ.

ހުލްމަޑް ބުނީ މީގެ ހަތަރު އަހަރު ކުރިން ވެސް ޑެންމާކުން އޮސްޓްރޭލިޔާއާ ދެކޮޅަށް ކުޅުނު ކަމަށާއި، އެ މެޗު ވެސް ދިޔައީ ވަރަށް ވާދަވެރިކޮށް ކަމަށެވެ. އޭނާ ބުނީ އެ މެޗުގެ ނަތީޖާ އެއްވަރުވީ ނަމަވެސް މިފަހަރު ބޭނުންވަނީ ޑެންމާކު މޮޅުވާން ކަމަށެވެ. ނަމަވެސް ހުލްމަޑް ބުނީ އެމެޗާއި އެއް ގޮތަށް މިފަހަރުގެ މެޗު ވެސް ވަރަށް ވާދަވެރިވާނެ ކަމަށެވެ.

މީގެ އިތުރުން ހުލްމަޑް ބުނީ ކޮންމެ ގޮތެއް ވިޔަސް އުއްމީދުތަކެއް ހުންނާނެ ކަމަށެވެ. ނަމަވެސް ބައެއް ފަހަރު އުއްމީދާ އެއް ގޮތަށް ކަންކަން ނުދާނެ ކަމަށެވެ. ހުލްމަޑު ބުނީ އެއީ ވަރަށް ޕްރެޝަރު ބޮޑު މެޗަކަށް ވާނެ ކަމަށެވެ. އަދި ކުރިން ވެސް ބުނެފައިވާ ގޮތަށް އެންމެން ގުޅިގެން އެކުގައ ކުރެވޭ މަސައްކަތުގެ ޕްރެޝަރު ނައްތާލެވޭނެ ކަމަށެވެ. އޭނާ ބުނީ އަބަދުވެސް ބަލަންވީ އެކަނި ކަންކަން ނުކުރުމަށެވެ.

މުބާރާތުގެ ގްރޫޕް ޑީ ގައި ޑެންމާކު އަދި އޮސްޓްރޭލިޔާ ބައްދަލުކުރާ މެޗު ފަށާނީ ބުދަ ދުވަހުގެ ރޭ ރާއްޖެ ގަޑިން 20:00 ގައެވެ.