ކަސްޓަމްސް ބަލިކޮށް އެއް ވަނައިގައި ސިފައިން ސެމީ ފައިނަލަށް

މިހާރު ކުރިއަށްދާ ޤައުމީ ބިލިއާޑް މުބާރާތުގައި ކަސްޓަމްސް ރެކްރިއޭޝަން ކުލަބް ބަލިކޮށް، ދިވެހި ސިފައިންގެ ކުލަބުން އެއް ވަނައިގައި ސެމީ ފައިނަލުން ޖާގަ ހޯދައިފިއެވެ.

އަންގާރަ ދުވަހުގެ ރޭ ޤައުމީ ބިލިއާޑް ސެންޓަރުގައި ކުރިއަށް ދިޔަ މެޗުގައި ކަސްޓަމްސްގެ މައްޗަށް ސިފައިން ކުރި ހޯދީ 4-1 އިންނެވެ. މެޗުގެ ފުރަތަމަ ސިންގަލްސްގައި ކަސްޓަމްސްގެ އިސްމާއިލް ޖީހާން ވަނީ 7-1 އިން ސިފައިންގެ އަލީ ޝާވިންގެ މައްޗަށް ކުރި ހޯދާފައެވެ. ނަމަވެސް ޖެހިގެން އައި ސިންގަލްސް ކާމިޔާބުކޮށް ސިފައިން އުންމީދު ހޯދިއެވެ. ސިފައިންގެ ހުސެއިން ފަޔާޒް ވަނީ 7-3 އިން ކަސްޓަމްސްގެ ހިޝާމް މަޖީދު ބަލިކޮށްފައެވެ. އޭގެ ފަހުން ކުޅުނު ތިން ޓޭބަލް ވެސް ކާމިޔާބުކުރީ ސިފައިންނެވެ. ފުރަތަމަ ޑަބަލްސްގައި ސިފައިންގެ ޝަފްރާޒް އަދި ވަލަރިއާނޯގެ ޕެއާ ވަނީ 7-3 އިން ކަސްޓަމްސްގެ އަކްސަމް އަދި ނަފީލްގެ ޕެއާ ބަލިކޮށްފައެވެ. ދެ ވަނަ ޑަބަލްސްގައި ވާދަވެރި ކުޅުމަކަށްފަހު ސިފައިންގެ ޝަރީފް އަދި ފަތުހުﷲ ގެ ޕެއާ ވަނީ 7-6 އިން ކަސްޓަމްސްގެ އުސްވަތުﷲ އަދި ޒުބައިރުގެ ޕެއާ ބަލިކޮށްފައެވެ. ފަހު ޓޭބަލް ސިފައިންގެ އަފީފް އަދި ދުންޔާޒްގެ ޕެއާ ކާމިޔާބުކުރީ 7-1 ގެ ބޮޑު ތަފާތަކުންނެވެ.

މުބާރާތުގައި ކުލަބް އީގަލްސް ވަނީ އައިލެންޑާސް ހޯޕް ސްޕޯޓްސް ކުލަބް ބަލިކޮށް ދެ ވަނަ އަށް ޖެހިލައިފިއެވެ. އީގަލްސް އިން އައިލެންޑާސް ބަލިކުރީ 5-0 އިންނެވެ.

ލީގު އުސޫލުން ކުޅެވޭ ޓީމު އިވެންޓުގެ މެޗްތައް ނިމުނު އިރު އެއް ވަނައިގައި ސިފައިން އޮތީ ހަތަރު މެޗުން ނުވަ ޕޮއިންޓާއެކުއެވެ. ދެ ވަނައިގައި އޮތް އީގަލްސް އާއި ތިން ވަަނައިގައި އޮތް ކަސްޓަމްސް އަށް ވެސް ލިބެނީ ނުވަ ޕޮއިންޓެވެ. ނަމަވެސް ސިފައިން ކުރި ހޯދަނީ ފައިގާ ގޭމުންނެވެ. ހަތަރު ވަނައިގައި ތިން ޕޮއިންޓާއެކު މާޒިޔާ އޮތް އިރު، ފުލުގައި އޮތް އައިލެންޑާސް އަށް ޕޮއިންޓެއް ނުލިބެއެވެ.

ޓީމު އިވެންޓުގެ ފުރަތަމަ ސެމީ ފައިނަލްގައި ބައްދަލުކުރާނީ ސިފައިންނާއި އީގަލްސްއެވެ. ނޮކް އައުޓް މެޗުގައި ބައްދަލުކުރާނީ ކަސްޓަމްސް އާއި މާޒިޔާއެވެ. ފުރަތަމަ ސެމީން ބަލިވާ ޓީމާއި، ނޮކް އައުޓް މެޗުން މޮޅުވާ ޓީމާ ދެމެދު ދެ ވަނަ ސެމީއެއް ކުޅޭނެއެވެ.