ކޮވިޑުގެ ހާލަތުގައި ޓޫރިޒަމް މިނިސްޓްރީން ރާއްޖޭގެ ފަތުރުވެރިކަން ކުރިއަށް ގެންދިޔަ ގޮތުގެ ޑޮކިއުމަންޓެއް ތައްޔާރު ކުރަމުންދާ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ސަރުކާރަށް ހަތަރު އަހަރުފުރުމާއި ގުޅިގެން ރާއްޖެޓީވީއަށް ދެއްވި ޚާއްސަ ބަސްދީގަތުމެއްގައި ޓޫރިޒަމް މިނިސްޓަރު ވިދާޅުވީ ކޮވިޑުގެ ހާލަތުގައި ދިވެހިންގެ އެއްބައިވަންތަކަން ދައްކައިދިން ކަމަށާއި އޭގެން ފިލާވަޅުތައް ދައްކާ، މަގު ތަނަވަސްވި ކަމަށެވެ.
މިކަމުގެ ދިރާސާކޮށް، ލިޔުންތައް ލިޔެ، މުޅި ދުނިޔެ ހުއްޓުވާލި ވަގުތުގައި ވެސް ރާއްޖޭގެ ފަތުރުވެރިކަން ކުރިއަށް ގެންދިޔަ ގޮތް ލިޔަން ޖެހޭ ކަމަށާއި މިކަންތައްތަކުގެ ވާހަކަ ޑޮކިއުމަންޓު ނުކޮށްފި ނަމަ ހަނދާން ނުހުންނާނެ ކަމަށް ވެސް މިނިސްޓަރު ވިދާޅުވިއެވެ.
ކޮވިޑުގެ ހާލަތުގައި ރާއްޖޭގެ ފަތުރުވެރިކަން ކުރިއަށްދިޔަ ޑޮކިއުމަންޓު ކުރުމުގެ މަސައްކަތް ކުރިއަށްދާކަމަށް ވެސް މިނިސްޓަރު ވަނީ ފާހަގަކުރެއްވިއެވެ.
ކޮވިޑުގެ ހާލަތުގައި ގިނަ ގޮންޖެހުންތަކާއި ކުރިމަތިވިކަން ފާހަގަކުރައްވާ މިނިސްޓަރު މައުސޫމް ވިދާޅުވީ ރިސޯޓުތަކުގެ މުވައްޒަފުން އާއިލާއާ ދުރުގައި ރިސޯޓުގައި ބަންދުވެފައި އެއްއަހަރު ދުވަސް ތިބެން ޖެހުނު ކަމަށެވެ. އަދި އެންމެންގެ އެއްބައިވަންތަކަމާއެކު ކުރި މަސައްކަތުން މިކަމުން އަރައިގަނެވުނު ކަމަށެވެ.
މިނިސްޓަރު އިތުރަށް ވިދާޅުވީ ހަތަރު އަހަރުގެ ތެރޭގައި ފަތުރުވެރިކަމުގެ މަންފާއަށް ވަރަށް ގިނަ ކަންތައްތައް ކުރެވުނު ކަމަށެވެ. އަދި ރާއްޖޭގެ ފަތުރުވެރިކަން މިއަދު އޮތް ހިސާބަށްޓަކައި ވާސިލްވުމަށް ޕްރައިވެޓް ސެކްޓަރާއި ސަރުކާރުގެ ފަރާތުން ގިނަ މަސައްކަތްތަކެއް ކުރެވުނު ކަމަށެވެ.
މީގެއިތުރުން ފަތުރުވެރިކަމާއި އިގްތިސާދާމެދު އާ ވިސްނުމަކުން ވިސްނަންޖެހޭ ކަމަށް ވެސް މިނިސްޓަރު ވަނީ ދާދިފަހުން ވިދާޅުވެފައެވެ.
މިނިސްޓަރު ވިދާޅުވެފައިވަނީ، ބައިނަލްއަގުވާމީ މައިދާނުގައި، ވާދަވެރި މާހައުލެއްގައި ވިޔަފާރިކުރުންމަތީ ދެމިއޮތުމަށްޓަކައި، އަބަދުވެސް އިގްތިސާދީގޮތުން އެންމެ ރަނގަޅު ގޮތްތައް ޚިޔާރުކުރަން ޖެހޭކަމަށެވެ. ބައެއް ފަހަރު ގައުމިއްޔަތުގެ ރޫހުގައި، ރާއްޖެއަށް އެންމެ ރަނގަޅު ގޮތަކީ އެހެން ބަޔަކާ ނުގުޅި އަމިއްލައަށް އިގްތިސާދު ކުރިއެރުވުމަށް މަސައްކަތްކުރުން ކަމަށް ހީވެފައިވީ ނަމަވެސް، ދުނިޔޭގެ އިގްތިސާދަކީ އެކުވެ، ގުޅި ލާމެހިފައިވާ ކަމެއް ކަމަށެވެ. އެގޮތުން ރާއްޖޭގައި އުފެއްދުންތެރި ޚިޔާލުތަކާއި، ވިސްނުންތެރިކަން ހުރިނަމަވެސް، ރާއްޖެއަށް ބޭނުންވާ މާލީ އެހީތެރިކަން ހޯދުމަށް އެހެން މީހުންގެ އެހީތެރިކަން ބޭނުންވާނެކަމަށާއި، ބައެއް ފަހަރު ގައުމަށް އެންމެ ރަނގަޅު ގޮތަކީ އެންމެ މަގްބޫލު ނިންމުމަށް ނުވެދާނެކަމަށެވެ.
