ބްރިޖް ޕްލެޓްފޯމް ފަރަށް އެރުން: 69.4 މިލިއަން ރުފިޔާ އަށް ވުރެ ބޮޑު އަދަދަކުން އެފްކޮންސް ޖޫރިމަނާކޮށްފި
16 ނޮވެމްބަރު 2022 | ބުދަ 14:37އެ ޕްލެޓްފޯމް ފުންކޮށް ނަގާފައި ވަނީ އޮގަސްޓް މަހުގެ 28 ވަނަ ދުވަހު
ފަރަށް އަރާފައިވާ ޕްލެޓްފޯމު ނަގައިފި
ތިލަމާލެ ބްރިޖްގެ ޖިއޯ ޓެކްނިކަލް ދިރާސާތަކަށް ގެނެސްފައިވާ "ސެލްފް އެލިވޭޓިންގ ޕްލެޓްފޯމް" (އެސްއީޕީ)، ވިލިމާލެ ފަރަށް އެރުމުގެ ސަބަބުން ލިބުނު ގެއްލުންތަކާއި ގުޅިގެން ބްރިޖުގެ މަސައްކަތްކުރަމުންދާ އެފްކޮންސް ކުންފުނި 69 މިލިއަން ރުފިޔާ އަށް ވުރެ ބޮޑު އަދަދަކުން ޖޫރިމަނާކޮށްފިއެވެ.
އެންވަޔަރަަމެންޓް ޕްރޮޓެކްޝަން އެޖެންސީ (އެފްޕީއޭ) އިން ނެރުނު ބަޔާނެއްގައި ބުނެފައި ވަނީ ބްރިޖް ޕްލެޓްފޯމް ފަރަށް އެރުމާއި ގުޅިގެން 69،411،800.00 (ފަސްދޮޅަސް ނުވަ މިލިއަން ހަތަރުލައްކަ އެގާރަ ހާސް އަށްސަތޭކަ) ދިވެހި ރުފިޔާއިން އެފްކޮންސް އިންފްރާސްޓްރަކްޗަރ ލިމިޓެޑް ޖޫރިމަނާ ކޮށްފައިވާ ކަމަށެވެ. އީޕީއޭ އިން ވަނީ ސަރުކާރު ބަންދު ދުވަސްތައް ހިމެނޭހެން 30 ދުވަހުގެ ތެރޭގައި އެ ފައިސާ އީޕީއޭ އަށް ދެއްކުމަށް އެފްކޮންސް އަށް އަންގާފައެވެ. އެފްކޮންސް އަށް އެ އެންގުން އަންގާފައި ވަނީ މި ހިނގާ ނޮވެމްބަރު މަހުގެ 13 ވަނަ ދުވަހުއެވެ.
އީޕިއޭ އިން ނެރުނު ބަޔާނެއްގައި ބުނެފައި ވަނީ ޕްލެޓްފޯމުގެ ވެރިފަރާތާއި އެ އިދާރާ ގުޅިގެން ސަރވޭއެއް ކުރި ކަމަށާއި، 14-22 އޮކްޓޯބަރ އަށް އެފްކޮންސް އިން ކުރި ދިރާސާގައި އެ އެޖެންސީގެ އޮބްޒަރވަރުން ބައިވެރިވެފައިވާނެ ކަމަށެވެ. އެގޮތުން ބެލި ބެލުމުން، ޕްލެޓްފޯމްގެ ބައިތަކުންނާއި އެތަކެތި ނެގުމަށް ކުރި މަސައްކަތުން އެ ސަރަހައްދުގެ ފަރުގެ އެކި ދިމަދިމާލުން އެކިވަރުގެ ގެއްލުން ލިބިފައިވާ ކަން އެނގިފައިވާ ކަމަށް އީޕީއޭ އިން ބުނެއެވެ. އީޕީއޭ އިން ބުނީ 2755 އަކަމީޓަރުގެ ސަރަހައްދަކަށް ގެއްލުން ލިބިފައިވާ ކަމަށް ކަނޑައަޅާފައިވާނެ ކަމަށެވެ.
އެ ޕްލެޓްފޯމް ފުންކޮށް ނަގާފައި ވަނީ އޮގަސްޓް މަހުގެ 28 ވަނަ ދުވަހު، އެ ޕްލެޓްފޯމް ފަރަށް އެރިތާ 12 ދުވަސް ފަހުންނެވެ.
