ކުޅުދުއްފުށީ ރީޖަނަލް ހޮސްޕިޓަލުގައި ހުޅުގެ އޮޕަރޭޝަނަށް ޚާއްސަ ކޭމްޕެއް ފަށައިފި

އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)އިން ކުޅުދުއްފުށީ ރީޖަނަލް ހޮސްޕިޓަލުގައި ހުޅުގެ އޮޕަރޭޝަން ކުރުމަށް ޚާއްސަ ކޭމްޕެއް ފަށައިފިއެވެ.

ކެމެރާގެ ޒަރީއާއިން ބަލައިގެން ކުރާ ހުޅުތަކުގެ އޮޕަރޭޝަންތަކެއް ކުރިއަށްގެންދާ މި ކޭމްޕްގައި އިސްކޮށް އުޅުއްވާނީ އައިޖީއެމްއެޗްގެ ތަޖުރިބާކާރު ކަށީގެ ޑޮކްޓަރު, ސީނިއާ ކޮންސަލްޓަންޓް އިން އޯތޮޕީޑިކްސް، ޑރ. ޙުސައިން ޝަކީލެވެ.

Advertisement

މި ކޭމްޕް ކުރިއަށްދާނީ އަންނަ ބުރާސްފަތި ދުވަހާ ހަމައަށެވެ. ސަރޖަރީއަށްފަހު ބޭނުންވާ ފަރުވާއާއި އަދި 3 މަސް ދުވަހުގެ ފިޒިއޮތެރަޕީގެ ފަރުވާ ވެސް ހިމެނޭއިރު މި ކޭމްޕްގައި 3 ދުވަހުގެ ތެރޭގައި 9 މީހުންގެ އަރތްރޮސްކޮޕީ ސަރޖަރީ ހަދާނެ ކަމަށް މައުލޫމާތު ލިބެއެވެ.

މި ކޭމްޕުގައި، ކުޅިވަރު ކުޅުމުގައި ހުޅުތަކަށް ލިބިފައި ހުންނަ އަނިޔާތައް (ސްޕޯޓްސް އިންޖަރީސްތައް) ސާޖަރީ މެދުވެރިކޮށް ރަނގަޅުކޮށް ކަސްރަތުގެ އެހީގައި އަލުން ކުޅިވަރުގެ މައިދާނަށް ނުކުތުމަށް އެހީތެރި ވެދޭނެއެވެ.

ޑރ. ޙުސައިން ޝަކީލުގެ އިތުރުން އެ ހޮސްޕިޓަލުގެ ހޭނައްތާ ޑޮކްޓަރު، ކޮންސަލްޓަންޓް އިން އެނެސްތީސިއޮލޮޖީ، ޑރ. އަސްޢަދް މުޙައްމަދު ޝަހީދާއި ސެނަހިޔާ މިލިޓަރީ ހޮސްޕިޓަލުގައި މަސައްކަތް ކުރައްވާ ކަށީގެ ޚާއްސަ ޑޮކްޓަރު، ކޮންސަލްޓަންޓް އިން އޯތޮޕީޑިކްސް، ޑރ. ޢަލީ މަފާޒް ރަޝީދު ވެސް މި ކޭމްޕުގައި ބައިވެރިވެވަޑައިގަންނަވައެވެ.