ދުނިޔެ ދަނީ "ޑިސްޓްރެސް ސިގްނަލް" އަޅަމުން: ކޮޕް 27

ދުނިޔޭގެ މޫސުމަށް އަންނަ ނޭދެވޭ ބަދަލުތަކާ ބެހޭ ގޮތުން މަޝްވަރާ ކުރުމަށް އދ.ން އިންތިޒާމްކޮށްގެން ބާއްވާ ކްލައިމެޓް ޗޭންޖް ސަމިޓް "ކޮޕް 27" ވަނީ އާދީއްތަ ދުވަހު މިސްރުގެ ޝަރްމުއް ޝައިޚްގައި ފަށާފައެވެ. ކޮންފަރެންސް ހުޅުވުމުގެގޮތުން ނެރުނު ރިޕޯޓަށް ދެއްވި ބަޔާނުގައި އދ.ގެ ސެކްރެޓަރީ ޖެނެރަލް އެންޓޯނިއޯ ގުޓަރެސް ވިދާޅުވީ، ދުނިޔެ މިވަގުތު ދަނީ "ޑިސްޓްރެސް ސިގްނަލް" (ހާލުގައި ޖެހުމުން ސަލާމަތްކޮށްދިނުން އެދި ފޮނުވާ ސިގްނަލް) ފޮނުވަމުން ކަމުގައެވެ.

ގުޓަރެސް ވިދާޅުވީ މި ރިޕޯޓުން ހާމަވަނީ ދުނިޔޭގެ މޫސުން "ކެއޯސް"އެއްގައި (މޫސުމުގެ ނިޒާމް މުޅިން އޮޅިފައި) ވާ ތަން ކަމުގައެވެ. ދުނިޔޭގެ މޫސުމަށް ބަދަލުތައް އަންނަމުންދަނީ އިންތިހާ ދަރަޖައިގެ އަވަސްމިނެއްގައި ކަމަށާއި، މިކަމުގެ ސަބަބުން ކޮންމެ ބައްރަކުންވެސް އިންސާނުންނާއި ދިރޭތަކެއްޗަށް ބޮޑެތި ގެއްލުންތައް ލިބެމުން ދާކަމަށް ވިދާޅުވެފައިވެއެވެ. ގުޓަރެސް ފާހަގަކުރެއްވިގޮތުގައި، ފާއިތުވި 8 އަހަރަކީ މިހާތަނަށް ރިކޯޑް ކުރެވުނު އެންމެ ހޫނުގަދަ 8 އަހަރެވެ.  

ދެ ހަފުތާއަށް ދެމިގެންދާނެ ސަމިޓުގައި މުޚާތަބްކުރައްވަމުން މިސްރުގެ ފޮރިން މިނިސްޓަރ ސާމިހް ޝުކްރީ ވަނީ، ޔޫކްރެއިން ހަނގުރާމައިގެ ސަބަބުން ކާބޯތަކެއްޗާއި ހަކަތައަށް ކުރިމަތިވެފައިވާ ދަތިކަން، މޫސުމާބެހޭގޮތުން އަޅަންޖެހޭ ފިޔަވަޅުތައް އެޅުމަށް ހުރަހަކަށް ނުހެދުމަށް ލީޑަރުންނަށް ގޮވާލައްވާފައެވެ. އަދި މޫސުމަށް އަންނަ ބަދަލުތަކާބެހޭ ކަންތައް ގޮސްފައި އޮތް ސީރިއަސް ހިސާބު، ހުރިހާ ލީޑަރުންނަށްވެސް ރަގަޅަށް ފަހުމްވެވަޑައިގަންނަވާކަން ހާމަ ކުރައްވައި، ހަމަ އެއާއެކު މައްސަލަ ހައްލުކުރުމަށް އަޅާނެ ފިޔަވަޅުތައްވެސް މިސަމިޓްގައި ހާމަކުރައްވަން ޖެހޭކަމަށް ވިދާޅުވެފައިވެއެވެ.

ގުޓަރެސްވެސް ވަނީ ކޮޕް 27 ސަމިޓަކީ މޫސުމާބެހޭގޮތުން "އަރޖަންޓް" އަމަލީ ފިޔަވަޅު އަޅާނެކަން ޔަގީންވާ ތަނަކަށް ހަދަންޖެހޭކަމަށް ވިދާޅުވެފައެވެ.

މިސްރުގެ ރެޑްސީ ރިސޯޓް، ޝަރްމުއް ޝައިޚްގައި ކުރިއަށްދާ ސަމިޓްގައި ދުނިޔޭގެ 120ށްވުރެ ގިނަ ލީޑަރުން ބައިވެރިވެވަޑައިގަންނަވާ ގޮތަށް ވަނީ ހަމަޖެހިފައެވެ.