ޕޯޗުގަލްގައި އޮތީ މޮޅު ކުޅުންތެރިންގެ މައްޗަށް އެކުލެވޭ ސްކޮޑެއް: އަލޮންސޯ

ފީފާ ވޯލްޑް ކަޕް ގްރޫޕް ސްޓޭޖުގެ ދެ ވަނަ މެޗުގައި ޕޯޗުގަލާ ކުރިމަތިލާއިރު އެ ޓީމުގައި އޮތީ މޮޅު ކުޅުންތެރިންގެ މައްޗަށް އެކުލެވިގެންވާ ސްކޮޑެއް ކަމަށް އުރުގުއޭގެ ކޯޗު ޑިއޭގޯ އަލޮންސޯ ބުނެފިއެވެ.

އަލޮންސޯ މިހެން ބުނީ ޕޯޗުގަލް މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުންނެވެ. އޭނާ ބުނީ، ކޮންމެ މެޗަކީ ވެސް މުޅިން ތަފާތު އައު މެޗެއް ކަމަށެވެ. އެގޮތުން ޕޯޗުގަލްގައި ވަރަށް މޮޅެތި ކުޅުންތެރިން ތިބި ކަމަށާއި، އެ ޓީމުގެ ކޯޗު ފެނާންޑޯ ސަންޓޯސް އަކީ ވެސް ވަރަށް މޮޅު މީހެއް ކަމަށެވެ. އަދި ސަންޓޯސް އަކީ ވަރަށް ތަޖުރިބާ ބޮޑު ކޯޗެއް ކަަމަށާއި، އޭނާ ވަނީ ޕޯޗުގަލް ކާމިޔާބު ހިސާބަކަށް ގެންގޮސްދީފައި ކަމަށެވެ.

އޭނާ ބުނީ ޕޯޗުގަލްގެ މުޅި ޓީމު އެކުގައި އޮންނަތާ ވަރަށް ދުވަސްވެއްޖެ ކަަމަށާއި، އެއީ އެ ޓީމު ވަރުގަދަވާނެ ސަބަބެއް ކަމަށެވެ. ނަމަވެސް އޭނާ ބުނީ އުރުގުއޭގައި ވެސް އެ ޓީމުގެ އަމިއްލަ ހަތިޔާރު ހުންނާނެ ކަމަށާއި، އެމީހުންގެ އެންމެ މޮޅު ކުޅުން މެޗުގައި ނެރޭނެ ކަމަށެވެ. އަލޮންސޯ ބުނީ އެކަމުން އުރުގުއޭ ވެސް ވަރުގަދަވާނެ ކަމަށެވެ.

މީގެ އިތުރުން އަލޮންސޯ ބުނީ ކުރިން ވެސް އޭނާ ފާހަގަ ކުރި ގޮތަށް ކޮންމެ މެޗަކީ ވެސް ތަފާތު މެޗެއް ކަމަށާއި، ޓީމުގައި ތިބި 26 ކުޅުންތެރިންނަށް ވެސް ކުޅުމުގެ ފުރުސަތު ދޭނެ ކަމަށެވެ. ނަމަވެސް އޭނާ ބުނީ މެޗުތަކުގެ ފުރަތަމަ 11 ގައި އަބަދުވެސް ހިމަނާނީ އެންމެ ރަނގަޅަށް ތިބޭ އަދި އެންމެ ރަނގަޅަށް ކުޅެވޭނެ ކުޅުންތެރިން ކަމަށެވެ. އޭނާ ބުނީ އެކަން އަބަދު ވެސް އޭނާގެ ކުޅުންތެރިންނަށް ވިސްނައި ދެމުން އަންނަ ކަމަށެވެ.

ޕްރެސްގައި ވާހަކަ ދައްކަމުން އުރުގުއޭގެ މިޑްފީލްޑަރު ރޮޑްރީގޯ ބީޓަންކް ބުނީ، ޕޯޗުގަލް މެޗަކީ ވަރަށް ޚާއްސަ މެޗެއްކަން އެނގޭ ކަމަށެވެ. އޭނާ ބުނީ މެޗުން މޮޅުވާން ޖެހޭކަން އެނގޭ ކަމަށާއި އެކަން ހާސިލް ކުރާނެ ކަމަށެވެ. އޭނާ ބުނީ ޓީމުގެ ހުރިހާ ކުޅުންތެރިން އެކީ އެކެއްޗެއްގެ ގޮތުގައި މަސައްކަތް ކުރާނީ އެ މެޗުގެ ތިން ޕޮއިންޓު ހޯދުމަށް ކަމަށެވެ. އެގޮތުން ކޮރެއާ އަތުން ބަލިނުވެ ލިބުނު އެއް ޕޮއިންޓަކީ ވެސް މުހިންމު އެއްޗެއް ކަމަށެވެ. ނިންމާލަމުން އޭނާ ބުނީ އުރުގުއޭގެ ތާރީޚުގައި އެންމެ ނާކާމިޔާބު ޓީމަށް ވާން ބޭނުންނުވާ ކަމަށެވެ.

މުބާރާތުގައި އުރުގުއޭ އަދި ޕޯޗުގަލް ބައްދަލު ކުރާ މެޗު ފަށާނީ ހޯމަ ދުވަހުގެ ރޭ ރާއްޖެ ގަޑިން 12 ޖަހާއިރުއެވެ.