މާލޭގައި 2018 ވަނަ އަހަރުގެ އޮކްޓޫބަރު މަހުގެ ތެރޭގައި ތޫނު އެއްޗަކުން ހަމަލާދީ އުމުރުން 14 އަހަރުގެ އިސްމާއިލް ޝައްފާން ޝަރީފް މަރާލި މައްސަލައިގައި ކްރިމިނަލް ކޯޓުން ކުށް ސާބިތުވި 4 މީހެއްގެ އިސްތިއުނާފު މައްސަލަ ހައިކޯޓުގައި ފަށައިފިއެވެ.

ހައިކޯޓުގައި މި މައްސަލައިގެ އިސްތިއުނާފު އަޑުއެހުންތައް ފަށާފައިވަނީ ބުދަ ދުވަހުއެވެ. ޤާނޫނު އަސާސީގެ 42 ވަނަ މާއްދާގެ (ނ) އާ ހަވާލާދީ މި މައްސަލައިގެ އަޑުއެހުން ކުރިއަށް ގެންދިޔައީ އާންމުކޮށް ހުޅުވާނުލައެވެ.

ހައިކޯޓުގެ މީޑިއާ އޮފިޝަލު ވިދާޅުވީ، ބުދަ ދުވަހު އޮތް އަޑު އެހުމުގައި މި މައްސަލައިގައި ކުށް ސާބިތުވި މީހުންގެ ފަރާތުން އިސްތިއުނާފީ ނުކުތާތައް ހުށަހަޅާފައިވާ ކަމަށެވެ.

އަދި ޕްރޮސިކިއުޓަރ ޖެނެރަލްގެ ފަރާތުން އެ ނުކުތާތަކަށް ރައްދު ދިނުންވެސް ވަނީ ކުރިއަށް ގެންގޮސްފައެވެ.

ހައިކޯޓުން މައުލޫމާތު ދޭ ގޮތުގައި މި މައްސަލައިގެ ބުދަ ދުވަހުގެ އަޑު އެހުމުގައި ފަނޑިޔާރުން ވަނީ މައްސަލައާ ގުޅޭ ގޮތުން ޚަސްމުންނާ ސުވާލު ކުރައްވައި، އަދި މައްސަލައާ ގުޅޭ ބައެއް މައުލޫމާތާއި ލިޔެކިޔުން ހޯދުމަށް އެދިވަޑައިގެންފައެވެ.

ބުދަ ދުވަހުގެ ޝަރީއަތް ނިންމަވާލެއްވީ، ދަށު ކޯޓުން މައުލޫމާތު ސާފު ކުރަންޖެހޭ ކަމެއް އޮތް ކަމަށާއި، އަދި އެ މައުލޫމާތު ލިބުމުން އިތުރު އަޑު އެހުމެއް ބާއްވަން ޖެހިއްޖެ ނަމަ އިތުރު އަޑު އެހުމެއް ބާއްވާނެ ކަމަށް ބަޔާންކޮށެވެ.

އެހެން ނޫންނަމަ ދެން އޮންނާނީ މައްސަލައިގައި ގޮތެއް ނިންމުންކަން ފަނޑިޔާރުން އިއުލާނު ކުރެއްވިއެވެ.

އިސްމާއިލް ޝައްފާން ޝަރީފް މަރާލީ އޭނާ ދިރިއުޅެމުން ދިޔަ ސަބުދެލިޔާ މަގު ގ. ރޯޒީ ކުރިމަތިން ބަޔަކު ތޫނު އެއްޗަކުން ހަމަލާދީއެވެ.