ވޯލްޑް ކަޕްގައި ވާދަކުރުމަށް އިރާން ޓީމު ޤަތަރަށް

ފީފާ ވޯލްޑް ކަޕްގައި ވާދަކުރާ އިރާން ޓީމު ޤަތަރަށް ގޮސްފިއެވެ.

ޤަތަރުގެ ވެރި ރަށް ދޯހާ އަށް އިރާން ޓީމު ދިޔައީ ހޯމަ ދުވަހުގެ ވަގުތެއްގައެވެ. އިރާން ޓީމު ޤަތަރަށް ގޮސްފައިވާއިރު އެ ޤައުމު އޮތީ ސިޔަސީ ބޮޑު ހަލަބޮލިކަމެއްގެ ތެރޭގައެވެ. އުމުރުން 22 އަހަރުގެ މަޝާ އަމީނީ ނަމަކަށް ކިޔާ ކުއްޖަކު އެ ޤައުމުގެ ފުލުހުންގެ ބެލުމުގެ ދަށުގައި ހުއްޓާ މިދިޔަ މަހު ތެރޭގައި ވަނީ މަރުވެފައެވެ. އެކަމާ ގުޅިގެން އެ ޤައުމުގެ ސިޔާސީ މަސްރަހު އޮތީ ވަރަށް ބޮޑަށް ހޫނުވެފައެވެ. އެކަމުގެ އަސަރު އެ ޤައުމުގެ ފުޓުބޯޅަ އަށް ވެސް ވަނީ ކޮށްފައެވެ. އެކަމާ ގުޅިގެން ފީފާގެ ރައީސް އޭރު ވިދާޅުވީ، ވޯލްޑް ކަޕް މުބާރާތް ކުރިއަށްދާއިރު ސިޔާސީ ކަންކަން އެއް ފަރާތްކޮށް، ފުޓުބޯޅަ އަށް ސަމާލުކަން ދޭން ޖެހޭ ކަމަށެވެ.

އިރާން ޓީމުން ޤަތަރަށް ގޮސްފައިވާއިރު އެ ޤައުމުގެ ކޯޗު ކާލޮސް ކުއިރޯޒް މިހާރު ވަނީ 26 ކުޅުންތެރިންގެ ސްކޮޑު ވެސް އިއުލާންކޮށްފައެވެ. ކުއިރޯޒް އިރާންގެ ކޯޗުކަމާ ހަވާލުވީ ވެސް ވޯލްޑް ކަޕް މުބާރާތާ ދިމާކޮށެވެ. އެ ޤައުމުގެ ކޯޗުކަމަށް އޭނާ ހަމަޖައްސާފައިވަނީ މިއަހަރުގެ ސެޕްޓެމްބަރު މަހުގެ ތެރޭގައެވެ.

މުބާރާތުގައި އިރާން އޮތީ އިންގްލެންޑް، ވޭލްސް އަދި އެމެރިކާއާއެކު ގްރޫޕް ބީގައެވެ. މުބާރާތުގެ ގްރޫޕް ސްޓޭޖުގެ ފުރަތަމަ މެޗުގައި އިރާން ނުކުންނާނީ މި މަހުގެ 21 ވަނަ ދުވަހު އިންގްލެންޑާ ދެކޮޅަށެވެ. ދެ ވަނަ މެޗުގައި 25 ވަނަ ދުވަހު ވޭލްސްއާ ދެކޮޅަށް ނުކުންނައިރު، ގްރޫޕް ސްޓޭޖު ފަހު މެޗުގައި އެމެރިކާއާ ދެކޮޅަށް ނުކުންނާނީ 30 ވަނަ ދުވަހުއެވެ.