އައިލެންޑާސް ބަލިކޮށް ކަސްޓަމްސް އަލުން އެއް ވަނަ އަށް

ޤައުމީ ބިލިއާޑް މުބާރާތުގެ ޓީމު އިވެންޓުގައި އައިލެންޑާސް ހޯޕް ސްޕޯޓްސް ކުލަބް ބަލިކޮށް، ކަސްޓަމްސް ރެކްރިއޭޝަން ކުލަބުން އަލުން އެއް ވަނަ އަށް ޖެހިލައިފިއެވެ.

ހޯމަ ދުވަހުގެ ރޭ ޤައުމީ ބިލިއާޑް ސެންޓަރުގައި ކުޅުނު މެޗުން ކަސްޓަމްސް ވަނީ 4-1 އިން އައިލެންޑާސް ބަލިކޮށްފައެވެ. މެޗުގެ ފުރަތަމަ ސިންގަލްސްގައި އައިލެންޑާސްގެ އިސްމާއިލް ޝިޔާމް ވަނީ 2-7 އިން ކަސްޓަމްސްގެ ހިޝާމް މަޖީދު ބަލިކޮށްފައެވެ. ނަމަވެސް ކަސްޓަމްސް އިން ވަނީ ޖެހިގެން އައި ހަތަރު ޓޭބަލް ވެސް ކާމިޔާބުކޮށްފައެވެ. ދެ ވަނަ ސިންގަލްސްގައި ކަސްޓަމްސްގެ ހުސެއިން ސައްމާން ވަނީ އައިލެންޑާސްގެ އަހުމަދު މުއިއްޒު 7-6 އިން ބަލިކޮށްފައެވެ. ތިން ވަނަ ޓޭބަލްގައި ކުޅުނީ ޑަބަލްސްއެވެ. ފުރަތަމަ ޑަބަލްސްގައި ކަސްޓަމްްސްގެ ޖީހާން އަދި ރަމްޒީގެ ޕެއާ ވަނީ އައިލެންޑާސްގެ ރިޔާޒް އަދި ސާހީންގެ ޕެއާ 7-4 އިން ބަލިކޮށްފައެވެ. ދެ ވަނަ ޑަބަލްސްގައި ކަސްޓަމްސްގެ ނަފީލް އަދި އަކްސަމްގެ ޕެއާ ނުކުތީ އައިލެންޑާސްގެ ނިހާދު އަދި ރަޒީންގެ ޕެއާއާ ދެކޮޅަށެވެ. މި ޓޭބަލްސް ކަސްޓަމްސް އިން ކާމިޔާބުކުރީ 7-2 އިންނެވެ. ފަހު ޑަބަލްސްގައި ކަސްޓަމްސްގެ އުސްވަތުﷲ އަދި ޒުބައިރުގެ ޕެއާ ވަނީ 7-1 އިން އައިލެންޑާސްގެ އަޒްމަތު އަދި ސައީދުގެ ޕެއާ ބަލިކޮށްފައެވެ.

ހޯމަ ދުވަހުގެ ރޭ މާޒިޔާ ސްޕޯޓްސް އެންޑް ރެކްރިއޭޝަން ކުލަބް ބަލިކޮށް، ދިވެހި ސިފައިންގެ ކުލަބުން ވަނީ ތާވަލްގެ ދެ ވަނަ މަގާމަށް ޖެހިލައިފައެވެ. ސިފައިންގެ ޓީމުން މާޒިޔާގެ މައްޗަށް ކުރި ހޯދީ 4-1 އިންނެވެ.

ކުޅުނު ތިން މެޗުން ވެސް މޮޅުވެ ނުވަ ޕޮއިންޓާއެކު އެއް ވަނައިގައި އޮތީ ކަސްޓަމްސްއެވެ. ދެ ވަނައިގައި އޮތް ސިފައިނަށް ލިބެނީ ހަ ޕޮއިންޓެވެ. ތިން ވަނައިގައި އޮތް އީގަލްސް އަށް ވެސް ހަ ޕޮއިންޓު ލިބޭއިރު، ސިފައިން ކުރި ހޯދަނީ ފައިދާ ގޭމުންނެވެ. ހަތަރު ވަނައިގައި މާޒިޔާ އޮތީ ކުޅުނު ހަތަރު މެޗުން ތިން ޕޮއިންޓު ހޯދައިގެންނެވެ. ޕޮއިންޓެއް ނުލިބި ފުލުގައި އޮތީ އައިލެންޑާސްއެވެ.