އަންނަ އަހަރުގެ ބަޖެޓަކީ ވާދަވެރިން މާޔޫސްކުރުވި ބަޖެޓެއް - ސައުދު

އަންނަ އަހަރުގެ ބަޖެޓަކީ ވާދަވެރިން މާޔޫސްކުރުވި ބަޖެޓެއް ކަމަށް ވިލިނގިލި ދާއިރާގެ މެންބަރު ސައުދު ހުސައިން ވިދާޅުވެއްޖެއެވެ.

ބަޖެޓް ކޮމިޓީގެ ރިޕޯޓަށް ބަހުސްކުރައްވަމުން ސައުދު ވިދާޅުވީ 2023 ވަނަ އަހަރުގެ ބަޖެޓް ކޮމިޓީ އިން ދިރާސާކުރުމަށްފަހު ރިޕޯޓް ތަޅުމަށް ގެނެސް ބަހުސްކުރަމުންދާއިރު، ބަޖެޓާއި މެދު ވަރަށް ބޮޑަށް ހިތްހަމަޖެހިވަޑައިގަންނަވާ ކަމަށެވެ. ބަޔަކު މީހުން މި ބަޖެޓަކީ އުއްމީދީ ބަޖެޓެކޭ ބުނަން އެހެން މީހުންނަށް ނުކުރޭ ވަރަށް މަލާމާތްކުރިޔަސް މިއީ އުއްމީދީ ބަޖެޓެއް ކަމަށް ސައުދު ވިދާޅުވިއެވެ. އޭނާ ވިދާޅުވީ މިއީ ވާދަވެރިން މާޔޫސްކުރުވި ބަޖެޓެއް ކަމަށެވެ.

ސައުދު ވިދާޅުވީ ކޮވިޑްގެ ވަބާއާއި، ރަޝިޔާ ޔޫކްރެއިން ހަނގުރާމައިގައި ތަރައްގީވެފައިވާ ބޮޑެތި ގައުމުތަކުގައި އިގްތިސާދަށް އަސަރުކޮށް ތަރައްގީވަމުން އަންނަ ގައުމުތައް ބަނގުރޫޓްވަމުންދާއިރު ވެސް މި ކުޑަކުޑަ ދިވެހިރާއްޖެ އިގްތިސާދު މެނޭޖްކުރުމުން، ރައްޔިތުންނާއި ހަމައަށް އަސާސީ ހިދުމަތްތައް ހިމާޔަތްކޮށްދީ ރައްޔިތުންނަށް ބޭނުންވެފައި ހުރި ޒަރޫރީ ހުރިހާ ބޭނުންތައް ފުއްދައިދީ ރާއްޖެ މިހާ ހިސާބަށް އާދެވުނީތީ ވަރަށް ބޮޑަށް ސިޔާސީ ވާދަވެރިން ވަރަށް ބޮޑަށް މާޔޫސްވެއްޖެ ކަމަށެވެ.

ސައުދު ވިދާޅުވީ މި ހާލަތުގައި އެމްޑީޕީ ނޫން އެހެން ފަރާތަކުން ނުވަތަ އިދިކޮޅު ޕީޕީއެމުން ވެރިކަން ކުރާނަމަ މިގައުމުގެ ވާހަކަ ދައްކާނެ ކަމެއް ނެތް ކަމަށެވެ. ރާއްޖޭގެ ހާލަތު މިހާހިސާބަށް އާދެވުނުގޮތާއި، ރާއްޖޭގެ ހާލަތު ރަނގަޅުކުރުމަށްޓަކައި ކުރަމުންދާ މަސައްކަތް މިއަދު ބަޔަކު މީހުން ވާހަކަ ދައްކާއިރު ތަރައްގީގެ ވާހަކަ ދައްކައިގެން އިދިކޮޅު ފަރާތްތަކަށް މި ސަރުކާރު ބަލިކޮށްލެވޭކަށް ނެތްކަމަށް ސައުދު ވިދާޅުވިއެވެ.

ސައުދު ވިދާޅުވީ ތަރައްގީގެ ނަޒަރުން ވިސްނާލާއިރު މާލެއާއި އެއްހަމައަކަށް އަތޮޅުތެރެ ތަރައްގީކުރެއްވި ހަމައެކަނި ލީޑަރަކީ ރައީސް އިބްރާހިމް މުހައްމަދު ޞާލިހު ކަމަށެވެ. އަދި އެކަމާއި ބަޔަކު ހިތްހަމަ ނުޖެހުނު ނަމަވެސް އަދި މާލޭގައި މިއަދު އުޅެން ޖެހިފައިވިޔަސް، މާލޭގެ ރައްޔިތުންނަށް ހަމަނޭވާލެވޭނެ ގޮތް ހައްދަވާ މާލޭގެ ވެށި އަމާންކޮށްދެއްވި ލީޑަރަކީ ރައީސް އިބްރާހިމް މުހައްމަދު ޞާލިހު ކަމަށް ސައުދު ވިދާޅުވިއެވެ.

ސައުދު ވިދާޅުވީ މަތީތައުލީމަށް ރައްޔިތުން ސަލާންޖެހުން ހުއްޓުވާފައި ހިލޭ ޑިގްރީއަށް ޒުވާނުން ކިޔަވަމުން އެ ގެންދަވަނީ ދައުލަތުގެ ޒިންމާގައި ކަމަށެވެ. ސައުދު ވަނީ އަތޮޅު ތެރޭގެ ރަައްޔިތުންނަށް ރައީސް އިބްރާހިމް މުހައްމަދު ޞާލިހު ނޫން ޗޮއިސްއެއް އެބައޮތްތޯ ސުވާލުކުރައްވާފައެވެ. އަދި އެހެން ޗޮއިސްއެއް ނެތްކަމަށް ވިދާޅުވެ ސައުދު ވިދާޅުވީ މާލެ މާލެއަކަށް ހައްދަވައި ދެއްވަނީ ރައީސް އިބްރާހިމް މުހައްމަދު ޞާލިހު ކަމަށެވެ.

މަލޭގެ ރައްޔިތުންނަށް ދިމާވެފައިވާ އެންމެ ބޮޑު ގޮންޖެހުމަކީ މާލެ ތޮއްޖެހި އަތޮޅުތެރެ ތަރައްގީ ނުވެފައި އޮތުމުގެ ސަބަބުން މާލެއަށް ބަރޯސާ ބޮޑުވުމުގެ ސަބަބުން މާލޭގެ ރައްޔިތުންގެ ހައްގުތައް ގެއްލިފައިވާ ކަމަށެވެ. އަދި އެހައްގުތައް ކަށަވަރުކޮށްދެއްވުމަށްޓަކައި އަތޮޅުތެރެ ތަރައްގީކުރައްވަމުން މާލެ ރައްޔިތުންނަށް ބޯހިޔާވަހިކަމާއި ބިންވެރިކަން ކަށަވަރު ކޮށްދެއްވާ ހަމައެކަނި ސަރުކާރަކީ މި އެމްޑީޕީގެ ރައީސް އިބްރާހިމް މުހައްމަދު ޞާލިހުގެ ސަރުކާރު ކަމަށް ސައުދު ވިދާޅުވިވެ.

ދިވެހިރައްޔިތުންނަށް އޮތް ހަމައެކަނި ޗޮއިސްއަކީ ރައީސް އިބްރާހިމް މުހައްމަދު ޞާލިހު ކަމަށް ސައުދު ވިދާޅުވިއެވެ. ސައުދު ވިދާޅުވީ މި ބަޖެޓަކީ ވިލިނގިލި ކޮލަމާފުށީގެ ރައްޔިތުންނަށް ފަހި ބަޖެޓެއް ކަމަށެވެ. މިއީ ދިވެހި މަސްވެރިންނަށް ދިމާވެފައިވާ ކަންކަން ހައްލުކޮށްދެއްވާ ސަރުކާރު ކަމަށާއި، ފެލިވަރާއި ކޫއްޑޫ އަދި އެހެން ރަށްތައްވެސް ތަރައްގީވަމުން އަންނަ ކަމަށާއި، އިންގިލާބީ ބަދަލު ފެނިގެންދާނެ ކަމަށެވެ.