ހަޒާޑް ބޭނުންވަނީ ރެއާލްގައި މަޑުކުރަން، އޭނާ ބޭނުންވަނީ ފުރުސަތު

ބޭނުންވަނީ ސްޕެއިންގެ ރެއާލް މެޑްރިޑުގައި މަޑުކުރަން ކަމަށް އެ ޓީމަށް ކުޅެމުން އަންނަ ބެލްޖިއަމްގެ އެޓޭކިން މިޑްފީލްޑަރު އެޑެން ހަޒާޑް ބުނެފިއެވެ.

ހަޒާޑް މިހެން ބުނީ އޭނާގެ ކުރިމަގާ ގުޅޭ ގޮތުން ވާހަކަ ދައްކަމުންނެވެ. ރެއާލާއެކު ހަޒާޑް ހަދާފައިވާ އެއްބަސްވުމުގެ މުއްދަތު ހަމަވާނީ 2024 ވަނަ އަހަރުގެ ޖޫން މަހުގެ ނިޔަލަށެވެ. ޗެލްސީގައި މޮޅު ކުޅުމެއް ދެއްކުމަށް ފަހު، ރެއާލަށް ބަދަލުވި ނަމަވެސް ހަޒާޑަށް ވަނީ ފިޓްނަސްގެ މައްސަލަތަކާ ކުރިމަތިލާން ޖެހިފައެވެ.

މުސްތަޤުބަލާ ގުޅޭ ގޮތުން ވާހަކަ ދައްކަމުން ހަޒާޑް ބުނީ އޭނާ ރެއާލް ދޫކޮށްލަން ބޭނުންނުވާ ކަމަށެވެ. އެގޮތުން މި މަހު ޤަތަރުގައި ފަށާ ފީފާ ވޯލްޑް ކަޕަށްފަހު ވެސް އޭނާގެ ހާލަތު ބަދަލުވުމަކީ އެކަށީގެންވާ ކަމެއް ކަމަށެވެ. ހަޒާޑް ބުނީ އޭނާ އަަބަދު ވެސް ކުޅެން ބޭނުންވާ ކަމަށާއި، ނަމަވެސް ގޮތް ނިންމާނީ ކޯޗު ކަމަށެވެ. އޭނާ ފާހަގަ ކުރި ގޮތުގައި އެކަމަކީ ކޯޗުގެ އަތް މަތީގައި އޮންނަ ކަމެކެވެ. ހަޒާޑް ބުނީ އޭނާ އަށް ގިނައިން ކުޅުމުގެ ފުރުސަތު ހައްގުކަން ކޯޗަށް ސާބިތުކޮށްދޭން އޭނާ ބޭނުންވާ ކަމަށެވެ. ނަމަވެސް ކުޅުމުގެ ފުރުސަތު ނުލިބުމަކީ އުނދަގޫވާ ކަމެއް ކަމަށެވެ.

ރެއާލަށް ބަދަލުވެ ހަޒާޑް އެ ޓީމަށް ކުޅެދިން 72 މެޗުން އޭނާ އަށް ޖެހުނީ އެންމެ ހަތް ލަނޑެވެ. މިހާރު ކުރިއަށް ދާ ސީޒަންގައި ހަޒާޑް ކުޅެފައިވަނީ އެންމެ ހަ މެޗުގައެވެ. އޭނާ އަށް ޖެހުނީ އެންމެ ލަނޑެކެވެ. ރެއާލާއެކު އޭނާ ވަނީ ފަސް ތައްޓެއް ކާމިޔާބުކޮށްފައެވެ. އެއީ ސްޕެނިޝް ލީގާއި، ސްޕެނިޝް ސުޕަ ކަޕާއި، ޔުއެފާ ޗެމްޕިއަންސް ލީގު އަދި ޔުއެފާ ސުޕަ ކަޕެވެ.