އިންސާނީ ޙައްޤުތަކާ ބެހޭ އދ ގެ ބައްދަލުވުމަކީ ފަޟީޙަތް ހައްޤު، އިންތިހާ ދަރަޖައަށް ހައިރާންކަން ގެނުވަނިވި ބައްދަލުވުމެއް ކަމަށް އީރާނުން ބުނެފިއެވެ.

އީރާނުގައި މި ފަހަކަށް އައިސް ކުރަމުންދާ ސިލްސިލާ މުޒާހަރާތަކުގެ ބައިވެރިންނާ ދެކޮޅަށް އެ ޤައުމުގެ ސަރުކާރުން އަޅަމުންދާ ފިޔަވާޅުތަކަށް ބޮޑެތި ފާޑުކިއުންތަކެއް އަމާޒު ކުރެވިގެންދިޔަ އދގެ އިންސާނީ ޙައްޤުތަކާ ބެހޭ ކައުންސިލްގެ ބައްދަލުވުމުގައި، އީރާނުގެ މަންދޫބު ޚަދީޖާ ކަރީމީ ވަނީ، އެ ޤައުމުގެ އިންސާނީ ޙައްޤުތަކުގެ ރެކޯޑް ދިފާޢު ކުރައްވާފައެވެ.

ޚާދީޖާ ވިދާޅުވީ، އިންސާނީ ޙައްޤުތަކަކީ ހުޅަނގުގެ ޤައުމުތަކުގެ ގުރޫޕުތަކުގެ ސިޔާސީ ބޭނުންތަކަށް ބޭނުން ކުރާ ހަތިޔާރަކަށް ހެދުމަކީ ފަޟީޙަތް ޙައްޤު، ބޭއަދަބީ ކަމެއް ކަމަށެވެ.

އިންސާނީ ޙައްޤުތަކާ ބެހޭ އދގެ ކައުންސިލުން އީރާނާ ދެކޮޅަށް މިހާރު ބަލަމުންދާ މައްސަލައަކީ، އައިސްލަންޑްއާއި ޖަރުމަނުވިލާތް އިސްވެއޮވެ، އިތުރު 50 ޤައުމެއްގެ ތާޢީދާއެކު ހުށަހަޅާފައިވާ މައްސަލައެކެވެ. އެ ޤައުމުތަކުގެ މަޤްޞަދަކީ، އައުރަ ނިވާ ކުރުމުގެ މައްސަލައެއްގައި އީރާން ފުލުހުންގެ ބެލުމުގެ ދަށަށް ގެންގޮސްފައި ހުއްޓާ، އުމުރުން 22 އަހަރުގެ ކުރުދީ އަންހެނެއް ކަމަށް ވާ މަހްސާ އަމީނީ، ސެޕްޓެމްބަރ 16، 2022 ވަނަ ދުވަހު މަރުވުމާ ގުޅިގެން ކުރިއަށް ގެންދާ މުޒާހަރާތަކުގެ ބައިވެރިންނަށް އީރާނުގެ ސަރުކާރުން ލާއިންސާނީ އަނިޔާ ކުރާ ކަމަށް ބުނާ ބުނުމުގެ މިނިވަން ތަޙްޤީޤެއް ހިންގަން، ހެކި ހޯދާ މިޝަންއެއް އެކުލަވާލުމެވެ.

ކަން މިހެން އޮތް އިރު، އީރާނުގެ މަސްރަހު މިހާރު އޮތީ، އިންސާނީ ހައްޤުތަކުގެ ކާރިސީ ދަރަޖާގައި ކަމަށް، އިންސާނީ ޙައްޤުތަކާ ބެހޭ އދގެ އިސްވެރިޔާ، ވޯކަރ ތުރުކު ވަނީ، ނޮވެމްބަރު 24 ވަނަ ދުވަހު ވިދާޅުވެފައެވެ.