ސައޫދީ އަރަބިއްޔާގެ ވިސާގެ އުސޫލްތަކަށް ބަދަލުތަކެއް
9 ނޮވެމްބަރު 2022 | ބުދަ 14:09ބަދަލު ގެނެސްފައިވަނީ ސިންގަލް އެންޓްރީ ވިޒިޓް ވިސާއާއި ޓްރާންސިޓް ވިސާއަށް
ސައޫދީ އަރަބިއްޔާގެ ރަސްގެފާނު ސަލްމާން
އަންގާރަ ދުވަހު ބޭއްވުނު ސައޫދީ ކައުންސިލް އޮފް މިނިސްޓަރސް ބައްދަލުވުމެއްގައި އެގައުމުގެ ވިސާގެ އުސޫލުތަކަށް ބަދަލުތަކެއް ގެނައިކަން އިއުލާންކޮށްފިއެވެ.
ސަލްމާން ރަސްގެފާނު ރިޔާސަތު ބެލެހެއްޓެވި ކެބިނެޓް ބައްދަލުވުމުން ފާސްކުރި އެއްބަދަލަކީ ސިންގަލް އެންޓްރީ ވިޒިޓް ވިސާގެ މުއްދަތު ތިންމަސް ދުވަހަށް އިތުރުކުރުމެވެ. އެއީ ކޮންމެ ބޭނުމަކު ނަގާ ސިންގަލް އެންޓްރީ ވިޒިޓް ވިސާއެއްނަމަވެހެވެ. މީގެ އިތުރުން ޓްރާންސިޓް ވިސާވެސް އެއްވެސް ފީއަކާނުލައި 96 ގަޑިއިރަށް ދޭގޮތަށް ވަނީ ނިންމާފައެވެ.
މިހާތަނަށް އޮތް ގޮތުން ސިންގަލް އެންޓްރީ ފެމިލީ ވިޒިޓް ވިސާ ވެލިޑް ވަނީ 30 ދުވަހުގެ މުއްދަތަށް ކަމަށާއި މަލްޓިޕަލް އެންޓްރީ ވިސާގެ މުއްދަތަކީ 90 ދުވަސް ނުވަތަ ތިންމަސް ދުވަސްކަމަށް ސައޫދީ ގެޒެޓް ބުނެއެވެ.
