ޤައުމީ ބިލިއާޑް މުބާރާތުގެ ޓީމު އިވެންޓުގެ ފައިނަލްގައި އީގަލްސް އާއި ސިފައިން

ޤައުމީ ބިލިއާޑް މުބާރާތުގެ ޓީމު އިވެންޓުގެ ފައިނަލުން އެންމެ ފަހުގެ ޗެމްޕިއަންސް ކުލަބް އީގަލްސް އާއި ދިވެހި ސިފައިންގެ ކުލަބް ޖާގަ ހޯދައިފިއެވެ.

މުބާރާތުގެ ފައިނަލުން ސިފައިން ޖާގަ ހޯދީ ފުރަތަމަ ސެމީ ފައިނަލްގައި އެންމެ ފަހުގެ ޗެމްޕިއަން އީގަލްސް ބަލިކޮށްގެންނެވެ. އީގަލްސްގެ މައްޗަށް ސިފައިން ކުރި ހޯދީ 3-0 އިންނެވެ. މެޗުގެ ފުރަތަމަ ސިންގަލްސްގައި ސިފައިންގެ ވަލަރިއާނޯ ވަނީ 7-3 އިން އީގަލްސްގެ މިގުއެލް ބަލިކޮށްފައެވެ. ދެ ވަނަ ސިންގަލްސްގައި ސިފައިންގެ ހުސެއިން ފަޔާޒް އީގަލްސްގެ ހަސަން ޝާޒް މުހައްމަދުގެ މައްޗަށް ކުރި ހޯދީ 7-4 އިންނެވެ. ތިން ވަނަ ޓޭބަލްގައި ކުޅުނީ ޑަބަލްސްއެވެ. ޑަބަލްސްގައި ސިފައިންގެ އަފީފް އަދި ދުންޔާޒްގެ ޕެއާ އިން ވަނީ 7-4 އިން އީގަލްސްގެ އަހުސަން އަދި އައްބާސްގެ ޕެއާ ބަލިކޮށްފައެވެ. މެޗު ކާމިޔާބުކޮށް ސިފައިން ފައިނަލަށް ދިޔަ އިރު، އީގަލްސް އަށް ޖެހުނީ ދެ ވަނަ ސެމީ ކުޅޭށެވެ.

އީގަލްސްއާ ދެކޮޅަށް ދެ ވަނަ ސެމީ ކުޅޭނެ ޓީމެއް ކަނޑައެޅީ ނޮކްއައުޓް މެޗުންނެވެ. އެ މެޗުގައި ބައްދަލުކުރީ ކަސްޓަމްސް ރެކްރިއޭޝަން ކުލަބާއި މާޒިޔާ ސްޕޯޓްސް އެންޑް ރެކްރިއޭޝަން ކުލަބްއެވެ. ވާދަވެރި ކުޅުމަކަށްފަހު ކަސްޓަމްސް އިން މެޗު ކާމިޔާބުކުރީ 3-2 އިންނެވެ. މެޗުން ކަސްޓަމްސް މޮޅުވީ މާޒިޔާ އިން ފުރަތަމަ ދެ ޓޭބަލް ކާމިޔާބުކޮށްފައި ވަނިކޮށް، ޖެހިގެން އައި ތިން ޓޭބަލް ކާމިޔާބުކޮށްގެންނެވެ.

ދެ ވަނަ ސެމީގައި އީގަލްސް އިން ވަނީ 3-0 އިން ކަސްޓަމްްސް ބަލިކޮށް ފައިނަލްގެ ފަހު ޖާގަ ހޯދާފައެވެ. މެޗުގެ ފުރަތަމަ ސިންގަލްސްގައި އީގަލްސްގެ މިގުއެލް ވަނީ 7-4 އިން ސިފައިންގެ އަހުމަދު ރަމްޒީ ބަލިކޮށްފައެވެ. ދެ ވަނަ ސިންގަލްސްގައި ކަސްޓަމްސްގެ ހުސެއިން ޝައްމާންގެ މައްޗަށް އީގަލްސްގެ ހަސަން ޝާޒް މުހައްމަދު ވެސް ކުރި ހޯދީ 7-4 އިންނެވެ. ތިން ވަނަ ޑޭބަލްގައި ކުޅުނު ޑަބަލްސްގައި އީގަލްސްގެ ސާހިލް އަދި އާފީ ވަނީ 7-5 އިން ކަސްޓަމްސްގެ ޖީހަން އަދި ހިޝާމް ބަލިކޮށްފައެވެ.

މުބާރާތުގެ ފައިނަލްގައި ސިފައިންނާއި އީގަލްސް ބައްދަލު ކުރާ މެޗު އޮންނާނީ ހުކުރ ދުވަހުގެ ރޭގައެވެ.