ފިއޮރެންޓީނާ ބަލިކޮށް އޭސީ މިލާނަށް ދެ ވަނައިގައި ހަމަޖެހުމެއް

އިޓާލިއަން ލީގުގައި ފިއޮރެންޓީނާއާ ދެކޮޅަށް ކުޅުނު މެޗު ކާމިޔާބުކޮށް ޗެމްޕިއަން އޭސީ މިލާން ދެ ވަނައިގައި ހަމަޖެހުމެއް ހޯދައިފިއެވެ.

މިލާންގެ ދަނޑުގައި އާދިއްތަ ދުވަހުގެ ރޭ ފިއޮރެންޓީނާއާ ދެކޮޅަށް ކުޅުނު މެޗު އެ ޓީމުން ކާމިޔާބުކުރީ 1-2 އިންނެވެ.

މެޗުގައި ފުރަތަމަ ލަނޑު ޖަހާ ލީޑު ނެގީ ވެސް މިލާނުންނެވެ. މެޗު ފަށައިގެން ދެ ވަނަ މިނެޓުގައި ފްރާންސްގެ އޮލީވިއޭ ޖިރޫޑް ތަނަވަސްކޮށްދިން ފުރުސަތަކުން މިލާނަށް ލީޑު ނަގައިދިނީ ރަފައެލް ލިއޯއެވެ. ނަމަވެސް ފިއޮރެންޓީނާ އިން ވަނީ 28 ވަނަ މިނެޓުގައި ނަތީޖާ ހަމަހަމަކޮށްފައެވެ. ޖޮނަތަން އިކޯން ތަނަވަސްކޮށްދިން ފުރުސަތެއްގައި ފިއޮރެންޓީނާ އަށް ނަތީޖާ ހަމަހަމަ ކޮށްދިނީ އެންޓޮނިން ބަރަކްއެވެ.

ދެ ވަނަ ހާފަށް ނުކުމެ މިލާނުން ވަނީ އިތުރު ލަނޑެއް ޖަހާ ލީޑު ނެގުމަށް މަސައްކަތްކޮށްފައެވެ. މެޗުން މިލާން މޮޅުވީ މެޗުގެ ފުރިހަމަ ވަގުތު ހަމަވެ، އިތުރަށް ދެއްކި ވަގުތުގައި ފިއޮރެންޓީނާގެ ނިކޮލާ މިލެންކޮވިޗް އަތުން ބައިކޮޅަށް ވަތް ލަނޑުންނެވެ.

މެޗުން މޮޅުވުމުން މިލާން ދެ ވަނައިގައި އޮތީ ދެ ޕޮއިންޓުގެ ލީޑަކުންނެވެ. މިލާން ކުޅުނު 15 މެޗުން އެ ޓީމަށް ލިބެނީ 33 ޕޮއިންޓެވެ. ތިން ވަނައިގައި ޔުވެންޓަސް އޮތީ 31 ޕޮއިންޓާއެކުއެވެ. މިލާން އަތުން ބަލިވި ފިއޮރެންޓީނާ އޮތީ 19 ޕޮއިންޓާއެކު 10 ވަނައިގައެވެ.