ކުއްޔަށް އުޅޭ މީހުންގެ ނަމަށް ފެނާއި ކަރަންޓު ބިލްކުރެވުން، ކުންފުނިތަކުގެ ޝަކުވާ އަށް ލިބުނު ހައްލެއް
މި އިސްލާހުގެ ދަށުން ބިލުކުރުމުގައި ޢަމަލުކުރަންވީ މައިގަނޑު އުސޫލުތައް ބަޔާންކުރާ ގަވާއިދެއް އެކުލަވައިލަން ޖެހޭނެ
ކަރަންޓް ގުޅައިދިނުމުގެ ތެރެއިން
ކުއްޔަށް ދީފައިވާ ތަންތަނުގެ ފެނާއި ކަރަންޓު، އެތަނެއް ކުއްޔަށް ހިފައިގެން އުޅޭ ފަރާތަށް ބިލުކުރެވޭގޮތަށް ޤާނޫނަށް ގެނައި އިޞްލާހު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ތަސްދީގުކޮށްދެއްވާފައި ވަނީ ނިމި ދިޔަ ހަފްތާގެ ތެރޭގައެވެ. ޔުޓިލިޓީ ރެގިއުލޭޓަރީ އޮތޯރިޓީގެ ޤާނޫނަށް ގެނެސްފައިވާ އެ އިސްލާހަކީ ޢާންމު ބޭނުންތަކުގެ ޚިދުމަތްތަކުން ބިލުކުރުމާގުޅޭ ގަވާއިދު ހެދުމާ ގުޅޭ މާއްދާއެއް އިތުރުކުރުމަށް ގެނައި އިސްލާހެއްކަން ފާހަގަކޮށްލެވެއެވެ. މި އިސްލާހުގައި ވާގޮތުން އާންމު ބޭނުންތަކުގެ ޚިދުމަތްތައް ފޯރުކޮށްދޭ ފަރާތްތަކުން ޚިދުމަތް ލިބިގަންނަ ފަރާތްތަކަށް އެ ޚިދުމަތްތަކާ ގުޅޭގޮތުން ބިލުކުރުމުގައި ޢަމަލުކުރަންވީ މައިގަނޑު އުސޫލުތައް ބަޔާންކުރާ ގަވާއިދެއް، ޢާންމު ބޭނުންތަކުގެ ޚިދުމަތްތައް ފޯރުކޮށްދޭ ފަރާތްތަކުގެ މަޝްވަރާއާއެކު، އޮތޯރިޓީން އެކުލަވާލަން ޖެހޭނެއެވެ.
ޔުޓިލިޓީ ޚިދުމަތްތައް ގޭގެ ވެރިފަރާތުގެ ނަމުގައި ރެޖިސްޓްރީކޮށްފައި ހުރުމަކީ ޔުޓިލިޓީ ޚިދުމަތްދޭ ކުންފުނިތަކަށް ދިމާވާ ވަރަށް ބޮޑު ގޮންޖެހުމެއް ކަމަށް ޔުޓިލިޓީ އޮތޯރިޓީ އާއި ޔުޓިލިޓީ ޚިދުމަތްދޭ ކުންފުނިތަކުން އައީ މީގެ ކުރިން ބުނަމުންނެވެ. ކުންފުނިތަކުން ބުނިގޮތުގައި ކުރިން ބިލް ކުރަމުން ދަނީ އިމާރާތުގެ ވެރި ފަރާތަށް ކަމަށް ވުމުން، އޭގެ ސަބަބުން ޚިދުމަތްދޭ ކުންފުނިތަކަށް ބޮޑެތި ދަތިތަކާއި ކުރިމަތިލާން ޖެހެއެވެ.
އެގޮތުން ބިލް ނުދައްކައިފި ނަމަ ވެރި ފަރާތުން ޒިންމާ ވާގޮތަށް އޮތުމުން، ބިލް ނުދައްކާ ފަރާތްތަކާއި މެދު ފިޔަވަޅު އެޅުމަށް ދަތިވާކަން ޔުޓިލިޓީ ޚިދުމަތްދޭ ކުންފުނިތަކުން ފާހަގަކުރެއެވެ. ހަމައެއާއި އެކު ސަބްސިޑީ ދޭން ޖެހޭ ފަރާތްތަކަށް ސަބްސިޑީ ދިނުމުގައި ވެސް އެކަމުގެ ސަބަބުން ދަތިތަކާއި ދިމާވާކަމަށް ކުންފުނިތަކުން ވަނީ ބުނެފައެވެ. ގޭގެ ވެރިފަރާތުގެ ނަމުގައި ޚިދުމަތްތައް ރެޖިސްޓްރީ ކުރުމުގެ ބަދަލުގައި ޚިދުމަތް ހޯދާ ފަރާތުގެ ނަމަށް ޚިދުމަތުގެ ރެޖިސްޓްރީ ބަދަލުކުރުމުން ކަސްޓަމަރުންނަށް ވެސް ފަސޭހަވެގެންދާނެ ކަމަށް ޔުޓިލިޓީ ކުންފުނިތަކުން ވަނީ ފާހަގަކޮށްފައެވެ.
ބިލު ނުދެއްކުމުގެ ސަބަބުން ހިނގާ ޖޫރިމަނާ ކަނޑައެޅުމުގެ އުސޫލުތަކާއި، ބިލު ނުދެއްކުމުގެ ސަބަބުން ޚިދުމަތް މެދުކަނޑާލަންޖެހޭ ހާލަތްތަކަކީ ކޮބައިކަން ކަނޑައެޅުމާއި، އެފަދަ ހާލަތެއް މެދުވެރިވެއްޖެނަމަ އެ ހާލަތުތަކުގައި ކޮންމެހެން އަމަލުކުރަންޖެހޭ އިޖުރާއަތުތައް ކަނޑައެޅުން ވެސް އަލަށް ގެނައި އިސްލާހުތަކުގެ ތެރޭގައި ހިމެނެއެވެ. އެހެންކަމުން އަލަށް ފާސްކުރި އިސްލާހާއި އެކު ކުންފުނިތަކަށް ފަސޭހަވެގެންދާނެއެވެ.
