އިނގިރޭސި ޕްރިމިއަރ ލީގު ތާވަލްގެ ފުލުގައި އޮތް ނޮޓިންގހަމް ފޮރެސްޓް އަތުން ބަލިވެ, ޓޮޓެންހަމް އިނގިރޭސި ލީގު ކަޕުން ކަޓައިފިއެވެ.

ޕްރިމިއަރ ލީގު ތާވަލްގެ ހަތަރު ވަނާގައި އޮތް ޓޮޓެންހަމްގެ މައްޗަށް ނޮޓެންގހަމް ފޮރެސްޓުން ކުރި ހޯދީ 2-0 ނެވެ. އެޓީމުން ދެ ލަނޑުގެ ލީޑެއްގައި ވަނިކޮށް, 75 ވަނަ މިނެޓުގައި މަންގާލާއަށް ދެވަނަ ރީނދޫ ކާޑާއެކު ރަތްކާޑް ދެއްކުމުން ފަހު 15 މިނެޓު ކުޅުނީވެސް 10 ކުޅުންތެރިންނާއެކުއެވެ. އެކަމަކު ޓޮޓެންހަމްއަށް ނަތީޖާއެއް ނުނެރެވުނެވެ. މެޗުގައި ނޮޓިންގހަމް ފޮރެސްޓްގެ ދެ ލަނޑު ޖެހީ ލޯޑީއާއި ލިންގާޑެވެ. ފުރަތަމަ ލަނޑު ޖަހަން ފުރުޞަތު ތަނަވަސްކޮށްދިނީވެސް ލިންގާޑެވެ. މެޗަށް ޓޮޓެންހަމްގެ ކޯޗު ކޮންޓޭ ނެރުނީވެސް ހެރީ ކޭން ހިމެނޭ ގޮތަށް ވަރުގަދަ އެގާރައެވެ.

ޕްރިމިއަރ ލީގު ތާވަލްގައި ޓޮޓެންހަމް ހަތަރު ވަނާގައި އޮތީ 26 ޕޮއިންޓާއެކުއެވެ. ނޮޓިންގހަމް ފޮރެސްޓް އޮތީ 10 ޕޮއިންޓާއެކު ތާވަލްގެ ފުލުގައެވެ.