2023ގެ ނިޔަލަށް ތެލާއި ކާޑުގެ ބާވަތްތައް އެތެރެކުރެވޭ ވަރަށް ރިޒާވު ހުރިތޯ ޔަގީންކުރަން މަޖިލީހަށް ހުށަހަޅައިފި
މިއަހަރުގެ އޮކްޓޯބަރު މަހުގެ ނިޔަލަށް ރާއްޖޭގެ ފޮރުން ރިޒާވުގައި ހުރި މިންވަރު ހޯދުމަށް އެދިވަޑައިގެންނެވި
އާދަމް ޝަރީފް
2023 ވަނަ އަހަރުގެ ނިޔަލަށް ރައްޔިތުންނަށް ބޭނުންވާ އަސާސީ ތަކެއްޗާއި ކާޑުގެ ބާވަތްތަކާއި ތެޔޮ އެތެރެކުރެވޭ ވަރަށް ރިޒާވުގައި ހުރިތޯ ބަލައިދިނުމަށް އެދި ރައްޔިތުންގެ މަޖިލީހަށް ހުށަހަޅައިފިއެވެ.
މި މައްސަލަ ހުށަހަޅުއްވާފައިވަނީ ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އާދަމް ޝަރީފް އުމަރުއެވެ. މަޖިލީހުގެ ރައީސަށް ފޮނުއްވެވި ސިޓީގައި އާދަމް ޝަރީފު ވިދާޅުވީ އަންނަ އަހަރަށް ލަފާ ކުރާ ބަޖެޓާއި މިއަހަރުގެ ސަޕްލިމެންޓަރީ ބަޖެޓް ހުށަހެޅުމާއެކު ވޭތުވެދިޔަ ހަތަރު އަހަރު، ސަރުކާރުގެ ހިންގުމުގެ ޚަރަސާއި ބަޖެޓް ޑެފިސިޓް އިންތިހާއަށް ބޮޑުވުމާއި ސަރުކާރުގެ ތެރޭގައި އިސްރާފާއި ކޮރަޕްޝަން ބޮޑުވުމާއި ދައުލަތުގެ މާލިއްޔާގެ ކަންކަން ޒިންމާދާރުގޮތެއްގައި ނުބަލަހައްޓާކަމުގެ އިލްޒާމުތައް ސަރުކާރަށް އަމާޒުވަމުން ދާ ކަމަށެވެ.
ރާއްޖޭގެ މާލީ ހާލަަތު ގުޅޭގޮތުން އެންމެ އަދާހަމަ އަދި ސައްހަ މައުލޫމާތު ސަރުކާރުން ހާމަނުކުރާކަން ފާހަގަކުރައްވައި އާދަމް ޝަރީފު ވިދާޅުވީ އެހެންވެ ގިނަ ބަޔަކު ކަންބޮޑުވުން ފާޅު ކުރަމުންދާ ކަމަށެވެ. އަދި ސަރުކާރުގެ ދަރަނި އެއް އަަހަރުން އަނެއް އަހަރަށް ބޮޑުވަމުންދާތީއާއެކު އަސާސީ ކަންކަމަށް ބޭޏުންވާ ތަކެއްޗާއި ކާޑާއި ތެޔޮ އެތެރެކުރަން ބޭނުންވާ މިންވަރަށް މާލީ ތަނަވަސްކަން ރާއްޖޭގައި ނެތްކަމުގެ ކަންބޮޑުވުމުން ރައްޔިތުންގެ ތެރޭގައި އެބައޮތް ކަމަށް ވެސް އޭނާ ވިދާޅުވިއެވެ.
މި ސަބަބުތަކާހުރެ، 2023ގެ ނިޔަލަށް ކާޑުގެ ބާވަތްތަކާއި ތެޔޮ އެތެރެކުރެވޭ ވަރަށް ރާއްޖޭގައި މާލީ ތަނަވަސްކަން ހުރިކަން ކަށަވަރުކޮށްދީ، މިއަހަރުގެ އޮކްޓޯބަރު މަހުގެ ނިޔަލަށް ރާއްޖޭގެ ފޮރުން ރިޒާވުގައި ހުރި މިންވަރު މިއަހަރަށް ލަފާ ކުރާ ބަޖެޓް ފާސްކޮށް ކުރުމުގެ ކުރިން ހޯދަދިނުމަށް ވަނީ އެދިވަޑައިގެންފައެވެ.
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު، ވެސް ދިވެހި ދައުލަތުގެ ރިޒާވްގައި ފޮރިން ކަރެންސީ މަދުވުމުން ކުރިއަށް އޮތް ހަފްތާތަކުގައި ނުވަތަ ކުރިއަށް އޮތް މަސްތަކުގެ އަސާސީ ކަންކަމަށް ބޭނުންވާ ފައިސާ ނެތް ކަމަށް ހޯމަ ދުވަހުގެ މަޖިލީހުގެ ޖަލްސާގައި ވިދާޅުވެފައެވެ.
މިވާހަކަތަކަށް ރައްދު ދެއްވައި ފިނޭންސް މިނިސްޓަރު އިބްރާހިމް އަމީރު ކުރެއްވި ޓްވީޓުގައި ވިދާޅުވީ ރާއްޖެ ބަނގުރޫޓުވާ ވާހަކަ އަބަދުވެސް ދައްކާކަމަށާއި ރާއްޖޭގެ ހާލަތު އެފަދަ ދަރަޖައަކަށް ނުދާކަމަށެވެ. އަދި އެކި ފަރާތްތަކުން މިވާހަކަ ދައްކަނީ އެކި ސިޔާސީ ބޭނުމުގައި, ސަރުކާރު ބަލިކަށިކޮށް, މިހާތަނަށް މި ދިމާވި ދަތި އުނދަގުލާއެކުވެސް, ހޯދަމުންދާ ކުރިއެރުންތައް ފަނޑުކޮށް ކިލަނބުކޮށްލުމުގެ ބޭނުމުގައި ކަމަށް ވިދާޅުވިއެވެ.
