ފެނަކައިން ކަރަންޓު މީޓަރު ޓެސްޓު ކުރުމުގެ ޚިދުމަތް އިފްތިތާހުކޮށްފިއެވެ.

މިކަމަށްޓަކައި ބުރާސްފަތި ދުވަހު ބޭއްވި ރަސްމިއްޔާތެއްގައި މި ޚިދުމަތް އިފްތިތާހުކޮށްދެއްވީ އެކުންފުނީގެ ޗެއަރމަން މުހައްމަދު ރަޝީދު އަދި މެނޭޖިންގ ޑިރެކްޓަރު އަހުމަދު ސައީދު މުހައްމަދެވެ.

މި ޚިދުމަތަށް ފެނަކައިގައި ގާއިމްކޮށްފައިވަނީ އެންމެ ޒަމާނީ އަދި އިންޓަރނޭޝަނަލް ސްޓެންޑަރޑްތަކަށް ފެތޭ މީޓަރު ޓެސްޓް ބެންޗެކެވެ. އަދި މި ފެސިލިޓީ ވަނީ ގާއިމްކޮށްފައެވެ.

ފެނަކައިން ބުނީ ފެނަކައިން މި ޚިދުމަތް ފެށުމުން އާންމުންނަށް ވަރަށް ބޮޑެތި ލުއިތަކެއް ލިބިގެންދާނެ ކަމަށެވެ. މިގޮތުން މުޅި ރާއްޖެ މީޓަރު ޓެސްޓުކުރުމަށް އެއް ފަރާތެއްގެ މައްޗަށް ވެފައިވާ ބަރޯސާއަށް ނިމުމެއް އައިސް، ރާއްޖޭގެ އެކި ސަރަހައްދުތަކަށް ފަސޭހަކަމާ އެކު ޚިދުމަތް ދެވިގެންދާނެ ކަމަށެވެ.

މީޓަރު ޓެސްޓްކުރުމަށް އެދޭތާ 3 ގަޑިއިރާ 6 ގަޑިއިރުގެ ތެރޭގައި މީޓަރު ޓެސްޓްކޮށް ނިމޭނެ ކަމަށާއި، މީޓަރު ޓެސްޓުކުރުމުގެ ޚިދުމަތް ހޯދުމަށް ރައްޔިތުން ހޭދަކުރަންޖެހޭ ވަގުތު ކުޑަވެގެންދާނެ ކަމަށް ފެނަކައިން ބުނެފައިވެއެވެ. އަލަށްއަލަށް ކަރަންޓުލުމުގެ ޚިދުމަތް އަވަސް ވާނެއެވެ.

ފެނަކައިން ބުނީ މި ޚިދުމަތާއެކު ކުރިމަގުގައި ރާއްޖޭގެ އެކި ސަރަހައްދުތަކުގައި މި ފަދަ ވަސީލަތްތައް ގާއިމުވެގެންދާނެ ކަމަށެވެ. އަދި 01 ގަޑިއިރު ތެރޭގައި މަދުވެގެން 75 މީޓަރު ޓެސްޓް ކުރެވިގެންދާނެކަން އެކުންފުނިން ވަނީ ފާހަގަކޮށްފައެވެ.

މި ރަސްމިއްޔާތުގައި ވާހަކަދައްކަވަމުން ފެނަކައިގެ އެމްޑީ ސައީދު ވިދާޅުވީ މިއީ ވަރަށް ކުރީއްސުރެ ކުރަން އަމާޒުހިފާފައިވާ މަސައްކަތެއް ކަމަށެވެ. މި ޚިދުމަތާއެކު ރައްޔިތުންނަށް ފަސޭހަތަކެއް ވާނެކަން ސައީދު ވަނީ ފާހަގަކުރައްވާފައެވެ. އަދި މި ޚިދުމަތް ހޯދުމަށް މީގެ ކުރިން ގިނަ ދުވަސްތަކެއް ހޭދަވެފައިވާއިރު މިކަންވެސް މާޒީވެ ގޮސްފައިވާކަމަށް ސައީދު ވިދާޅުވިއެވެ.