ހާތާ ބާލިން އަތުން މޮޅުވެ ބަޔާން އެއް ވަނަ އަށް

ޖަރުމަނު ލީގުގައި ހާތާ ބާލިން ބަލިކޮށް ޗެމްޕިއަން ބަޔާން މިއުނިކް ލީގު ތާވަލްގެ އެއް ވަނަ އަށް ޖެހިލައިފިއެވެ.

ހާތާ ބާލިންގެ ދަނޑުގައި ކުޅުނު މެޗު ބަޔާނުން ކާމިޔާބުކުރީ އުނދަގޫ ގޮތަކަށް 3-2 އިންނެވެ. މެޗުގައި ބަޔާނުން ތިން ލަނޑު ޖަހާ ލީޑު ނަގާފައި ވަނިކޮށް، ހާތާ ބާލިން އިން ވަނީ ދެ ލަނޑު ޖަހައިފައެވެ.

މެޗު ފަށައިގެން 12 ވަނަ މިނެޓުގައި ސަޑިއޯ މާނޭ ތަނަވަސްކޮށްދިން ފުރުސަތަކުން ބަޔާނަށް ލީޑު ނަގައިދިނީ ޒުވާން ކުޅުންތެރިޔާ ޖަމާލް މުސިއާލާއެވެ. ބަޔާންގެ އަނެއް ދެ ލަނޑު ވެސް ޖެހީ ރަނގަޅު ފޯމެއްގައި ހުރެ، މޮޅު ކުޅުމެއް ދައްކަމުން އަންނަ ޗުޕޯ-މޯޓިންއެވެ. އެއީ މެޗުގެ 37 ވަނަ މިނެޓާއި 38 ވަނަ މިނެޓުގައި އޭނާ ޖެހި ލަނޑުތަކެވެ. ނަމަވެސް ހާތާ ބާލިން އިން ވަނީ ފަސް މިނެޓުގެ ތެރޭގައި ދެ ލަނޑު ޖަހާ ފަރަގު ކުޑަކޮށްފައެވެ. މެޗުގެ 40 ވަނަ މިނެޓުގައި ހާތާ ބާލިންގެ ފުރަތަމަ ލަނޑު ޖެހީ ޑޯޑީ ލުކެބޭކިއޯއެވެ. އެ ޓީމުގެ ދެ ވަނަ ލަނޑު 45 ވަނަ މިނެޓުގައި ޖެހީ ޕެނަލްޓީއަކުން ޑޭވިޑް ސެލްކޭއެވެ. ދެ ވަނަ ހާފަށް ނުކުމެ ބަޔާންގެ އޮގަސްޓިން ރޮހެލް ލަނޑެއް ޖެހި ނަމަވެސް ވީއޭއާރުން ވަނީ ލަނޑު ބަލައި ނުގަތުމަށް ނިންމާފައެވެ.

މެޗުން މޮޅުވެ ބަޔާން އެއް ވަނައިގައި އޮތީ 13 މެޗުން 28 ޕޮއިންޓާ އެކުއެވެ. ބަޔާނަށްވުރެ އެއް މެޗު މަދުން ކުޅެ ދެ ވަނައިގައި އޮތް ޔޫނިއަން ބާލިން އަށް ލިބެނީ 26 ޕޮއިންޓެވެ. ލީގުގައި އާދިއްތަ ދުވަހުގެ ރޭ ބަޔާ ލެވަކޫސަން ބަލިކޮށްގެން ޔޫނިއަން ބާލިން އަށް އަލުން އެއް ވަނަ އަށް އެރޭނެއެވެ.