ކަރެކްޝަންސްގެ އިދާރީ ހިންގުން ހަރުދަނާ ކުރުމަށް ނިމިދިޔަ 4 އަހަރު ގިނަ މަސައްކަތްތަކެއް ކުރެވިފައިވާކަމަށް ކޮމިޝަނަރ އޮފް ޕްރިޒަންސް އަޙުމަދު މުޙައްމަދުފުޅު ވިދާޅުވެއްޖެއެވެ.
ބުދަ ދުވަހު އިސްކަންދަރު ކޮށީގައި ބޭއްވި ޖޮއިންޓް ނޫސްވެރިންގެ ބައްދަލުވުމުގައި ވާހަކަ ދައްކަވަމުން ސީޕީ ވިދާޅުވީ، އެމްސީއެސްގެ ބެލުމުގެ ދަށުގައި ތިބޭ ޤައިދީންނާއި ބަންދު މީހުންނަށް ބޭނުންވާ އަސާސީ ޚިދުމަތްތައް ފަހިކޮށްދިނުމަށް ގިނަ މަސައްކަތްތަކެއް ކުރެވިފައިވާ ކަމަށެވެ. އެގޮތުން ޖަލުތަކާއި ޕެރޯލްގެ ޤާނޫނުގެ ދަށުން އެކަމާ ގުޅޭ ޤަވާއިދު އެކުލަވާލެވި، ބައިނަލްއަޤުވާމީ މުއާހަދާތަކާއި މިންގަނޑުތަކާ އެއްގޮތަށް ކަންކަން އިންތިޒާމު ކުރެވެމުންދާކަން ސީޕީ ފާހަގަ ކުރެއްވިއެވެ.
ސީޕީ ވިދާޅުވީ، ޤައިދީންގެ ވަކީލު ބައްދަލުވުންތަކާއި، އާއިލީ އަދި އެކަހެރި ބައްދަލުވުންތައް ކުރިއަށްވުރެ ހަރުދަނާ ނިޒާމެއްގެ ތެރެއިން ބައްޓަން ކުރެވިފައިވާ ކަމަށެވެ.
ޖަލުގައި ހިންގޭ ޑްރަގް ރިހެބިލިޓޭޝަނަށް އަލިއަޅުވާލައްވާ ސީޕީ ވިދާޅުވީ، 32 ޤައިދީން ރިހެބިލިޓޭޓް ކުރެވި މުޖުތަމައަށް ނެރެފައިވާ ކަމަށާއި، އެ ފަރާތްތައް ރީ އިންޓެގްރޭޓް ކުރުމާއި، އެމީހުންގެ ކަންކަން ގާތުން ބެލުމުގެ މަސައްކަތްތައްވެސް ކޭސް ވޯކަރުން ކުރަމުންދާކަމަށެވެ.
ސީޕީ ވިދާޅުވީ، މާލޭ ޖަލާއި މާފުށީ ޖަލުގައި ސިއްޙީ ޚިދުމަތް ފޯރުކޮށްދިނުމަށް ރަޖިސްޓަރޑް މެޑިކަލް ސެންޓަރުތައް ޤާއިމު ކުރެވިފައިވާ ކަމަށާއި، ޤައިދީންނަށް ބޭނުންވާ އިމަރޖެންސީ ސިއްޙީ ފަރުވާ މިހާރުވެސް ފޯރުކޮށްދެމުންދާ ކަމަށެވެ.
އޭގެ އިތުރުން، އޮޕަރޭޝަން ހޭހަންގެ ތެެރެއިން 700 އެއްހާ ޤައިދީން މިހާރުވެސް އެކިއެކި ފަރުވާ ހޯދާފައިވާކަން ސީޕީ ފާހަގަ ކުރެއްވިއެވެ.
އެމްސީއެސްގެ އިދާރީ ހިންގުން ހަރުދަނާ ކުރުމަށްވެސް ވޭތުވެދިޔަ 4 އަހަރު ގިނަ މަސައްކަތްތަކެއް ކުރެވިފައިވާކަން ސީޕީ ފާހަގަ ކުރެއްވިއެވެ. އޭގެ ތެރޭގައި މަންޑޭލާ ރޫސްލްއަށް އަހުލުވެރި ކުރުވުމާއި، ބައިނަލްްއަޤުވާމީ މުއާހަދާތަކަށް އަހުލުވެރި ކުރުވުމަށް ހިންގިފައިވާ ތަމްރީނުތަކުގެ ތެރެއިން 1900ށް ވުރެ ގިނަ މުވައްޒަފުން ތަމްރީނު ކުރެވިފައިވާކަމަށް ސީޕީ ވިދާޅުވިއެވެ.
އޭގެ އިތުރުން، ޕެރޯލް ނިޒާމުގެ ދަށުން 223 މީހަކަށް ފުރުސަތު ފަހިކޮށްދެވިފައިވާކަމަށް ސީޕީ ވިދާޅުވިއެވެ.
