އެމްޑީޕީ އިން މިވަގުތު ވެރިކަމަށް ނެރެން ހުރި އެންމެ ރަނގަޅު ޕްރޮޑަކްޓަކީ ރައީސް ޞާލިހު: ރީކޯ މޫސަ

އެމްޑީޕީ އިން މިވަގުތު ވެރިކަމަށް ނެރެން ހުރި އެންމެ ރަނގަޅު ޕްރޮޑަކްޓަކީ މިހާރުގެ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ކަމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ކުރީގެ ޗެއާޕާސަން މޫސާ މަނިކު (ރީކޯ މޫސަ) ވިދާޅުވެއްޖެއެވެ.

ރާއްޖެޓީވީގެ ފަށާއިރު ޕްރޮގްރާމްގައި މޫސަ ވަނީ ރައީސް ސާލިހުގެ ޒައާމަތުގައި ކުރައްވާފައިވާ މަސައްކަތްތައް ރަނގަޅުކަމަށް ވިދާޅުވެ އެކަންކަމަށް ތައުރީފްކުރައްވާފައެވެ. މޫސަ ވިދާޅުވީ އެމްޑީޕީ އިން އެހެން ބޭފުޅަކު ވެރިކަމަށް ކުރިމަތިލެއްވިކަމުގައި ވީ ނަމަވެސް އެ ބޭފުޅެއްގެ ފަހަތްޕުޅުގައި ހުންނަވާނެ ކަމަށެވެ. އެހެންނަމަވެސް މަސައްކަތުގެ ޑެލިވަރީ ނުވަތަ މަސައްކަތްތައް ކޮށްދެއްވާފައިވާ މިންވަރަށް ބަލާއިރު ވެރިކަމަށް ކުރިމަތިލައްވަން އެންމެ ރަނގަޅު ބޭފުޅަކީ ރައީސް ޞާލިހު ކަމަށް މޫސަ ވިދާޅުވިއެވެ.

މީގެ އިތުރުން ރައީސް ނަޝީދު ކުރިއަށް އޮތް ރިޔާސީ އިންތިޚާބުގައި ވާދަކުރައްވާނެ ކަމަށް ފެނިވަޑައި ނުގަންނަވާކަމަށް މޫސަ ވިދާޅުވިއެވެ. އެގޮތުން ރައީސް ނަޝީދަކީ ބަރުލަމާނީ ނިޒާމަށް ތާއީދުކުރައްވާ ބޭފުޅެއް ކަމަށާއި އެމަނިކުފާނު ބޭނުންފުޅު ވަނީ ބޮޑުވަޒީރުކަމަށް ވަޑައިގަންނަވަންކަން މޫސަ ފާހަގަކުރެއްވިއެވެ.

އަދި އެމްޑީޕީ އިން ކޮންމެ ބޭފުޅަކު އިންތިޚާބަށް ވާދަކުރެއްވިކަމުގައި ވީ ނަމަވެސް އެކުގައި މަސައްކަތްކުރުމަކީ މުހިންމު ކަމެއް ކަމަށް މޫސަ ވިދާޅުވިއެވެ. މޫސަ ވިދާޅުވީ އެމްޑީޕީ އަކީ ޚިޔާލުތަފާތުވުންތަކާ އެކު މަސައްކަތް ކުރެވޭނެ ޕާޓީއެއްކަން ފާއިތުވެދިޔަ ތަނުގައި އެ ޕާޓީ އިން ސާބިތުކޮށްދީފައިވާ ކަމަށާއި އެމްޑީޕީ އަކީ ރާއްޖޭގެ ރައުސުލް މާލެއްކަމަށެވެ. އެމްޑީޕީ ފުނޑިގެންދާ ނަމަ އެމްޑީޕީއާ އެކު އައި ވަރަށް ގިނަ ކަންކަން ގައުމުން ގެއްލިގެން ދާނެ ކަމަށް ގަބޫލުކުރައްވާ ކަމަށް ވެސް އޭނާ ވިދާޅުވިއެވެ. މީގެ އިތުރުން އެމްޑީޕީ ހަލާކުވިޔަ ނުދިނުމަށް ޓަކައި އެމްޑީޕީގެ މެންބަރުންގެ މެދުގައި އެއްބައިވަންތަކަން ދެމެހެއްޓޭނެ ގޮތަކަށް ވާހަކަދައްކަންޖެހޭ ކަމަށް ވެސް ފަށާއިރު ޕްރޮގްރާމުގައި ވާހަކަދައްކަވަމުން މޫސަ ވިދާޅުވިއެވެ.