ތިލަފުށީގައި މިހާރު އެންމެ ބޮޑަށް ކުރެވޭ މަސައްކަތަކީ ވަކިކުރާ ކުނި ރައްކާކުރުމުގެ މަސައްކަތް: ވެމްކޯ
25 ނޮވެމްބަރު 2022 | ހުކުރު 02:08ތިލަފުށީގައި ދުވާލަކަށް 500 ޓަނުގެ ކުނި އެންދޭވަރުގެ އިންސިލޭޓަރު ބެހެއްޓިގެންދާނެ
ވެމްކޯގެ މެނޭޖިންގ ޑިރެކްޓަރު ޔޫސުފް ސިރާޖު
ތިލަފުށީގައި މިވަގުތު އެންމެ ބޮޑަށް ކުރެވެމުންދާ މަސައްކަތަކީ ކުނި ސްޓޯކޮށް، ސެގްރިޓޭޓްކުރުމަށްފަހު ފަހަށް ރައްކާކުރުމުގެ މަސައްކަތްކަމަށް ވެމްކޯގެ މެނޭޖިންގ ޑިރެކްޓަރު (އެމްޑީ) ޔޫސުފް ސިރާޖު ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ސިރާޖު ވިދާޅުވީ ތިލަފުށީގައި ކުނި މެނޭޖްކުރުމަށް ކުރިޔަށްގެންދާ މަޝްރޫޢުގެ ތެރެއިން ތިލަފުށީގައި ދުވާލަކަށް 500 ޓަނުގެ ކުނި އެންދޭވަރުގެ އިންސިލޭޓަރު ބެހެއްޓިގެންދާނެކަމަށެވެ. އެއީ 250 ޓަނުގެ ދެ އިންސިލޭޓަރުކަމަށާއި މިހާރު ކުރިޔަށްދަނީ އިންސިލޭޓަރު ބެހެއްޓެންވާއިރަށް ކޮންމެ ދުވަހަކުވެސް ކުނި ސެގިރޭޓްކޮށް ފަހަށް ރައްކާކުރުމުގެ މަސައްކަތްކަމަށެވެ.
ދުވާލަކު 300 ޓަނާއި ގާތަށް ކުނި ރައްކާކުރެވޭކަމަށް ސިރާޖު ވިދާޅުވިއެވެ.
މީގެއިތުރުން ސިރާޖު ވިދާޅުވީ ފާއިތުވި ހަތަރު އަހަރު ކުރި މަސައްކަތުން ތިލަފުއްޓަކީ މިހާރު ކުނި މެނޭޖްކުރެވޭ ވަރުގެ ތަނަކަށް ވެއްޖެކަމަށެވެ. ކުރިން އެތަނަކީ ކުނި އަޅާ ތަނެއްކަމަަށާއި ނަމަވެސް މިހާރު ތިލަފުށީގައި ވަނީ ކުނި މެނޭޖްކުރެވޭ ގޮތަށް އިންފްރާސްޓްރަކްޗަރ ގާއިމުކުރެވިފައިކަމަށް ސިރާޖު ވިދާޅުވިއެވެ.
ތިލަފުށީގައި ކުނި މެނޭޖްކުރުމުގެ މަޝްރޫޢު ކުރިޔަށްގެންދަނީ އޭޑީބީގެ އެހީތެރިކަމާ އެކުއެވެ.
