އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސްގެ މަރުގެ މައްސަލައިގައި، އޭނާގެ ފިރިމީހާ މާވިން އެސްވައި ވާރގަސްއާއި އޭނާގެ ލޯބިވެރިޔާ ހަލީމަތު ލަމްހާގެ މައްޗަށް ހިންގާ ޝަރީއަތުގެ ހެކިބަސް ނެގުމުގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި އަޑުއެހުމުގައި 3 ހެތްކެއްގެ ހެކިބަސް ނަގާފައިވާއިރު، އެއީ ހައްތަހާވެސް ލަމްހާ ދަންނަ ފަރާތްތަކެވެ. އެގޮތުން ފުރަތަމަ ހެކިވެރިޔާ ބުނީ، ލަމްހާ އޭނާއާ ދިމާވީ ސޯޝަލް މީޑިއާއިން ކަމަށާއި، މެރީ މަރުވެގެން އުޅޭކަން ލަމްހާ އޭނާ ގާތުގައި ގުޅާފައި ބުނި ކަމަށެވެ.

ދައުލަތުން ހެކިވެރިޔާ ހުށައެޅި ސަބަބުތަކުގެ ތެރޭގައި ބުނާގޮތުގައި، މޭރީގެ މަރާގުޅޭ އަޕްޑޭޓް ބެލޭނީ ކިހިނެއްތޯ ލަމްހާ ވަނީ އެ ހެކިވެރިޔާއާ ސުވާލު ކޮށްފައެވެ. އޭގެ އިތުރުން ހެކިވެރިޔާއާ ކުރި ގިނަ ސުވާލުތަކަށް އޭނާ ބުނެފައިވަނީ ހަނދާނުގައި މިވަގުތު އެކަންކަން ނެތް ކަމަށެވެ.

ދެން ހާޒިރުކުރި ހެކިވެރިޔާއަކީ ލަމްހާގެ ރަށު މީހެކެވެ. އޭނާ ބުނާ ގޮތުގައި ލަމްހާ އޭނާއަށް ގުޅާފައި މޭރީ ދަންޖެހިގެން މަރުވެގެން އުޅޭ ކަމަށާއި، އެކަމާ ގުޅުވައި އޭނާ ހައްޔަރުކުރަން އުޅޭ ކަމުގެ ވާހަކަތަކެއް އިވޭކަމަށް ބުނެ، އެއީ ކިހިނެއްވާ ކަމެއްތޯ ބެލުމަށް ވަނީ އެދިފައެވެ. ނަމަވެސް އޭގެ ފަހުން އެކަމާ ގުޅޭގޮތުން އެދެމީހުންގެ ދެމެދުގައި ވާހަކަ ދެކެވިފައިނުވާކަމަށް ހެކިވެރިޔާ ބުނެއެވެ.

ތިންވަނައަށް ހާޒިރުކުރީވެސް ލަމްހާގެ އެކުވެރިއެކެވެ. އޭނާއަކީ އައިޖީއެމްއެޗުގައި މަސައްކަތް ކުރަމުންދިޔަ ނަރުހެކެވެ. އޭނާ ބުނާ ގޮތުގައި މާވިންއާ ވާހަކަ ދައްކާކަން ފިޔަވައި އެމީހުންގެ ގުޅުމާބެހޭ މާ ގިނަ ކަންކަމެއް އޭނާއަކަށް ނޭނގެއެވެ. ކަމެއް ހިނގައިގެން އުޅޭކަންވެސް އޭނާއަށް އެނގުނީ ވައިބަރ ގްރޫޕަކުންކަމަށް އެ ހެކިވެރިޔާ ބުންޏެވެ.

ހެކިންގެ ހެކިބަސް ނެގުމަށްފަހު ކުރިއަށްދިޔައީ މޭރީގެ މެޑިކަލް ލިއެކިއުންތަކާއި ގުޅޭގޮތުން ވާހަކަ ދެއްކުމެވެ. އެގޮތުން ދައުލަތުގެ ވަކީލު ވިދާޅުވީ، ޝަރީއަތުން ދެންނެވި ގޮތަށް ދައުލަތުން އައިޖީއެމް މެދުވެރިކޮށް އިތުރަށް ސާފު ކޮށްފައިވާ ކަމަށެވެ. އަދި މޭރީގެ ޑެތު ސަމަރީއާއި، ޑޮކްޓަރުންނާއި ނަރުހުން އަތުލިއުމުން ލިޔެފައިވާ ނޯޓުތަކާއި، އޭނާގެ ޕީސީއާރް ޓެސްޓުގެ ނަތީޖާއާއި، އޭނާގެ ސީޓީ ސްކޭން ފިޔަވައި އިތުރު ލިއުމެއް ނޯންނާނެ ކަމަށް އައިޖީއެމްއެޗުން ބުނެފައިވާކަން ދައުލަތުން ފާހަގަ ކުރިއެވެ.

އެކަމާ ގުޅޭގޮތުން ދިފާއުން ބުނީ، މޭރީ އިންކިއުބޭޓް ކުރެވުނުކަމަށް އެތަނުގައި އޭރު ހުރި އޭނާގެ ފިރިމީހާ މާވިން ބުނާ ކަމަށާއި، އިންކިއުބޭޓަރުން ހޮޅިތައް ނައްޓާލީވެސް ފޮރެންސިކް ޓީމުން އައުމުންކަމަށް އެ ފަރާތުން ބުނާއިރު، އެކަމާ ގުޅޭ އެއްވެސް ލިއެކިއުމެއް ނެތް ކަމަށެވެ. ވުމާއެކު، އަދިވެސް ދިފާއުން އެދެނީ އައިޖީއެމްއެޗުގެ ވެރިން ހާޒިރުކޮށްގެން އެކަންކަން އިތުރަށް ސާފު ކުރުމަށްކަމަށް ދިފާއީ ވަކީލުން ވިދާޅުވިއެވެ.

މި މައްސަލަ ބައްލަވާ ގާޒީ ހުސައިން ފާއިޒު ރަޝާދު ވިދާޅުވީ، އެ މައުލޫއަށް ވާހަކަ ދެއްކުމަށް ދެން ފުރުސަތު ނުދެއްވޭނެ ކަމަށާއި، އެކަންކަމާއި ގުޅިގެން ޝަރީއަތުން އިތުރަށް ބަލަންޖެހޭ ކަންކަން ބެއްލެވުމަށްފަހު ގޮތެއް ނިންމަވާނެ ކަމަށެވެ.

ދެން މި މައްސަލައިގެ އަޑުއެހުމެއް އޮންނާނީ 14 ނޮވެމްބަރުގައެވެ.