ޑެޕިޔުޓީ މިނިސްޓަރ ޝިމާޒަށް ބަޔަކު ހަމަލާދީފި
19 ނޮވެމްބަރު 2022 | ހޮނިހިރު 00:57ޝިމާޒަށް ހަމަލާދިން މައްސަލަ ތަހުގީގުކުރަމުން އަންނަކަމަށް ފުލުހުން ބުނޭ
ޓްރާންސްޕޯޓު މިނިސްޓްރީގެ ޑެޕިއުޓީ މިނިސްޓަރު ޝިމާޒް އަލީ
ޓްރާންސްޕޯޓު މިނިސްޓްރީގެ ޑެޕިއުޓީ މިނިސްޓަރު ޝިމާޒް އަލީއަށް ބަޔަކު މަގުމަތިން ހަމަލާދީފިއެވެ.
މިހަމަލާއާ ގުޅޭގޮތުން ފުލުހުން ބުނެފައިވަނީ ޝިމާޒަށް ހަމަލާދޭން އުޅުނު މައްސަލައެއް ހުކުރު ދުވަހުގެ ރޭ ފުލުހުންނަށް ރިޕޯޓްކޮށްފައިވާކަމަށެވެ. އަދި އެމައްސަލަ ފުލުހުން ތަހުގީގުކުރަމުން އަންނަކަމަށްވެސް ވަނީ ބުނެފައެވެ.
ޝިމާޒަށް ހަމަލާދިނީ ކޮން ބަޔެއްކަމަށާއި ލިބިފައިވަނީ ކިހާވަރެއްގެ އަނިޔާއެއް ކަމެއް އަދި ސާފެއް ނުވެއެވެ. ނަމަވެސް ޝިމާޒު ނިސްބަތްވާ މޯލްޑިވްސް ރިފޯމް މޫވްމަންޓް (އެމްއާރުއެމް)ން ކުރި ޓްވީޓެއްގައި ބުނެފައިވަނީ އެޕާޓީގެ ސްލޮޓެއްގައި ޓްރާންސްޕޯޓު މިނިސްޓްރީގެ ޑެޕިއުޓީ މިނިސްޓަރގެ މަޤާމުގައި ހުންނެވި ޝިމާޒަށް މަގުމަތިން ބަޔަކު ހަމަލާދީފައިވާތީ އެކަން ކުށްވެރި ކުރާކަމަށެވެ. އަދި ހަމަލާ ދިން މީހުން ހޯދައި، ކަމާއި ބެހޭ ފަރާތްތަކުން މިމައްސަލަ ތަހުޤީޤުކޮށް ފިޔަވަޅު އެޅުމަށްވެސް އެޕާޓީން ވަނީ ގޮވާލާފައެވެ.
ޝިމާޒަށް ހަމަލާދީފައިމިވަނީ ޝިމާޒުގެ ސައިކަލަށް ދާދި ފަހުން ގެއްލުންދީ، އިންޒާރުގެ މެސެޖުދީ، އާއިލާ މެމްބަރުންނަށް ގުޅައި އިންޒާރު ދީފައި ވަނިކޮށެވެ.
މިކަންކަން ފެންމަތިވެފައި މިވަނީ ޓްރާންސްޕޯޓް މިނިސްޓަރ އައިޝަތު ނަހުލާ ޝިމާޒް މަޤާމުން ވަކިކޮށްދެއްވަން އެދިވަޑައިގެން ރައީސް އޮފީހަށް ސިޓީ އެއް ފޮނުއްވާފައި ވަނިކޮށެވެ. ޝިމާޒު މަގާމުން ވަކިކޮށްދެއްވުމަށް އެދިވަޑައިގެން މިނިސްޓަރ ނަހުލާ ރައީސް އޮފީހަށް ސިޓީ ފޮނުއްވީ އެ ވުޒާރާގެ ތެރެއިން ހިންގާފައިވާ ކޮރަޕްޝަންގެ އަމަލެއްގައި ޝިމާޒުގެ ބައިވެރިވުން އޮތް ކަމަށް ތުހުމަތުކުރެވޭތީއެވެ.
ޝިމާޒަށް ބަޔަކު ހަމަލާދިނުމާއި ގުޅިގެން މިނިސްޓަރ ނަހުލާ ކުރެއްވި ޓްވީޓެއްގައި ވަނީ ޝިމާޒަށް ދިން ހަމަލާ ހަރުކަށި އިބާރާތުން ކުއްވެރި ކުރައްވާފައެވެ. މައްސަލަތައް ބަލަމުންދާ ދަނޑިވަޅުގައި މިކަމަށް އެކި ގޮތްގޮތުން ނުފޫޒު ފޯރުވަން މަސައްކަތްކޮށް، މިކަމުގެ ތެރޭގައި މިނިސްޓަރުގެ އާއިލާ އަށް ނިސްބަތްކޮށް ދެކެވޭ ވާހަކަތަކަކީ އަބުރު ކަތިލިމުގެ ހުތުރު އަމަލުތަކެއްކަމަށް މިނިސްޓަރ ވަނީ ވިދާޅުވެފައެވެ. ކޮރަޕްޝަން ހުއްޓުވުމަށް ކުރަންޖެހޭ މަސައްކަތް ފަސްޖެހުމެއްނެތި ކުރައްވާނެކަމަށްވެސް މިނިސްޓަރ ވިދާޅުވިއެވެ.
މިނިސްޓަރ ނަހުލާ ވަނީ ޝިމާޒަށް، ގަވާއިދާ ހިލާފަށް ވެހިކަލް ރަޖިސްޓްރީކޮށްދިނުން ފަދަ ކޮރަޕްޝަންގެ ބޮޑެތި ކުށްތަކާއި މިނިސްޓްރީގެ ސިޔާސީ މީހުންގެ އަބުރު ކަތިލުމުގެ ތުހުމަތުކުރައްވާފައެވެ. ޝިމާޒް އަލީއަށް ފިޔަވަޅު އަޅަން ޖެހޭތޯ ބެލުމަށް ފަހު އެކަން ކުރަން ޖެހޭ ނަމަ އަޅަން ޖެހޭ ފިޔަވަޅެއް އަޅާނެ ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވަނީ ވިދާޅުވެފައެވެ.
ޝިމާޒަކީ އެމްއާރުއެމްގެ ސްލޮޓެއްގައި މަގާމުގައި ހުރި ފަރާތަކަށްވާތީ އެމްއާރުއެމްގެ އެތެރޭގެ އުސޫލުތަކާއި އެއްގޮތްވާ ގޮތުގެމަތިން މި ތުހުމަތުތަކާއި ގުޅޭގޮތުން އިތުރު މައުލޫމާތު ސާފުކޮށް ޝިމާޒުއަށް ޖަވާބުދާރީވުމުގެ ފުރުސަތު ދިނުމަށްފަހު ޕާޓީން ގޮތެއް ނިންމާނެކަމަށް ވެސް އެ ޕާޓީން ވަނީ ބުނެފައެވެ.
މަޤާމުގެ ނުފޫޒު ބޭނުންކޮށްގެން ވެހިކަލްތަކުގެ ނަމްބަރު ޕްލޭޓް ބަދަލުކުރުމަށް ކުންފުންޏަށް އެހީތެރިވުމާއި ގުޅިގެން ޓްރާންސްޕޯޓް މިނިސްޓްރީގެ އިސް ބައެއް މުވައްޒަފުންނާއި ގުޅުން ހުރި މައްސަލަ އެއް އޭސީސީ އިން ވަނީ ބަލާފައެވެ.
