ބައިނަލްއަޤުވާމީ ރަހުމަތްތެރިކަމުގެ މެޗުގައި ޔުނައިޓެޑް އަރަބް އެމިރޭޓްސް (ޔޫއޭއީ) ބަލިކޮށް އާޖެންޓީނާ އިން އިޓަލީގެ ރެކޯޑާ ގާތަށް ޖެހިލައިފިއެވެ.

މިއީ މި މަހުގެ 20 ވަނަ ދުވަހު ފަށާ ފީފާ ވޯލްޑް ކަޕް މުބާރާތަށް ތައްޔާރުވުމުގެ ގޮތުން އާޖެންޓީނާ އިން ކުޅުނު ރަހުމަތްތެރިކަމުގެ މެޗެކެވެ. އެ މެޗު އާޖެންޓީނާ އިން ކާމިޔާބުކުރީ 5-0 އިންނެވެ.

މެޗުގައި ފުރަތަމަ ހާފުގައި ވެސް އާޖެންޓީނާ އިން ވަނީ ހަތަރު ލަނޑު ޖަހާފައެވެ. އާޖެންޓީނާގެ ފުރަތަމަ ލަނޑު މެޗުގެ 17 ވަނަ މިނެޓުގައި ޖެހީ ހޫލިއަން އަލްވަރޭޒްއެވެ. އެ ޓީމުގެ ޖެހިގެން އައި ދެ ލަނޑު ވެސް ޖެހީ އެންހެލް ޑިމާރިއާއެވެ. އެއީ މެޗުގެ 25 ވަނަ މިނެޓާއި 36 ވަނަ މިނެޓުގައި އޭނާ ޖެހި ލަނޑުތަކެވެ. އާޖެންޓީނާގެ ހަތަރު ވަނަ ލަނޑު ފުރަތަމަ ހާފު ނިމެން މިނެޓަކަށްވެފައި ވަނިކޮށް ޖެހީ ކެޕްޓަން ލިއޮނެލް މެސީއެވެ. އެ ޓީމުގެ ފަހު ލަނޑު ދެ ވަނަ ހާފުގެ 60 ވަނަ މިނެޓުގައި ޖެހީ ޔަކީން ކޮރެއާއެވެ.

މި މޮޅާއެކު އާޖެންޓީނާ އިން ވަނީ އެންމެ ފަހުން ކުޅުނު 36 މެޗުން ބަލިނުވެ ނިންމާލާފައެވެ. އެންމެ ގިނަ މެޗުން ބަލިނުވެ ރެކޯޑު އޮތީ އިޓަލީ އަތުގައެވެ. އެ ޓީމު ވަނީ ބަލިނުވެ 37 މެޗު ހަމަކޮށްފައެވެ. އެ ރެކޯޑު މުގުރާލުމަށް އާޖެންޓީނާ އަށް ބޭނުންވަނީ ދެ މެޗުން ބަލިނުވެ ފަރުޖައްސާލުމެވެ.