މޫސުން ގޯސްވާނެ ކަމަށް ލަފާކުރެވޭތީ ބައެއް ހިސާބުތަކަށް ވައިޓް އެލަރޓް ނެރެފި
ކ.އަތޮޅުން ފެށިގެން އައްޑޫ ސިޓީއަށް މިރޭ މެންދަމު އެކެއް ޖެހުމާ ހަމައަށް ވައިޓް އެލަރޓް ވަނީ ނެރެފައި
ސުނާމީ ބިނާ ސަރަހައްދު
މޫސުން ގޯސްވާނެ ކަމަށް ލަފާކުރެވޭތީ ބައެއް ހިސާބުތަކަށް ވައިޓް އެލަރޓް ނެރެފިއެވެ.
މޫސުމާއި ބެހޭ އިދާރާއިން ވަނީ ރާއްޖެއަށް މިހާރު ކުރަމުންދާ ހުޅަނގު މޫސުމުގެ ވިއްސާރަ އާއި ގުޅިގެން ކުރިއަށް އޮތް 24 ގަޑިއިރު ރާއްޖޭގެ އެކި ހިސާބުތަކަށް ބޯކޮށް ވާރޭވެހި ގުގުރާނެ ކަމަށް ލަފާކުރެވޭތީ ކ.އަތޮޅުން ފެށިގެން އައްޑޫ ސިޓީއަށް މިރޭ މެންދަމު އެކެއް ޖެހުމާ ހަމައަށް ވައިޓް އެލަރޓް ނެރެފައެވެ. އަދި މޫސުން ގޯސްވާނެ ކަމަށް ލަފާކުރެވޭތީ ހުރިހާ ފަރާތްތަކުން ވެސް މޫސުމަށް ސަމާލުވުމަށް މޫސުމާބެހޭ އިދާރާއިން ވަނީ އިލްތިމާސްކޮށްފައެވެ.
އެގޮތުން ހުކުރު ދުވަހުގެ 19:00 އިން މެންދަމު01:00 އާއި ހަމައަށް، ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައިޖެހޭނެ ކަމަށް އެ އިދާރާއިން ވަނީ ލަފާކޮށްފައެވެ. އަދި ވިލާގަނޑުގައި ގަޑިއަކު 40 މޭލަށް ވައިގަދަވާނެކަމަށް ލަފާކޮށްފައިވެއެވެ. މެޓް އޮފީހުން ވަނީ އާންމުކޮށް ރާޅުގެ އުސްމިން އުޅޭނީ 3 ފޫޓާ 6 ފޫޓާ ދެމެދުގައިކަމަށް ވެސް ބުނެފައެެވެ.
ފާއިތުވި 24ގަޑިއިރަށް ބަލާއިރު އެންމެ ގިނައިން ވާރޭވެހިފައިވާ ކަމަށް ރެކޯޑްކުުރެވިފައި ވަނީ ފ.ނިލަންދޫއަށެވެ. އެ ރަށަށް 110.8 މިލިމީޓަރުގެ ވާރޭ ވެހިފައިވެއެވެ.
