ޑިކްލެެއަރނުކުރާ 9 މިލިއަން ރުފިޔާ އަށްވުރެ ގިނަ ފައިސާ ހިފަހައްޓާފައިވޭ
18 ނޮވެމްބަރު 2022 | ހުކުރު 07:17ޖުމްލަ 9 މައްސަލައެއް ތަހްޤީގްކޮށްފައިވޭ
ކަސްޓަމްސް އިން އަތުލައިގަނެފައިވާ ފައިސާ
2019 އިން ފެށިގެން 2022 ގެ ސެޕްޓެމްބަރު މަހުގެ ނިޔަލަށް ކަސްޓަމްސްއަށް ޑިކްލެެއަރނުކުރާ 9 މިލިއަނަށްވުރެ ގިނަ ފައިސާ ހިފަހައްޓާފައިވާ ކަމަށް ކަސްޓަމްސް އިން ހާމަކޮށްފިއެވެ.
ރައީސް އިބްރާހީމް މުހައްމަދު ޞާލިހުގެ ސަރުކާރަށް 4 އަހަރު ފުރުމާއި ގުޅިގެން، ކަސްޓަމްސް އިން ނެރެފައިވާ ތަފާސް ހިސާބުތައް ދައްކާގޮތުން ޑިކްލެރއަރ ނުކޮށް ރާއްޖެއަށް ފައިސާ އެތެރެ/ބޭރުކުރަން އުޅެނިކޮށް 9 މިލިއަން ރުފިޔާ އަށްވުރެ ގިނަ ފައިސާ ހިފަހައްޓާފައިވެއެވެ. އަދި ޖުމްލަ 9 މައްސަލައެއް ތަހްޤީގްކޮށްފައިވާކަމަށް ކަސްޓަމްސް އިން ބުނެއެވެ.
ކަސްޓަމްސްގެ ހިސާބުތައް ދައްކާގޮތުން 2019 ވަނަ އަހަރު 179،287 އެމެރިކާ ޑޮލަރާއި، 5415 ޔީރޯ އަދި 3،411،129 ދިވެހި ރުފިޔާ ވަނީ ހިފަހައްޓާފައެވެ. 2020 ވަނަ އަހަރު 139،700 އެމެރިކާ ޑޮލަރު ވަނީ ހިފަހައްޓާފައެވެ. މީގެ އިތުރުން 2021 ވަނަ އަހަރު 1،148،278 ދިވެހި ރުފިޔާ ވަނީ ހިފަހައްޓާފައެވެ. ކަސްޓަމްސް އިން ބުނީ 2022 ވަނަ އަހަރުގެ ޖެނުއަރީ މަހުން ފެށިގެން ސެޕްޓެމްބަރު މަހުގެ ނިޔަލަށް އެއްވެސް ފައިސާއެއް ހިފަހައްޓާފައި ނުވާކަމަށެވެ.
ކަސްޓަމްސް އަށް ޑިކްލެއަރ ނުކޮށް ރާއްޖެއަށް ފައިސާ އެތެރެ/ބޭރު ކުރަން އުޅެނިކޮށް ހިފަހައްޓާ ތަހުގީގުކުރެވުނު މައްސަލަތަކުގެ އަދަދަށް ބަލާއިރު، 2019 ވަނަ އަހަރު 6 މައްސަލަ، 2020 ވަނަ އަހަރު 2 މައްސަލަ އަދި 2021 ވަނަ އަހަރު 1 މައްސަލަ ވަނީ ތަހުގީގުކޮށްފައެވެ. 2022 ވަނަ އަހަރުގެ ޖެނުއަރީ މަހުން ފެށިގެން ސެޕްޓެމްބަރު މަހުގެ ނިޔަލަށް އެއްވެސް މައްސަލައެއް ތަހުގީގު ނުކުރެއެވެ.
2019ން 2022ށް ކަސްޓަމްސްއަށް ޑިކެލެއަރ ނުކޮށް ރާއްޖެއަށް ފައިސާ އެތެރެ/ބޭރު ކުރަނަ އުޅެނިކޮށް ހިފެހެއްޓިފައިވާ މީހުން ނިސްބަތްވާ ގައުމުތަކުގެ ތެރޭގައި ހިމެނެނީ އިންޑިއާގެ 2 މީހަކާއި، ބަންގުލަދޭޝްގެ 3 މީހެއްގެ އިތުރުން ރާއްޖޭގެ 3 މީހުންނެވެ. 2022 ވަނަ އަހަރުގެ ޖެނުއަރީ މަހުން ފެށިގެން ސެޕްޓެމްބަރު މަހުގެ ނިޔަލަށް އެއްވެސް މީހަކު ހިފަހައްޓާފައި ނުވެއެވެ.
މަނީ ލޯންޑަރިން އަދި ޓެރަރިޒަމަށް ފައިނޭންސް ކުރުން ހުއްޓުވުމާއި ބެހޭ ޤާނޫނަށް ގެނައި ދެވަނަ އިސްލާހުގައި ބުނެފައިވާ ގޮތުން، 17 ޖެނުއަރީ 2021 އިން ފެށިގެން 10،000 އެމެރިކާ ޑޮލަރަށްވުރެ ނުވަތަ އެއާ އެއްވަރުގެ އަދަދަކަށް ދިވެހި ރުފިޔާ ނުވަތަ އެހެން ފައިސާއެއް އެތެރެ/ބޭރު ކުރާނަމަ ކަސްޓަމްސްގައި ޑިކްލެއަރ ކުރަންޖެހެއެވެ.
